Liñolo Labubeli Kwa Matesalonika
2 Kono ka za kubateñi kwa Mulenaa luna Jesu Kreste+ ni za kukubukanywa kwaluna ku yena,+ mizwale, lumikupa 2 kuli musike mwatuhelela minahano yamina kulyanganiswa ka bubebe kamba kufilikanywa, ibe ka pulelo ya moya*+ kamba ka linzwi la mwa mulomo kamba ka liñolo lelibonahala kuzwa ku luna, lelibulela kuli lizazi la Jehova*+ lifitile.
3 Mutu asike amiyembulula* ka mukwa ufi kamba ufi, kakuli lizazi leo halina kutaha konji pili hase kutile bukwenuheli+ mi kupatululwe mutu yasamameli mulao,+ yena mwanaa sinyeho.+ 4 Ki muhanyezi mi uipahamisa fahalimwaa mutu kaufela yabizwa mulimu kamba nto yelapelwa,* kuli mane uina mwa tempele ya Mulimu, ka kubonisa fa nyangela kuli yena ki mulimu. 5 Kana hamuhupuli kuli hane nisali ni mina, neni mibulelelanga litaba ze?
6 Mi cwale mwaziba nto yesweli kumutibela, ilikuli apatululwe ka nako yahae. 7 Ki niti, kunutu ya kusamamela mulao ko ikalile kale kusebeza,+ kono ikasebeza feela sina kunutu kuisa fakabela siyo yena yatibezi mutu yasamameli mulao. 8 Mi fo luli, mutu yasamameli mulao yo ukapatululwa, ili yo Mulena Jesu akabulaya ka moya wa mulomo wahae+ ni kumuyundisa muta kubateñi kwa Jesu+ kubonahala. 9 Kono kubateñi kwa mutu yasamameli mulao kuezahala ka maata a Satani+ ili ka musebezi kaufela omaata ni ka lisupo za buhata ni ka zekomokisa*+ 10 ni ka mufuta kaufela wa bupumi bobusika luka+ ku babashwa, kuli ibe koto ku bona kakuli nebasika amuhela ni kulata niti kuli bakone kupiliswa. 11 Ki lona libaka Mulimu hatuhelela kuli mafosisa abakeluse, kuli balumele buhata,+ 12 ilikuli kaufelaa bona baatulwe bakeñisa kuli nebasika lumela niti kono nebatabezi kusaluka.
13 Kono lutamehile kuitumela ku Mulimu kamita kabakala mina mizwale babalatwa ki Jehova,* kakuli kuzwa kwa makalelo Mulimu naamiketile+ kuli mupiliswe ka kumikenisa+ ka moya wahae ni ka kulumela kwamina mwa niti. 14 Naamibizelize kwa taba yeo, ka taba yende yelushaela, kuli mufumane kanya ya Mulenaa luna Jesu Kreste.+ 15 Ka mukwa ocwalo mizwale, muyeme inze mutiile+ mi mukumalele ku zene mulutilwe,+ ibe kuli neli ka linzwi la mwa mulomo kamba neli ka liñolo lelizwa ku luna. 16 Mi haike Mulenaa luna Jesu Kreste ni Mulimu Ndataa luna, yalulatile+ ni kulufa kuomba-ombiwa kokusa feli ni sepo yende+ ka sishemo sahae, 17 baomba-ombe lipilu zamina ni kumitiisa mwa musebezi kaufela omunde ni mwa linzwi kaufela lelinde.