Kana Mu Balile Lisinyehelo?
1 Muzwale kamba kaizeli ya kulanga ka linako ze ñwi n’a kana a iketela ku ya kwa tolopo kamba naha ye ñwi kuli a y’o alafiwa. Seo ne si kana sa ba ka libaka la mapalelwi kamba muinelo wa sipatela sa fa sibaka. Hape ne ku kana kwa ba ka libaka la kuli baalafi ba ba fumaneha ha ba na ku swalisana fa taba ya mali mi kuli ku kutekiwe “tuto ya bumulimu” kwa neku la ku ambuka kwa mali, mukuli u na ni ku ya ku sili. (Lik. 15:28, 29) Haiba mukuli kamba lubasi lu keta ku eza cwalo, ki mañi ya swanela ku ikalabela ka za lisinyehelo ze amiwa? Kamba haiba mukuli ya zamaile ku ya kwa tolopo ye ñwi, wa timelela kwa sipatela ha nze a alafiwa, kana liputeho za fa silalanda ze li bukaufi hahulu ni sipatela li na ni buikalabelo kwa lisinyehelo za litukiso za sililo? Ba bañwi ne ba kana ba sa zibi hande sa ku eza. Kono ku nyakisisa liketelelo za Bibele fa buikalabelo bwa lubasi ku libisa kwa mafelelezo a latelela:
2 Lisinyehelo za Pabalelo ya Buikangulo: Bo ki buikalabelo bwa mukuli ni lubasi lwa mukuli. (Magal. 6:5; Maro. 13:8) Nihakulicwalo, lisinyehelo ha li fitelela seo lubasi lwa mba i liñwi lu kona ku lifa, f’o lubasi lwahabo lwa limba li sili, lu na ni tohonolo ya ku tusa. (Mu bapanye 1 Timotea 5:4.) Bao ba kopanyeleza bahabo bafi kamba bafi ba ba si Lipaki za Jehova. Hape, lubasi, ka tuso ya maeluda, ba ka tokwa ku tatubisisa ka ku tala litukiso lifi kamba lifi ze ezizwe ki mulonga mwa ku tusa kwa lisinyehelo zeo. Kaufel’a zona ze ze konahala li swanelwa ku batisiswa pili puteho i si ka amiwa kale ka ku matukela. Kaniti, mizwale bafi kamba bafi ba ne ba kana ba lemuha miinelo yeo ba lukuluhile ku fa ka ku itatela tuso kaufela ye ba bata ku fa. (Mu bone Ba Ba Kopanyizwe ku Peta Bukombwa bwa Luna makepe 122-3.)
3 Puteho i amiwa fela haiba ha ku na lilama ba lubasi ba ba swanela ku babalela muzwale mi konji haiba ki ya sepahalile ka nako ye telele. Niteñi, ne ku kana kwa buziwa kuli, ki puteho ifi ye lwala buikalabelo bo? Kana ki puteho ya kwa inanga mukuli kamba puteho ye li bukaufi ni sipatela m’o mukuli a ipumana ili yena cwale? Kaniti ki puteho ya kwa inanga mutu. Teñi k’o maeluda ba ziba ka za ya amiwa ni miinelo ya hae. Nihakulicwalo, mizwale ba bañwi se ba tile kwa sipatela sa mwa tolopo kamba naha ye ñwi mi se ba imelize puteho ya fa silalanda. Bona ni ba ba zamaya ni bona ha ba itaheli ni lico kamba mali. Hañata ha ba na mali a nzila a ku kuta ka ona mi puteho ye li bukaufi ni sipatela i ikutwa ku sineneketwa ku ba babalela. Se haki se si lukile kamba sa ka mañolo. Batu ba swanela ku iteekela ku itusisa maluwo afi kamba afi a ne ba kana ba ba ni ona mwa lipundumukela ze cwalo mwa sibaka sa ku ba mushimbo o tula kwa mizwale.
