Linzwi la Mulimu Li Na ni M’ata
1 Bibele se i amile ka butuna bupilo bwa batu ba ba fita ku bolule-lule. Se i bulela si susueza hahulu ku fita nto ifi kamba ifi ye konwa ku tahiswa ki mutu (Maheb. 4:12) Ha mu talime seo i se i lu ezelize sona. Kaniti, butokwa bwa yona ha bu konwi ku bapanyiwa ni bwa buka ifi kamba ifi.
2 Lipaki za Jehova ki baituti ni bayemeli ba Bibele ba ba zwile mubano. Lu swanela k’u nga ku bala Bibele sina kalulo ya butokwa hahulu ya tukiso ya luna ya kamita ya teokratiki, ili ku beya seo mwa sibaka sa pili ku fita ku buha televishini ni lindongwamo ze ñwi kaufela za ku itabisa.
3 Mu Eze Seo Ku Ba ona Mukwa wa Kamita: Batu ba Jehova se ba fitile fa ku itebuha susuezo ye m’ata ye konwa ku tiswa ki ku bala Bibele kamita. Ka lilimo ze ñata sisupo se situna se si inzi ku o muñwi wa miyaho ya luna ya fakitori mwa Brooklyn se si susuelize bo lifitanzila ku “Bala Linzwi la Mulimu Bibele ye Kenile ka Zazi.” Lilama ba banca ba mwa lubasi lwa fa Betele ba tokwiwa ku bala Bibele mukatumbi mwahal’a silimo sa bona sa makalelo sa sebelezo ya fa Betele.
4 Ku si na taba ni kuli mu na ni ze ñata za ku eza, kana mwa zamaelela hamoho ni ku bala Bibele kwa ka viki ni viki ko ku akalelizwe ili ko ku bonisizwe mwa Tomahanyo ya Sikolo sa Bukombwa sa Teokratiki? Haiba se mu bile ni but’ata mwa ku eza seo, kiñi ha mu sa sebelezi fa ku kondolokisa lika mwahal’a November? Ku bala Bibele kwa mwahal’a kweli mukatumbi ki Samu 95-109, ili nto ye tokwa ku bala ibata i’ba makepe a mal’alu kamba a mane ka viki ni viki. Ba bañwi ba iketela ku bala hanyinyani ka zazi le liñwi ni le liñwi, mwendi ka mapakela kakusasana kamba pili ba si ka pumula kale busihu. Ku si na taba ni kuli seo mu si eza cwañi, nto ya butokwa ki kuli mu fumane lituso ze nde ze zwelela mwa ku bala Linzwi la Mulimu kamita.
5 Mu Fe Bibele Mwahal’a November: Batu ba bañata ba sa kuteka Bibele mi ba itatela ku teeleza muta lu bala ku zwelela ku yona. Mwahal’a November lu k’a fa New World Translation ni buka ya The Bible—God’s Word or Man’s? Seo si lu fa sibaka se sinde hahulu sa ku bonisa batu ba lipilu ze nde butokwa bwa Linzwi la Mulimu. Mu be ni cisehelo mwa ku eza seo.
6 Mu lukise maikuto a utwahala hande fa likalulo ze zwile mubano za New World Translation ili ze ka hoha cisehelo ya batu mwa ku ikungela yona. Mu koñomeke butokwa bwa yona mwa ku peta lika. Mwa kona ku bonisa ye ñwi ya litaba mwa kalulo ya “Bible Topics for Discussion” (Litoho za Litaba za Bibele za ku Ambolisana) mi mu swalisanise seo ni buka ya The Bible—God’s Word or Man’s? Kamba ne mu kana mw’a fa mutala ka za butokwa bwa mukoloko wa makepe a 92 wa manzwi a amilwe mwa Bibele ka ku bonisa ka m’o u koniseza mubali ku fumana mañolo a’ twaezwi. Bahasanyi ba bañwi ne ba kana ba bata ku koñomeka fa “Appendix” (Kalulo ya litaba ze Ekelizwe) kamba “Table of the Books of the Bible” (Mukoloko wa Libuka za mwa Bibele) ka ku bonisa butokwa bwa ona mwa tuto ya Bibele.
7 Mu be ni buikolwiso bwa ku bonisa kuli New World Translation i mwa Sikuwa sa cwale, ili nto ye tahisa kuli i utwahale ka bunolo. Libapanyo ze nyangumuna ni King James Version ki ze ama 1 Makorinte 10:25 ni 16:22. New World Translation i itusisa libizo la bumulimu, Jehova, ha 7,210.
8 Ee, Bibele ki Linzwi la Mulimu. Haiba lu i bala, ku i lumela, ni ku sebelisa kelezo ya yona mwa bupilo bwa luna, lu ka kutula lituso ze tuna. Ne i ñolezwi ku lu fa taelo ni sepo. (Maro. 15:4) Ki kwa butokwa hahulu kuli lu eze tatubisiso ku yona ka zazi ni zazi ni kuli lu itukiseze ku itusisa yona mwa ku luta ba bañwi.