Ku Tusa Bana ba Luna ku Zwelapili ku Ba mwa Niti—Kalulo 3: Ka Tuto ya Bibele ya Kamita
1 Kalulo 2 ya ku tatamana k’o ne i bonisize libaka bashemi ha ba sa swaneli ku liyehisa bana ku kalisa ku ba mwa sebelezo. Mutomo o mutuna wa ku tusa bana ba mina ku eza zwelopili ki mayemo a bona a kwa moya. Mi seo si itingile fa ku zamaisa kwa mina tuto ya Bibele ya lubasi ya kamita, ye buanyu. Mwa likalulo 3 ni 4 lu ka buhisana ka za kalulo yeo ya ku tusa bana ba luna ku zwelapili ku ba mwa niti.
2 Ki taba ya niti kuli haki mwana kaufela ya ka fita fa ku ba mutang’a Jehova. Seo si cwalo kakuli mutu ni mutu ka buñwi, ku si na taba ni ka mo a huliselizwe hande mwa niti, u lukela ku ikatulela isali yena kuli u tabela luli ku sebeleza Jehova. Ha lu koni ku hapeleza takazo yeo ku bona. (Mu nyakisise mitala ya bo Isaka ni Ishimaele, Jakobo ni Isau.) Ku si na taba ni ku twaezwa kwa mwa mandu ni mayemo a kwa moya a bashemi, bana fa sipimo se siñwi ba lukela ku ikatulela seo ba bata ku eza. Haiba ha ba zwelipili ku ba mwa niti, mu tuhele ku be cwalo kabakala lipilu za bona ze sa amuheli, isiñi kuli ki ku palelwa ku ba twaeza ni ku ba fa mamelelo kwa neku la bashemi ba bona ni puteho.—1 Joa. 2:19.
3 Tuto ya Bibele ya Lubasi: Kacwalo he, lu kupa bashemi ku ekeza kwa buikatazo bwa bona mwa ku etelela bana ba bona mwa ku sebeleza Jehova. Ku zamaisa tuto ya lubasi ya kamita ki kwa butokwa hahulu. (Maef. 6:4) Haiba ha mu si ka toma kale tuto ya lubasi, mu eze cwalo viki ye ku si na ku palelwa. Haiba mu zamaisa ye ñwi, mu i eze kamita ka viki ni viki. Mu si ke mwa lumeleza nto ifi kamba ifi ku filikanya yona kalulo ye ya butokwa hahulu-hulu ya musebezi wa mina wa teokratiki.
4 Hape, tuto ya mina ya lubasi ha i swaneli ku ba fela kalulo ya puzo-ni-kalabo ili ku bona haiba bana ba mina ba kona ku alaba lipuzo. I swanela ku ba ye na ni taluso ni ku ikoliwa. Mu ikolwise kuli, ka ku ya ka lilimo za bona ni buikoneli, ba kona ku talusa likalabo mwa manzwi a bona tota. Mu tatube haiba ba lumela luli seo ba si bulela ka ku ba buza lipuzo ze swana sina ze: Ki sifi se u lumela? Kana u nahana kuli seo si ka ezahala luli? Kana seo ki sona s’o bata ku eza? Mu ba tuhele ba bulele maikuto a zwelela kwa pilu ya bona. Mu si ke mwa ba nyaza haiba ba sa alabi ka mo mu tokwela, kono mu like ka mo mu konela kaufela ku fitisa niti mwa lipilu za bona. (Deut. 6:4-7) Mu beye munahano ni moyo wa mina o’ tezi ku yona kalulo yeo ya ku luta. Hape, mu kupe Jehova ketelelo ya hae kamita, sihulu ha mu ba ni butata mwa ku etelela bana ba mina mwa nzila ya niti.
5 Ku zwelela kwa bumbututu bwa bona, mu swanela ku tahisa mwa lipilu za bana ba mina takazo ye tuna ya ku sebeleza Jehova. Ka yona nzila yeo, mane ba si ka fita kale fa lilimo za buhulu ze lishumi, ba ka bata ku ba bahasanyi ba Mubuso. Mu inge kalulo yeo sina tohonolo ni sikonkwani se si makalisa, se si swanelwa ku lakaziwa hahulu. Mu si ke mwa tuhela ku tahisa yona takazo yeo ye tuna. Mubonelo wa mina tenyene kwa musebezi wa ku kutaza ki wo na ni ku ama ko kutuna. Haiba mu sa lati ku abana ku ona, mu sa fumani tabo ku ona, mu kutaza fela bakeñisa kuli ki tokwahalo, bana ba mina ba ka lemuha seo. Ha ba na ku likanyisa manzwi a mina kono ba ka likanyisa mina. Kuli mu twaeze bana ba mina, ne mu kana mwa tokwa ku itwaeza isali mina ni ku bona mubonelo wa mina tota kwa neku la ku sebeleza Jehova.
6 Musebezi wa ku Yaha: Sikonkwani sa mina ki sa ku yaha bana ba mina ku fita fa ku ba balutiwa ba Kreste. Mu lemuhe seo Paulusi a bulela kwa 1 Makorinte 3:10 kuli: “Kono mutu ni mutu a tokomele mw’a yahela.” Mi cwale u zwelapili ku bonisa kuli ne lu kana lwa yaha ka liyahiso ze si ka tiya ze si ke za ina nako ye telele, ze cwale ka likota, musuhela, ni mwange. Ka ku ama kwa mabasi, ne ku ka talusa kuli tuto, ku twaeza, ni mutala wa luna ki ze fokola. Ka ku fapahana, lu bata ku yaha bana ba luna ku fita fa ku ba batanga ba Jehova ka liyahiso ze inelela ze cwale ka gauda, silivera, kamba macwe a butokwa. Ka mubulelelo o muñwi, mu tahisa tulemeno twa butokwa hahulu to tu cwale ka tumelo, lilato, buipeyo bwa bumulimu, ni buitiiso bo bu ka susueza bana ba luna ku sebeleza Jehova ni ku zwelapili mwa sebelezo ya hae.—Mu bone Tora ya ku Libelela, ya March 1, 1985, makepe 8-12.
7 Mwa kalulo ye tatama mwa ku tatamana k’o, lu ka nyakisisa ka mwa ku tulela mikwalelo mwa ku zamaisa lituto za lubasi.