Liñolo Labubeli Makorinte
14 Mutundamene kubonisa lilato, kono mutiiseze kubata* limpo za kwa moya, sihulu mpo ya kupolofita.+ 2 Kakuli yabulela ka lilimi lisili habuleli kwa batu, kono ubulela ku Mulimu, kakuli hakuna yateeleza,+ kono ubulela ka moya likunutu zekenile.+ 3 Kono yapolofita yena watiisa ni kususueza, mi uomba-omba batu ka manzwi ahae. 4 Yabulela ka lilimi lisili uitiisa ili yena, kono yapolofita yena utiisa puteho. 5 Cwale nenikatabela kuli kaufelaa mina mubulele ka malimi,+ kono sihulu nitabela kuli mupolofite.+ Kaniti, yapolofita ufita yabulela ka malimi asili, konji haiba atoloka, kuli puteho itiiswe. 6 Kono ka nako ye mizwale, hane nikataha ku mina ninze nibulela malimi asili, nenika mitusa cwañi konji hane nikabulela ku mina ka sinulo+ kamba ka zibo+ kamba ka bupolofita kamba ka tuto?
7 Ki nto yeswana ni kwa lika zesapili zezwisa mulumo, ibe kanamutolilo kamba harepa. Haiba mililelo yazona isashutani, kukazibahala cwañi sesilizwa fa kanamutolilo kamba fa harepa? 8 Kakuli haiba tolombita ibiza batu ka mulumo osalemusehi hande, ki mañi yakaitukiseza ndwa? 9 Ka mukwa oswana, ni mina, haiba ka lulimi lwamina musabuleli manzwi autwisiseha ka bunolo, mutu ukaziba cwañi sesibulelwa? Fo mane mukaipulelela feela mwa moya. 10 Kwakona kuba kuli mwa lifasi kunani lipuo zeñata, kono ku zona hakuna puo yesina taluso. 11 Kakuli haiba haniutwisisi taluso ya puo, nikaba muzwahule ku yabulela, mi ni yena yabulela ukaba muzwahule ku na. 12 Ka mukwa oswana, ni mina, bakeñisa kuli munyolelwa hahulu limpo za moya, mubate kuatelwa ki limpo zekayahisa puteho.+
13 Hakulicwalo, yabulela ka lilimi lisili alapele kuli akone kutoloka.+ 14 Kakuli haiba nilapela ka lilimi lisili, ki mpo yaka ya moya yelapela, kono munahano waka hauutwisisi. 15 Cwale kukaezwañi? Nikalapela ka mpo ya moya, kono hape nikalapela ni ka munahano waka. Nikaopela milumbeko ka mpo ya moya, kono nikaopela milumbeko ni ka munahano waka. 16 Hakusicwalo, haiba ufa milumbeko ka mpo ya moya, mutu-tu feela yaliteñi mwahalaa mina ukabulela cwañi “Ameni” kwa buitumelo boufitisa, kakuli hautwisisi seubulela? 17 Ki niti, wena ufa buitumelo ka nzila yende, kono cwale yomuñwi hatiiswi. 18 Naitumela ku Mulimu kuli nibulela malimi amañata kufita mina kaufela. 19 Nihakulicwalo, mwa puteho nenika tabela kubulela manzwi aketalizoho ka munahano* waka, kuli nikone kuluta* babañwi, kufita kubulela manzwi a 10,000 ka lilimi lisili.+
20 Mizwale, musike mwaba banana babanyinyani kwa kuutwisisa lika,+ kono mube banana babanyinyani ku zemaswe;+ mi mube babahulile kwa kuutwisisa lika.+ 21 Mwa Mulao kuñozwi kuli: “‘Nikabulela kwa sicaba se ka malimi a bazwahule ni ka milomo ya basili, mi ni fona fo, bakahana kuniutwa,’ kubulela Jehova.”*+ 22 Kabakaleo, kubulela ka malimi asili haki sisupo ku babalumezi,+ kono ki sisupo ku babasika lumela, hailifo bupolofita haki bwa babasika lumela, kono ki bwa babalumezi. 23 Cwale haiba puteho kaufela ikopana hamoho mwa sibaka silisiñwi mi kaufela babulela ka malimi asili, mi kihona kukena batu-tu feela kamba batu babasika lumela, kana habana kubulela kuli mwapulumuka? 24 Kono haiba mwapolofita kaufelaa mina, mi kihona kukena yasika lumela kamba mutu-tu feela, ukakalimelwa ni kutatubiwa ki bona kaufela. 25 Cwale likunutu za mwa pilu yahae likapatuluha, kuli mane ukawa ka pata yahae ni kulapela Mulimu, inzaa li: “Kaniti Mulimu uteñi mwahalaa mina.”+
26 Cwale kukaezwañi mizwale? Hamukopana hamoho, yomuñwi unani samu, yomuñwi unani tuto, yomuñwi unani sinulo, yomuñwi ubulela ka lilimi lisili, mi yomuñwi unani taluso.+ Lika kaufela liezwe ka mulelo wa kutiisa babañwi. 27 Mi haiba mutu abulela ka lilimi lisili, kubulele feela bababeli kamba babalaalu haiba ki babañata, mi baeze cwalo ka kufanana sibaka, mi yomuñwi uswanela kutoloka.+ 28 Kono haiba hakuna mutoloki, uswanela kukuza mwa puteho mi aikambote ili yena ni kuambola ku Mulimu. 29 Kubulele feela bapolofita bababeli+ kamba babalaalu, mi babañwi babate taluso. 30 Kono haiba yomuñwi aamuhela sinulo inzaa inzi mo, mubuleli wapili akuze. 31 Kakuli kaufelaa mina mwakona kupolofita ka kufanana sibaka, kuli kaufela baitute mi kaufela basusuezwe.+ 32 Mi limpo za moya za bapolofita liswanela kuitusiswa hande ki bapolofita. 33 Kakuli Mulimu haki Mulimu wa mifilifili, kono ki wa kozo.+
Sina mokuezezwa mwa liputeho kaufela za babakenile, 34 basali bakuze mwa liputeho, kakuli habasika lumelezwa kubulela.+ Kono baipeye kwatasi,+ sina Mulao ni ona haubulela cwalo. 35 Haiba babata kuziba nto yeñwi, babuze baana babona kwa ndu, kakuli kwaswabisa kuli musali abulele mwa puteho.
36 Kana linzwi la Mulimu nelizwile ku mina, kamba nelifitile feela ku mina?
37 Haiba mutu unahana kuli ki mupolofita kamba kuli ufilwe mpo ya moya, yo uswanela kulemuha kuli lika zeni miñolela ki taelo ya Mulena. 38 Kono haiba mutu anyaziseza taba ye, ni yena ukanyazisezwa.* 39 Kabakaleo, mizwale baka, muzwelepili kupolofita,+ kono musike mwahanisa kubulela ka malimi.+ 40 Kono lika kaufela liezwe ka swanelo ni ka mokulukiselizwe.*+