15 Kalabo yebunolo ifelisa mabifi,+
Kono manzwi autwisa butuku atahisa buhali.+
2 Lilimi la bababutali liitusisa hande zibo,+
Kono mulomo wa litoto ubulela litaba za bukuba.
3 Meeto a Jehova abona kai ni kai,
Kutalima babamaswe ni babande.+
4 Lulimi lolukuzize ki kota ya bupilo,+
Kono lipulelo zekopami zazwafisa.
5 Sikuba sishwaula kalimelo ya ndataa sona,+
Kono mutu yanani butali wautwa haasikululwa.+
6 Mwa ndu ya mutu yalukile kunani bufumu bobuñata,
Kono sakutula yamaswe simukenya mwa butata.+
7 Milomo ya bababutali ihasanya zibo,+
Kono pilu ya sitoto haiezi cwalo.+
8 Sitabelo sa babamaswe sanyenyisa ku Jehova,+
Kono tapelo ya babalukile yamunyakalalisa.+
9 Jehova unyenya nzila ya mutu yamaswe,+
Kono ulata mutu yatundamena kuluka.+
10 Kalimelo ibonahala bumaswe ku mutu yakeluha mwa nzila,+
Kono mutu yatoya nyazo ukashwa.+
11 Libita ni sibaka sa sinyeho li fa nalela ku Jehova.+
Lipilu za batu ni zona licwalo, mane ni kufita!+
12 Musheununi halati mutu yamusikulula.+
Haana kubuza bababutali.+
13 Pilu yetabile itahisa tabo mwa pata,
Kono pilu ye mwa maswabi ilembwalisa moya.+
14 Pilu yenani kutwisiso ibata zibo,+
Kono mulomo wa litoto uifepa ka bukuba.+
15 Mazazi kaufela a mutu yanyandile amaswe,+
Kono mutu yanani pilu yetabile u mwa mukiti ka nako kaufela.+
16 Ki hande kuba ni lika zenyinyani mutu inzaa saba Jehova+
Kufita kuba ni sifumu sesiñata mutu inzaa nani lipilaelo.+
17 Ki hande kuca muloho inze kunani lilato+
Kufita kuca nama ya poho yenunisizwe inze kunani sitoyo.+
18 Mutu wa kacimacima utahisa lifapahano,+
Kono yasahalifi kapili ufelisa likomano.+
19 Nzila ya mutu yabuzwa iswana sina lukwakwa lwa mikakani,+
Kono nzila ya babalukile iswana sina mukwakwa onamile.+
20 Mwana yabutali utabisa ndatahe,+
Kono sitoto ushwaula mahe.+
21 Bukuba bwatabisa ku mutu yasina ngana,+
Kono mutu yanani temuho uzamaya mwa nzila yelukile.+
22 Milelo haikondangi hakusina kulelisana,
Kono lika zakonda hakunani baelezi babañata.+
23 Mutu watabanga hafile kalabo yelukile,+
Mi linzwi lelibulelwa ka nako yelukile—ki lelinde luli!+
24 Ku yanani kutwisiso, nzila ya bupilo yakambama,+
Kumukauhanya kwa Libita leli kwatasi.+
25 Jehova ukawisa ndu ya babaipahamisa,+
Kono ukabukeleza mululwani wa mbelwa.+
26 Jehova unyenya milelo ya mutu yamaswe,+
Kono lipulelo zende ki zekenile ku Yena.+
27 Mutu yafumana pulofiti ka kusasepahala utahiseza ba ndu yahae butata,+
Kono yatoile likweta ukazwelapili kupila.+
28 Pilu ya mutu yalukile yanahanisisanga isika alaba kale,+
Kono mulomo wa babamaswe ubulela litaba zemaswe.
29 Jehova u kwahule ni babamaswe,
Kono uutwa litapelo za babalukile.+
30 Meeto abenya anyakalalisa pilu;
Piho yende itiisa masapo.+
31 Yautwa kalimelo yepilisa
Uina mwahalaa bababutali.+
32 Yahana kalimelo unyenya bupilo bwahae,+
Kono yautwa kalimelo ukaipumanela kutwisiso.+
33 Kusaba Jehova kuluta mutu kuba ni butali,+
Mi buikokobezo buisa kwa kukutekiwa.+