Haiba mukenelwa ki sabo, munahanisise ka za lika zaka miezeza Jehova kwapili. Satani hakayundiswa. Poniso yeñwi fa mukopano omutuna wa 2014 neibonisize muzwale yomuñwi yanaanyakisisa ni lubasi lwahae mo liñolo la 2 Timotea 3:​1-5 likona kubalelwa kambe nelipolofitile mokuka bela mwa Paradaisi, nelika balwa kuli: “Mwa lifasi lelinca kukataha linako zende hahulu. Kakuli batu bakaba babalata babañwi, babalata lika za butokwa za kwa moya, babaishuwa, babaikokobeza, babafa tumbo ku Mulimu, babautwa bashemi babona, babanani buitumelo, babasepahala, babanani lilato lelituna kwa mabasi abona, babasina buñañeli, bababulela zende ka za babañwi kamita, babanani buiswalo, babasina buhali, babalata bunde, babakona kusepiwa, babasina muñañatoho, babasa itundumuni ka buikuhumuso, babalata Mulimu isiñi minyaka, babasusuezwa ki takazo ya niti ya kubata kusebeleza Mulimu; mi bao ubakumalele.” Kana mwaikambotanga ni lubasi lwamina kamba ni mizwale ni likaizeli ka za mobuka bela bupilo mwa lifasi lelinca? w24.01 6 ¶13-14

Kwaomba-omba kuziba kuli Jehova utabiswa ki batu bahae sina sikwata! Bibele ibulela kuli: “Jehova utabela batu bahae.” (Samu 149:4) Kono ka linako zeñwi, babañwi bakona kuzwafa, ili nto yekona kutahisa kuli baipuze kuli: ‘Kana natabisa Jehova?’ Buñata bwa batu bababulezwi mwa Bibele, ili bane basebelelize Jehova ka busepahali, ni bona fokuñwi nebaikutwanga cwalo. (1 Sam. 1:​6-10; Jobo 29:​2, 4; Samu 51:11) Bibele ibulela hande ka kuutwahala kuli batu babasika petahala bakona kutabisa Jehova. Ka mukwa ufi? Ka kubonisa tumelo ku Jesu Kreste ni kukolobezwa. (Joa. 3:16) Haiba lueza cwalo, lukabonisa fapilaa nyangela kuli lubakezi libi zaluna ni kuli lusepisize Mulimu kuli lukaeza tato yahae. (Lik. 2:38; 3:19) Jehova watabanga haluunga mihato yeo ilikuli lutiise silikani saluna ni yena. Haiba lueza molukonela kaufela kupila ka kulumelelana ni buitamo bone luezize haluineela ku Mulimu, lukatabisa Jehova mi uka luunga kuba balikani bahae babatuna.—Samu 25:14. w24.03 26 ¶1-2

Lukona kulikanyisa mutala wa balutiwa ka kuzwelapili kukutaza, ba muuso niha balulaela kuli lusike lwaeza cwalo. Lwakona kuba ni buikolwiso bwa kuli Jehova uka lutusa kupeta bukombwa. Kacwalo mulapele ku Jehova kuli amife bundume ni butali. Mukupe Jehova kuli amituse kutiyela miinelo yetaata. Buñata bwaluna lutalimana ni miinelo yetaata yecwale ka makulanu, kushwelwa ki mulatiwa waluna, butata bobuñwi mwa lubasi, nyandiso, kamba miinelo yemiñwi yetaata. Mi lika zecwale ka matuku ayambukela ni lindwa litahisize kuli kube taata hahulu kutiyela miinelo yeo. Mutaluseze Jehova kaufela ze mwa pilu yamina. Mumutaluseze za butata bomukopana ni bona sina feela mone mukaezeza ku mulikanaa mina yomutuna. Mukolwe kuli Jehova ‘uka mitusa.’ (Samu 37:​3, 5) Kutundamena kulapela kuka lutusa ‘kuitiisa haluli mwa manyando.’ (Maro. 12:12) Jehova waziba zebakopana ni zona batanga bahae mi “uutwa muhuwo wabona wa kuli abatuse.”—Samu 145:​18, 19. w23.05 5-6 ¶12-15