KALABO 14

Ɣaa-Ɓaa Ga E Faa Ɓigiitiɛ Ɣɛ Ɓɔɔ Kala

Hiiɓuluitiɛ 8:1

NIITIƐ MAA NƐƐ E KƐ: Ya ɣɛna zɛpɛ ʋeezu, na ɣa ɣɛɛna yiɛ yɛpɛ e vile zɛpɛi vaa-vekegi ta va, ɔ vɛɛ liizu ta ɓalaa pɔ maa nɛɛ te kwɛ̃ɛ. Ɓɔ te va te kwɛ̃ɛ velei zɛpɛi vaa-ʋekegitiɛ te vilegɛi la zɛpɛ wũgi va e vɛɛ zaɓui va e kɛɛ yiɛ zɛpɛi na ʋe.

VELEI YA NA ƔƐƐ LA:

Zaɓui wɛ̃ɛ e kɛɛ yiɛ zepɛi na ʋe. Ɣaa-ɓaa ga e kwɛ̃ɛ ani ya zɛpɛi na ʋeezu nɔ ga e ki-daa-wodo ʋe, ga e kɛ e ɣaa yɔwɔ̃itiɛ te la ga fai ta, ɔɔ ga e kɛ numaitiɛ te fai ta ɣɛ. Maa nɛɛ fai niitiɛ ɓɔgapɛ te ɣɛ e ɣisu ya ɣɛna ya yɛpɛi ʋeezu. Ɣaa-ɓaa ga zɛpɛi vaa-ʋekegitiɛ te ɓɔ e va ga e nii ɣɛ.

Ɣi-gaa-ziɛ ga: ‘Gaa-zaɣa-kɛɛ ɔɔ faa zɛɓɛi ɓɔɔ e te ɣisu e vile zɛpɛ wũgi nii va? Ki-daa wodo zɛɓɛi tɛlɛ vaazu yee zeizu bu? Ani ɓalaa ga gaa-zaɣa-kɛɛ nii ɣaa wotena, gaa-zaɣa-kɛɛ zɛɓɛi te vaazu ɣi-gaa-ziɛzu ma, na ɣa ɣɛɛna ta vaazu gaa wotesu ɣɛ le?’ Ya ɣi-gaa-ziɛna niitiɛ ɓɔgapɛ ma, ya yɛpɛ ɣavele ɓɛtɛ e ɣɛ velei nɔ te vaazu yɛsu ɣi-gaa-ziɛzu la gaa-zaɣa-kɛɛitiɛ ma. Na ɣa kɛ, te wuito ɓɔɔ e ma, te zɛpɛi ɣaa ɣa, na ɣa ɣɛɛna te yeezei niitiɛ wu e dɛɛzu ga tiɛ.
Yiɛ yɛpɛ ga tamaa e vile Zɛpɛi ma wũgi va. Ya ɣɛna zɛpɛi ʋeezu, maa nɛɛ ya yɛpɛi ma wũgi ɣɛ ɓɔɔ kala. Ya na ɣɛ ani ya woi taniga ziɣina zɛpɛ wũgi zu yiɛ lɛ ma yiɛ bo zɛpɛi na zu.
Faa ɓigiitiɛ lɛ ɓɔɔ kala, na ɣa ɣɛɛna gaa ɣa zu mɛlɛ ɓaa. Zɛpɛi vaa-vekegi nii ziɣi nɔ e yɛpɛzu e vile ya yɛpɛi ma wũgi va na ɣa ɣɛɛna towa ɓɔ e va ga e zɛpɛi na ʋe siɛgi na ma te fea e ya. Faa ɓigitiɛ te zɛpɛi na zu, te lɛ ɓɔɔ kala, kɛ mɛlɛ tamaa. Ya wolona faa ɓigii ta ma, na maa kpowũ ga tawolo ɔ vɛɛ yɛpɛzu e vile zɔi va. Na ɣa kɛ, na lɛ ɓaa ga numaa te gaa ɣa.

Ya yɛpɛi lɔɔ zeizuvɛ, yɛpɛ e vile faa ɓigitiɛ va na ɣa ɓɔ numaitiɛ va te niitiɛ wɛ̃ɛ wo vaazu yɛpɛzu e vile ba. Ya ɣɛna ya yɛpɛi laa wulozu, lɛ faa ɓigiitiɛ ma ga e ɓɔ numaitiɛ va te ɣizɛ niitiɛ zu e dɛɛ ga tiɛ.