Mu Sutelele Ku Mulimu
“Na, Muñaa Bupilo Mulimu wa Hao, ni ku Sweli Kwa Lizoho la Bulyo”
NDATE u bulelela mwanaa hae ha ba nze ba tula mukwakwa o patehile, kuli: “Ni swale kwa lizoho.” Mwanana yo, ha sabi bakeñisa kuli bo ndatahe ba mu sweli ka lizoho la bona le li maata. Kana mu kile mwa lakaza kuli mutu yo muñwi a mi tuse ku tula butata bo mu talimana ni bona mwa bupilo? Haiba ku cwalo, mwa kona ku omba-ombiwa ki manzwi a naa ñozwi ki Isaya.—Mu bale Isaya 41:10, 13.
Isaya naa bulelela Maisilaele manzwi ao. Nihaike kuli Mulimu naa nga sicaba sa Isilaele kuli ki “buswa” bwa hae, sicaba seo ne si potolohilwe ki lila. (Exoda 19:5) Kana sicaba sa Isilaele ne si tokwa ku saba? Jehova naa itusisize Isaya ku fa lushango lo lu omba-omba kwa sicaba sa Isilaele. Ha lu nze lu nyakisisa manzwi ao, lu hupule kuli a kona ku tusa balapeli ba Mulimu kacenu.—Maroma 15:4.
Jehova u susueza batu ba hae kuli: “Si sabi.” (Timana 10) Manzwi a, haki a mbango. Jehova u talusa libaka batu ba hae ha ba sa tokwi ku saba, ha li: “Kakuli ni na ni wena.” Ha yo kwahule, mi ha sepisi kuli u ka tusa feela batu ba hae ha ba li mwa butata. Kono u bata kuli batu ba hae ba zibe kuli u inzi kwatuko ni bona, mi u itukiselize ku ba tusa ka nako kaufela. Kana taba yeo haki ye omba-omba?
Jehova u zwelapili ku sepisa balapeli ba hae kuli: “Si bilaeli.” (Timana 10) Linzwi la Siheberu le li itusisizwe mwa timana ye, li ama kwa batu ba ba “itemauna kuli ba bone haiba ku na ni nto ye kona ku ba tahiseza kozi.” Jehova u talusa libaka batu ba hae ha ba sa swaneli ku itemauna ka sabo, ha li: “Kakuli ki Na Mulimu wa hao.” Ao ki manzwi a omba-omba luli. Jehova ki “Muambakani-ya-Pahami,” “Ya-Maata-Kaufela.” (Samu 91:1) Ka ku ba kuli Jehova Ya-Maata-Kaufela ki Mulimu wa bona, ha ba swaneli ku ba ni sabo.
Kamukwaocwalo, ki sifi seo balapeli ba Jehova ba swanela ku libelela ku yena? U sepisa kuli: “Ni ka ku tiisa ka lizoho la ka la bulyo la niti ya ka.” (Timana 10) Hape u bulela kuli: “Na, Muñaa Bupilo Mulimu wa hao, ni ku sweli kwa lizoho la bulyo.” (Timana 13) Mu nahanañi ha mu utwa manzwi ao? Buka ye ñwi i talusa kuli: “Manzwi a mwa litimana ze peli zeo ha kopanywa hamoho, a kona ku lu tusa ku beya mwa pono mushemi ni mwanaa hae. [Ndate] ha yemi feela kwatuko kuli a sileleze mwanaa hae, kono u inzi ni yena mi ha na ku tuhelela nto ifi kamba ifi ku mu kauhanya ni mwanaa hae.” Mu nahane feela taba ye, Jehova ha na ku tuhelela batu ba hae ku kauhana ni yena nihaiba ka linako ze bonahala ku ba ze taata mwa bupilo bwa bona.—Maheberu 13:5, 6.
Balapeli ba Jehova kacenu, ba kona ku omba-ombiwa hahulu ki manzwi a naa ñozwi ki Isaya. Mwa linako “ze taata, ze ziyeza” ze, mwendi fokuñwi lu kana lwa imezwa ki lipilaelo za mwa bupilo. (2 Timotea 3:1) Kono ha lu tokwi ku talimana ni lipilaelo zeo lu nosi. Jehova wa tabela ku lu tusa. Sina bana ba ba sepile mushemi wa bona, lwa kona ku swala kwa lizoho la hae le li maata ka buikolwiso bwa kuli u ka lu zamaisa mwa nzila ye lukile ni ku lu tusa mwa nako ye lu li mwa butata.—Samu 63:7, 8.