Mu Si Ke Mwa Lisela ku Bulela Taba ye Nde
1 Bakreste ba kwa makalelo ne b’a ngile bukombwa bwa bona ka butuna luli. Luka n’a bihile kuli: “Ha ba si ka lisela, ka mazazi kaufela, ku luta batu, ni ku bulela mwa Tempele ni mwa mandu kuli Jesu ki Kreste.” (Lik. 5:42) Ha ku na se ne si ka kona ku ba tibela, nihaiba nyandiso! (Lik. 8:4) Ne ba bulezi ku ba bañwi ka za niti ka zazi ni zazi.
2 Luna bo? Mu ipuze kuli: ‘Kana ni ya lemuha putako ya linako? Kana ni ya tengamezi kwa ku zwelapili ku bulela taba ye nde ku si na ku lisela?’
3 Mitala ya mwa Lizazi la Cwale ya ku Sa Lisela ku Kutaza: Kaizeli yo muñwi, ya n’a kula butuku bwa polio, n’a itingile fa ku buyela ka mushini. N’a sa koni ku ya kwa Ndu ya Mubuso kamba ku fumaneha kwa mukopano. Kono n’a patehile hahulu mwa ku bulela taba ye nde. Mwahal’a lilimo ze 37 za n’a sa koni ku kauhana ni mushini wo, n’a konile ku tusa batu ba ba eza 17 kuli ba itute niti! N’a ezize cwañi seo? Nihaike kuli n’a sa koni ku ya fa ndu ni ndu, n’a fumani nzila ya ku fa bupaki bwa ka ku tandalelwa ka zazi ku bao ba ne ba taha ku yena.
4 Mizwale ba luna kwa Bosnia se ba talimani ni ndwa ni ku sinyehelwa ki tutu. Nihakulicwalo, ba zwelapili ku kutaza ku ba bañwi kamita. Mwa Sarajevo bahasanyi se ba bile ni avareji ya lihora ze 20 ka kweli ni kweli ba nze ba bulela taba ye nde ku ba bañwi, mi ba zamaisa avareji ya lituto ze peli mañi ni mañi. Ku si na taba ni miinelo ye maswe hahulu ye ba li ku yona, ha ba liseli ku kutaza ni ku luta.
5 Ba banca ni bona ba bonisa cisehelo kwa bukombwa. Lubasi lwa Lipaki kwa Rwanda ne lu beilwe mwa muzuzu m’o masole ne ba itukiseza ku lu bulaya. Lubasi l’o lwa kupa sibaka sa kuli lu lapele pili. Ne ba filwe sibaka seo, mi mwan’a bona wa musizana, Deborah, n’a lapezi ka ku tumusa kuli: “Jehova, viki ye Bondate ni na ne lu siile limagazini ze ketalizoho. Lu ka kutela cwañi kwa batu bao ku yo ba luta niti ni ku ba tusa ku fumana bupilo?” Bakeñisa tumelo ya hae ye tiile ni lilato la hae la ku lata bukombwa, lubasi kamukan’a lona ne lu bandukile.
6 Kacenu, ku na ni tokwahalo ya ku bata sibaka sa ku fa bupaki ku ba bañwi ni ku bata bao “ba ba mwa mayemo a mande kwa neku la bupilo bo bu sa feli.” (Lik. 13:48, NW) Ka ku lumelelana ni miinelo ya fa sibaka, maeluda ba mwa puteho ba eza litukiso za ku fa bupaki bwa ka sikwata ili ka linako ze sa pitihanyi, ibe kakusasana, musihali, kamba manzibwana. Litaba ze mwa Bukombwa bwa Luna bwa Mubuso ni lingambolo za fa Mikopano ya Sebelezo, mikopano ya mupotoloho, ni mikopano ya sikiliti li fa liakalezo ni susuezo ya ka bunako ya kuli lu abane mwa likalulo ze fitana-fitana za ku fa bupaki ka za Mubuso. Fahalimu a zeo, baokameli ba mipotoloho ni ba likiliti ba twaeza bahasanyi mwa ku fa bupaki mwa makululu, ba bonisa ka mwa ku sebeleza mwa likalulo za lipisinisi, mi ba supeza linzila ze ñwi za ku fa bupaki ko ku fumanwa batu kaufela. Zeo kaufela li koñomeka ku sa lisela ku bulela taba ye nde!
7 Balutiwa ba Jesu ne ba zibahalize ka bundume kuli: “Ha lu koni ku sa bulela ze lu boni, ni ze lu utwile.” Ne ba zwezipili cwañi ku si na taba ni mikwalelo? Ne ba kupile Jehova kuli a ba tuse, mi n’a ba tusize, mi “batu kamukana ba tala Moya o Kenile, mi ba bulela Linzwi la Mulimu ba sa sabi.” (Lik. 4:20, 29, 31) Ne ku kana kwa ba kuli haki mañi ni mañi ya n’a ka ba ni ze bonwi ze zwile mubano mwa bukombwa, kono haiba lu lakaza luli ku zibahaza taba ye nde lu sa liseli mi haiba lu eza buikatazo bwa ku eza cwalo nihaiba ka zazi, Jehova u ka lu tusa.