4 Litukiso za Butokwa: Ku ya kwa tolopo kamba naha ye ñwi kwa likalafo ki keto ya ka butu ya ku eza. Kono mizwale ha ba swaneli ku ya pili ba si ka bala kale lisinyehelo ili ku bona haiba ba kwanisa ku eza cwalo. (Mu bapanye Luka 14:28.) Kacwalo, lubasi kamba mutu ka buñwi n’a ka eza hande ku eza patisiso kwa sibaka sa bata ili ku ziba kuli u ka sinyehelwa ki bukai pili a si ka funduka kale. Haiba ki kwande a naha ki hande ku buza ofisi ya mutai. Ofisi ya mutai cwale i kona ku buza mutai wa mwa naha mo ku libilwe ili ku nga litaba ze tokwiwa ki lubasi ka za baalafi ni lipatela. Ofisi ya kona ku taluseza mutai wa mwa naha yeo ka bunako, ka za nako ya ku esha, hamohocwalo ni k’o mukuli a ka alafelwa. Ka ku fiwa litaba ze cwalo, lubasi cwale lwa kona ku zwelapili ni ba ku bonana ni lona lu nosi ni ku eza litukiso za ku shimbulukela kwa sibaka se sinca. Kaniti, litaba ze cwale ka za haiba mutu ya mwa musipili ki muhasanyi ya kolobelizwe kamba kutokwa ni kuli ki ya zibiwa ka ze nde mwa puteho ya zwa li ka tokwahala. Ka nzila yeo, Katengo ka Kutwano ni ba Sipatela ka mwa naha ye ñwi ne ka kana ka talusezwa ku itukiseza ku fa tuso ifi kamba ifi ye tokwahala, haiba ku konahala.
5 Mutu h’a ya kwa naha ye ñwi kwa likalafo h’a swaneli ku nga kuli mutai wa k’o kamba mizwale ba mwa liputeho za fa silalanda ba ka mu lifela nzila ya hae ni lisinyehelo za likalafo. Mi haiba mizwale ba fa silalanda ba sishemo hahulu kuli ba fa malobalo ku mukuli ya tuseha kamba bahabo mukuli ba ba pota, ha ku swaneli ku ngiwa kuli ki musebezi wa mizwale ba fa silalanda wa ku fa ndu ni lico za mahala, sihulu baamuheli ba kamuhelo ye nde yeo ha ba kona ku fa se siñwi ku ba ndu yeo ili ku lifa kwa lisinyehelo ze ekezehile. Mutu ha swaneli ku nga kuli baalafi ba ka alafa ku si na ku pompelwa mali haiba ne ku si ka bonanwa ni bona pili ni ku fita fa litumelelano ze ñwi za ku fa pabalelo ku si na ku pompelwa mali. Ki tiyeho hahulu ku taluseza mupazuli kuli mu yo muñwi wa Lipaki za Jehova ha se mu isiwa mwa lipazulelo.
6 Lisinyehelo za Litukiso za Sililo: Ka linako ze ñwi hamulaho wa ku ya kwa tolopo ye ñwi kwa likalafo za milyani, mukuli wa timelela k’o. Mwa libaka ze ñwi, litopa za maeluda ni batanga ba bukombwa ba ezize mafosisa a ku toma tutengo to tunyinyani to tu zamaya tu nze tu kupa linubu za kwa lisinyehelo za litukiso za sililo ku zwelela kwa mizwale ni likaizeli mwa liputeho ze li bukaufi hahulu ni sipatela. Niteñi, ku latelela liketelelo ze fa likepe 122 mwa buka ya Bukombwa bwa Luna ku ka bonisa kuli lisinyehelo za litukiso za sililo hape li wela mwatas’a ‘butokwi bwa tuso ya za kwa mubili kabakala busupali, buyanga kamba maziezi a ba sa koni ku tatulula.’ Kacwalo, likuka ze bonisizwe fahalimu mwa buka ya Bukombwa bwa Luna li sa ama kwa litukiso za sililo.
7 Ku utwisisa liketelelo ze ku ka konisa yo muñwi ni yo muñwi ku ziba sa ku eza mwa ku talima za lisinyehelo za buikangulo ni mwa ku lifela litukiso za sililo.