2 Makolonika
22 Batu babayahile mwa Jerusalema kiha bayolisa Akazia mwanaa hae yomunyinyani fa bulena, kakuli mpi ya bahapi nese itile ni Maarabe mwa mafulo mi neibulaile bahulwani bahae kaufela.+ Ka mukwa ocwalo, Akazia mwanaa Jorami akala kubusa sina mulena wa Juda.+ 2 Akazia naanani lilimo ze 22 hakala kubusa, mi abusa silimo silisiñwi inzaa li mwa Jerusalema. Libizo la mahe neli Atalia,+ muikulyaa* Omiri.+
3 Ni yena azamaya mwa linzila za ba ndu ya Akabe,+ kakuli mahe naamususuezanga kueza zemaswe. 4 Mi azwelapili kueza zemaswe mwa meeto a Jehova, sina ba ndu ya Akabe, kakuli nebabile baelezi bahae hamulaho wa lifu la ndatahe, mi bamusinya. 5 Alatelela likelezo zabona mi aya ni Jorami mwanaa Mulena Akabe wa Isilaele kuyo lwanisa Mulena Hazaele+ wa Siria kwa Ramoti-giliadi,+ mi kwateñi babalwana ka buta baholofaza Jorami. 6 Akutela kwa Jizireele+ kuyo folisa litombo zanaaholofalizwe kwa Rama hanaalwanisa Mulena Hazaele wa Siria.+
Akazia* mwanaa Jorami+ mulena wa Juda ashetumukela kwa Jizireele kuyo lekula Jorami+ mwanaa Akabe, kakuli naaholofalizwe.*+ 7 Kono Mulimu atahisa kuli Akazia atahelwe ki kozi hanaaile ku Jorami; mi hafitile, aya ni Jorami kuyo katanyeza Jehu+ muikulyaa* Nimishi, yanaatozizwe ki Jehova kuli abulaye ba ndu ya Akabe.+ 8 Jehu hakala kuatula ba ndu ya Akabe, afumana manduna ba Juda ni bana ba banabahabo Akazia, bane basebeleza Akazia, mi ababulaya.+ 9 Kihona abata Akazia; bamuswala kwa naaipatile mwa Samaria, mi bamutisa ku Jehu. Bamubulaya ni kumubuluka,+ kakuli nebaize: “Ki muikulyaa Josafati, yanaabatile Jehova ka pilu yahae kaufela.”+ Nekusina mutu ku ba ndu ya Akazia yanaanani maata a kuswala mubuso.
10 Atalia,+ mahe Akazia, habona kuli mwanaa hae ushwile, ananuha mi abulaya ba lusika lwa silena kaufela* lwa ba ndu ya Juda.+ 11 Kono Joshabeati mwana wamusizana wa mulena aanga Joasi+ mwanaa Akazia mi amuuzwa mwahalaa bana babashimani ba mulena bane banani kubulaiwa, mi amubeya mwa musiyo wa mwahali hamoho ni muleli wahae. Joshabeati mwanaa Mulena Jorami+ (neli musalaa muprisita Jehoyada+ mi naali kaizelaa Akazia) naakonile kumupata kuli asike abonwa ki Atalia, mi naasika mubulaya.+ 12 Aina cwalo ni bona anzaa patilwe kwa ndu ya Mulimu wa niti ka lilimo ze 6, Atalia inzaa busa naha.