Deuteronoma

8 “Mubone teñi kuli mwamamela milao kaufela yeni mifa kacenu le, ilikuli muzwelepili kupila+ ni kuata ni kukena mwa naha yanaasepisize Jehova ku bo kuku wamina ni kuyo iluwa.+ 2 Uhupule nzila yetelele yakuzamaisize ku yona Jehova Mulimu wahao mwa lihalaupa ka lilimo ze 40 ze,+ kuli akukokobeze ni kukulika+ ilikuli azibe sesi mwa pilu yahao,+ kuli abone nji ukamamela milao yahae kamba kutokwa. 3 Ka mukwa ocwalo, akukokobeza, akutuhelela kulapa,+ mi akufepa ka maana,+ yene usazibi ni yene basazibi bo ndataho, ilikuli akuzibise kuli mutu hapili sinkwa feela, kono mutu upila ni ka linzwi kaufela lelizwa mwa mulomo wa Jehova.+ 4 Liapalo zene uapezi nelisika cancauka, mi mahutu ahao naasika luluha mwahalaa lilimo ze 40 ze.+ 5 Waizibela hande mwa pilu yahao kuli Jehova Mulimu wahao naakuhakulula sina mutu mwahakululelanga mwanaa hae.+

6 “Cwale ulukela kumamela milao ya Jehova Mulimu wahao ka kuzamaya mwa linzila zahae ni ka kumusaba. 7 Kakuli Jehova Mulimu wahao ukutisa mwa naha yende,+ naha ya linukana,* ya maweluwelu* abubiseza mezi mwa mabala a mwa musindi ni mwa libaka za malundu, 8 naha ya buloto ni mabele, ya likota za veine, likota za feiga, ni likota za pomegaraneti,+ naha ya oli ya olive ni linosi,+ 9 naha momusike mwataelwa ki lico ni momusike mwatokwa sesiñwi, naha ya macwe anani butale bwa sipi mi mukalafa kopa mwa malundu ayona.

10 “Hase ucile mi ukusi, uswanela kulumbeka Jehova Mulimu wahao kabakala naha yende yakufile.+ 11 Utokomele kuli usike walibala Jehova Mulimu wahao ka kupalelwa kumamela milao yahae, likatulo zahae, ni litaelo zahae zeni kufa kacenu. 12 Hase ucile mi ukusi, mi uyahile mandu amande ni kuina mwateñi,+ 13 likomu ni lingu zahao hase liatile, mi silivera ni gauda yahao iekezehile mi seunani lika kaufela ka buñata, 14 usike watuhelela pilu yahao kuikuhumusa+ ni kukulibalisa Jehova Mulimu wahao, yakuzwisize mwa naha ya Egepita, mwa ndu ya butanga,+ 15 yakuzamaisize mwa lihalaupa+ lelituna, lelisabisa, mokunani linoha zenani sifanu, ni tubanze, mwa naha yeomile yesina mezi. Naabubisize mezi kuzwa mwa licwe lelitiile+ 16 mi akufepa mwa lihalaupa ka maana,+ yene basazibi bo ndataho, kuli akukokobeze+ ni kuli akulike ilikuli utusehe mwa linako za kwapili.+ 17 Haiba uipulelela mwa pilu yahao kuli: ‘Niipumanezi sifumu se ka maata aka ni ka kutiya kwaka,’+ 18 uhupule kuli Jehova Mulimu wahao ki yena yakufa maata a kufumana sifumu,+ ilikuli apete tumelelano yanaaitamile ku bo kuku wahao, sina mokuinezi kacenu le.+

19 “Haiba mulibala Jehova Mulimu wamina mi mwalatelela milimu isili ni kuisebeleza ni kuikubamela, namilemusa kacenu le kuli mukashwa luli.+ 20 Mukashwa sina mwashwela macaba ayundiswa ki Jehova fapilaa mina, kakuli hamusika mamela linzwi la Jehova Mulimu wamina.+