14 Musali yabutali luli uyaha ndu yahae,+
Kono wa sikuba uyahulula ndu yahae ka mazoho ahae.
2 Yazamaya ka kuluka usaba Jehova,
Kono yazamaya mwa linzila zahae za bupumi wamushwaula.
3 Tupa ya buikuhumuso i mwa mulomo wa sikuba,
Kono milomo ya bababutali ika basileleza.
4 Kokusina likomu, mwa sicelo kukenile,
Kono maata a pulu atahisa kutulo yetuna.
5 Paki yasepahala haana kubulela buhata,
Kono paki ya buhata ubulela buhata nako kaufela.+
6 Musheununi ubata butali mi haabufumani,
Kono zibo ifumanwa ka bunolo ki mutu yanani kutwisiso.+
7 Ube kwahule ni mutu wa sikuba,
Kakuli hauna kufumana zibo fa milomo yahae.+
8 Ka butali, mutu yabutali uutwisisa nzila yazamaya ku yona,
Kono litoto lipumiwa ki bukuba bwazona.+
9 Likuba zaseha niha linani mulatu,+
Kono babalukile balata kukutisana lipilu.
10 Pilu yaziba butuku bwayona,
Mi hakuna mutu usili yakona kutaba ni yona.
11 Ndu ya babamaswe ikasinyiwa,+
Kono tende ya babalukile ikakonda.
12 Kunani nzila yebonahala kuluka ku mutu,+
Kono kwa mafelelezo itahisa lifu.+
13 Mutu wakona kuseha kono pilu yahae inze iutwa butuku,
Mi tabo ikona kufelela mwa maswabi.
14 Mutu wa pilu yekeluhile ukakutula sesizwa mwa linzila zahae,+
Kono mutu yomunde ufumana mupuzo ka likezo zahae.+
15 Mutu yasalemuhi kozi ulumela litaba kaufela,
Kono yabutali unahanisisa mihato yahae kaufela.+
16 Yabutali unani tokomelo mi utokolomoha bumaswe,
Kono mutu wa sitoto haana tokomelo mi uisepa hahulu.
17 Yaakufa kuhalifa ueza ka bukuba,+
Kono mutu yanahanisisa hande litaba utoilwe.
18 Saanda sa babasa lemuhi kozi ki bukuba,
Kono bababutali baapeswa kuwani ya zibo.+
19 Batu babamaswe bakakubama fapilaa babande,
Mi babalunya bakakubama kwa minyako ya babalukile.
20 Mubotana utoilwe mane ki babayahile ni yena,+
Kono mufumi unani balikani babañata.+
21 Yashwaula yayahile ni yena ueza sibi,
Kono mutu yabonisa babotana mukekecima unani tabo.+
22 Kana babalela zemaswe habana kukeluha?
Kono babatundamena kueza zende bakaamuhela lilato lelisa feli ni busepahali.+
23 Musebezi kaufela oezwa ka taata watusa,
Kono kubulela-bulela feela kutahisa bubotana.+
24 Kuwani ya bababutali ki bufumu;
Kono bukuba bwa litoto ki bukuba honacwalo.+
25 Paki ya niti upilisa bupilo bwa batu,
Kono paki ya buhata ubulela buhata nako kaufela.
26 Mutu yasaba Jehova unani sepo yetiile,+
Mi sepo yeo ikaba masabelo a bana bahae.+
27 Kusaba Jehova ki liweluwelu la bupilo,
Lelitusa mutu kuli asike awela mwa malaba a lifu.
28 Hakunani sicaba sesituna, mulena wabubekiwa,+
Kono mubusi haasina babusiwa, maata ahae afela.
29 Yasahalifi kapili unani temuho yetuna,+
Kono wa kacimacima ubonisa bukuba bwahae.+
30 Pilu yewile ki bupilo bwa mubili,
Kono muna ubolisa masapo.+
31 Yabukula mubotana ulwaha Mubupi wahae,+
Kono mutu kaufela yabonisa mubotana mukekecima ukanyisa Mubupi.+
32 Yamaswe ukawiswa ki bumaswe bwahae,
Kono yalukile ukafumana masabelo ka busepahali bwahae.+
33 Butali buinzi inze bukuzize mwa pilu ya mutu yanani kutwisiso,+
Kono bukabata kuizibahaza mwahalaa litoto.
34 Kuluka kupahamisa naha,+
Kono sibi sitahiseza sicaba maswabi.
35 Mulena utabela mutanga yaeza lika ka kutwisiso,+
Kono uhalifela yaeza lika zeswabisa.+