9 Butali bwa niti buicahezi ndu;
Bubetile misumo yabona ye 7.
2 Bulukisize hande nama yabona;
Buzwakile waine;
Mi bulukisize ni tafule yabona.
3 Bulumile batanga babasizana
Kuyo huweleza fa libaka zelumbile za muleneñi, kuli+
4 “Mutu kaufela yasina zibo, atahe kwanu.”
Mi bubulelela yasina ngana, buli:
5 “Taha, uto ca kwa sinkwa saka
Mi uto nwa kwa waine yenizwakile.
6 Utuhele kutokwa zibo kwahao mi upile;+
Uzamaye mwa nzila ya kutwisiso.”+
7 Yahakulula musheununi uipatela maswabi,+
Mi mutu kaufela yakalimela yamaswe ukautwa butuku.
8 Usike wakalimela musheununi, kakuli uka kutoya.+
Ukalimele mutu yabutali, mi uka kulata.+
9 Ufe mutu yabutali zibo, mi yena ukatalifa hahulu.+
Ulute mutu yalukile, mi ukaekeza kwa lika zaituta.
10 Kusaba Jehova ki ona makalelo a butali,+
Mi kuba ni zibo ya Yakenile Hahulu+ ki yona kutwisiso.
11 Kakuli ka na, mazazi ahao akaba amañata,+
Mi lilimo za bupilo bwahao likaekezeha.
12 Haiba utalifa, butali bwahao buka kutusa,
Kono haiba u musheununi, ki wena unosi yakasinyehelwa.
13 Musali wa sikuba unani lilata.+
Utokwile zibo mi hakuna ni sesikana saziba.
14 Uina kwa munyako wa ndu yahae
Mwa sipula, ili fa libaka zelumbile za muleneñi,+
15 Inzaa huweleza ku bo lifitanzila,
Babaizamaela feela mwa nzila, ali:
16 “Mutu kaufela yasina zibo, atahe kwanu.”
Mi ubulelela babasina ngana, uli+
17 “Mezi a kuuzwa amunati,
Mi lico za kucela kwa mukunda zatabusa.”+
18 Kono habazibi kuli babasina maata, babashwile, ki mona mobainzi,
Ni kuli baba mupotela ba mwa sibaka sa kwatasi mwa Libita.+