Muekelesia
5 Nako kaufela hauya kwa ndu ya Mulimu wa niti, utokomele mihato yahao;+ ki hande kusutelela kuli uteeleze+ kufita kufa sitabelo sina moliezeza litoto,+ kakuli halilemuhi kuli zelieza limaswe.
2 Usike waakufa kuzwisa manzwi mwa mulomo wahao, kamba kuakufa kubulela ka pilu yahao fapilaa Mulimu wa niti,+ kakuli Mulimu wa niti u mwa mahalimu kono wena u fa lifasi. Ki lona libaka manzwi ahao haswanela kuba amanyinyani.+ 3 Kakuli litolo litahanga kabakala zeñata hahulu za kueza,*+ mi lipulelo za sitoto lizwelela fa manzwi amañata hahulu.+ 4 Nako kaufela haueza buitamo ku Mulimu, usike waliyeha kubupeta,+ kakuli hatabiswi ki litoto.+ Haueza buitamo, ubupete.+ 5 Ki hande kusaeza buitamo kufita kuitama ni kupalelwa kueza mouitamezi.+ 6 Usike watuhelela mulomo wahao kukuezisa* sibi,+ mi usike wabulela fapilaa lingeloi* kuli neli mafosisa.+ Ubata kuhalifisezañi Mulimu wa niti kabakala zeubulela, kuli mane asinye misebezi ya mazoho ahao?+ 7 Kakuli sina lika zeñata za kueza halitahisa litolo,+ manzwi amañata ni ona atahisa lika zesina tuso. Kono usabe Mulimu wa niti.+
8 Haiba mwa sikiliti seupila ku sona ubona mubotana yanyandiswa mi ubona likezo za kukopamisa katulo yelukile ni kuluka, usike wakomokiswa ki taba yeo.+ Kakuli nduna yapahami yo ubonwa ki yapahami kumufita, mi kunani babañwi hape babapahami hahulu kubafita.
9 Hape batu bao kaufela baabelwa zebeiwa ki naha; nihaiba lico zaca mulena lizwa mwa simu.+
10 Yalata silivera haana kukuliswa ki silivera, mi yalata bufumu haana kukuliswa ki safumana.+ Ni zona zeo halina tuso.+
11 Lika zende haliba zeñata, babalica ni bona baba babañata.+ Mi muñaa zona limutusa cwañi, kwandaa kulitalima feela ka meeto ahae?+
12 Buloko bwa yasebeleza babañwi bumunati, ibe kuli zaca ki zenyinyani kamba ki zeñata, kono maluwo amañata a mufumi amutokwisa buloko.
13 Kunani bumai* bobutuna boniboni mwatasaa lizazi: ki sifumu sesimaibisa muñaa sona yanaaipulukela sona. 14 Sifumu seo sisinyeha kabakala musebezi omaibisa, mi hapepa mwana, hakuna sanani sona sesisiyezi.+
15 Mutu mwazwela mwa mba ya mahe, ki mona mwakayela cwalo ali mapunu, sina mwanaatezi.+ Mi hakuna sakona kuya ni sona sa musebezi wahae kaufela waezize ka taata.+
16 Ni bona bo, ki bumai* bobutuna: Hona cwalo mwanaatezi ki mona mwakayela; mi ufumanañi mutu yazwelapili kubelekela moya ka taata?+ 17 Hape zazi ni zazi ucela lico mwa lififi, inzaa zwafile hahulu, kukula hahulu butuku, ni kunyema hahulu.+
18 Ye ki yona taba yenilemuhile kuba yende ni yeswanela: mutu uswanela kuca ni kunwa ni kuikola kabakala musebezi wahae kaufela wabeleka ka taata+ ili waikataza kueza mwatasaa lizazi mwa mazazinyana a bupilo bwamufile Mulimu wa niti, kakuli wo ki ona mupuzo* wahae.+ 19 Hape Mulimu wa niti hafa mutu sifumu ni maluwo+ ni kumukonisa kuikola zona, mutu yo aamuhele mupuzo* wahae ni kutabela musebezi wahae waeza ka taata. Ki mpo yezwa ku Mulimu.+ 20 Kakuli haana kulemuha* mwafelela mazazi a bupilo bwahae, kabakala kuli Mulimu wa niti umupatehisa ka tabo ye mwa pilu yahae.+