Mu Kutaze Mubuso
1 Kwa Maheberu 10:23, lu susuezwa kuli “lu swale ka tata buipulelo bwa sepo ya luna.” Mi sepo ya luna i tomile fa Mubuso wa Mulimu. Jesu n’a laezi ka ku nonga fa taba kuli taba ye nde ya Mubuso i lukelwa ku kutaziwa mwa macaba kamukana. (Mare. 13:10) Lu tokwa ku hupula seo ha lu nze lu abana mwa bukombwa bwa luna.
2 Ha lu fita kwa batu, lu lika ku kalisa puhisano ka za nto ye ñwi ye ba tabisa kamba ye ba ama. Hañata lu bulela ka za lika ze ba ziba hande, ze cwale ka bubangoki fa silalanda, butata bwa ba banca, lipilaelo ka za ku ipilisa, kamba silikwalikwani se si mwa litaba za lifasi. Bakeñisa kuli minahano ya batu ba bañata i tomile ku kona “ku bilaela za bupilo” k’o, ha lu bonisa kuli lu ba ba iyakatwa ni ba ba utwisisa, batu hañata ba ka bulela se si mwa munahano wa bona. (Lu. 21:34) Seo ne si kana sa lu kwalulela nzila ya ku abana sepo ya luna.
3 Niteñi, haiba lu sa tokomeli, puhisano i kona ku toma fa lika ze sa weli-likamba ka ku fita fa sipimo sa kuli lu palelwe ku peta mulelo wa ku pota kwa luna—ili ku kutaza lushango lwa Mubuso. Nihaike kuli lu hohela mamelelo kwa miinelo ye maswe ye tisa liziyezi ze ñata cwana, sikonkwani sa luna ki ku libisa mamelelo kwa Mubuso, ili w’o kwa nalulelule u ka tatulula butata kamukana bwa mufuta wa mutu. Lu na ni sepo ye makaza luli ili yeo batu ba tokwa ka butuna ku utwa ka za yona. Kacwalo hailif’o kwa makalelo ne lu kana lwa buhisana miinelo ye miñwi ya “linako ze tata” ze, lu swanela ku toma mamelelo ka bubebe fa lushango lwa luna lo lu mutomo, ili “Evangeli ya linako ze sa feli.” Ka yona nzila yeo lu ka peta bukombwa bwa luna ka ku tala.—2 Tim. 3:1; 4:5; Sin. 14:6.