Lisamu
Samu. Pina ya kakulo ya ndu. Samu ya Davida.
30 Nika kulumbeka, wena Jehova, kakuli unipilisize;*
Hausika tuhelela lila zaka kutabiswa ki manyando aka.+
2 Jehova Mulimu waka, nenililezi kutusiwa ki wena, mi seu nifolisa.+
3 Wena Jehova, unihohile kuzwa mwa Libita.*+
Unipilisize; unitibezi kulikelela mwa mukoti.*+
4 Muopelele Jehova milumbeko, mina batanga bahae babasepahala,+
Mulumbeke libizo lahae lelikenile;+
5 Kakuli kuhalifelwa ki yena ki kwa nakonyana feela,+
Kono kushemubiwa ki yena ki kwa nako kaufela ya bupilo.+
Manzibwana kwakona kuba ni sililo, kono kakusasana, kuba ni muhuwo wa tabo.+
6 Hane niiketile, neniize:
“Hanina kunyanganyiswa* nikamuta.”
7 Wena Jehova, hane nishemubiwa ki wena, neu nitiisize sina lilundu.+
Kono hane upatile pata yahao, nasaba hahulu.+
8 Nenisweli kuhuweleza+ ku wena Jehova;
Mi nenisweli kukupa kushemubiwa ki Jehova.
9 Kukatusañi hanika shwa, hanika shetumukela mwa mukoti?*+
Kana liluli lika kulumbeka, nji?+ Kana likabulela za kusepahala kwahao?+
10 Uniutwe, wena Jehova, mi unishemube.+
Wena Jehova, ube mutusi waka.+
11 Utahisize kuli nibine ka tabo mwa sibaka sa kulila;
Unitubuzi lisila laka la saka ni kuniapesa tabo,
12 Ilikuli niopele* milumbeko yahao mi nisike nakuza.
Jehova Mulimu waka, nika kulumbeka kuya kuile.