Mu Abane mwa Musebezi O Si Ke Wa Kutelwa ni Kamuta
1 Ka linako ze shutana mwa litaba ze ezahezi za mufuta wa mutu, ne ku li ko ne ku tokwahala kuli Jehova a fe katulo kwa lila za hae. Nihakulicwalo, bakeñisa mukekecima wa hae, n’a tahisize sibaka sa ku punyuha ku ba lipilu ze nde. (Samu 103:13) Muhato wa bona ne u sinula ze ne ka ba tahela.
2 Ka mutala, pili Munda u si ka ba teñi, ka 2370 B.C.E., Nuwe n’a li “mubuleli wa Ku Luka.” Ba ne ba timezi ne li ba ne ba hanile litemuso za bumulimu. (2 Pit. 2:5; Maheb. 11:7) Ku si ka taha kale sinyeho ya Jerusalema ka 70 C.E., Jesu n’a bonisize hande muhato o ne u ka tokwahala ku ufi kamba ufi kuli a banduke palali ye ne i ka unjama muleneñi. Kaufela ba ne ba hanile lushango lwa temuso ya hae ne ba bile mwa kozi ye tuna. (Lu. 21:20-24) Litemuso ni likatulo ze cwalo za bumulimu ne li kuta-kutezwi hañata mwa litaba ze ezahezi kaufela.
3 Musebezi wa mwa Lizazi la Cwale wa Temuso: Kale k’o Jehova n’a zibahalize kuli buhali bwa hae bu ka lukululelwa muinelo o maswe wa linto wa cwale mi ni kuli ki ba ba ishuwa fela ba ba ka pululeza. (Zef. 2:2, 3; 3:8) Nako ya ku kutaza lushango lwa temuso lo i sweli ku binduka ka bubebe! “Ñalelwa ye tuna” i fapilinyana, mi ba ba ishuwa ba sweli ba kubukanyiwa cwale. Kaniti, “masimu” a “libelezi ku kutulwa.” Kacwalo, ha ku na musebezi o muñwi o konwa ku likanyezwa ku wo kwa butokwa ni ku ba wa putako.—Mat. 24:14, 21, 22; Joa. 4:35.
4 Lu lukela ku abana mwa ku utwahaza temuso ya mwa lizazi la cwale ku ba bañwi, “niha ba utwa, niha ba sa utwi.” Wo ki musebezi o lu filwe ki Mulimu, o lu sa lukeli ku keshebisa. (Ezek. 2:4, 5; 3:17, 18) Ku ba kwa luna ni kabelo ye tezi mwa musebezi wo ku fa ponahazo ye kolwisa ya lilato la luna le li tungile ku Mulimu, buiyakato bwa luna bo bu buniti ku bomuyahwa ni luna, ni tumelo ya luna ye sa zikinyehi ku Mupulusi wa luna, Jesu Kreste.
5 Nako ya ku Nga Muhato Ki Yona Ye: Hamulaho wa likatulo za kwamulaho za Jehova, kamita bumaswe ne bu nze bu butuluha sinca bakeñisa kuli Satani ni badimona ba hae ne ba sa ipanda. Niteñi, ka nako ya cwale ku ka fapana. Susuezo ya Satani i ka feliswa. Mukosi wa mwa lifasi kaufela ka za “ñalelwa ye tuna” ye se i atumezi ha u sa tuha u tokwahala hape. (Sin. 7:4; Maro. 16:20) Lu na ni tohonolo ye ipitezi ya ku ba kalulo ya musebezi o si ke wa kutelwa ni kamuta. Ye ki yona nako ya luna ya ku ikataza ka ku fitisisa kwa neku la tohonolo ye.
6 Ka za musebezi wa hae wa ku kutaza, muapositola Paulusi, ka buikolwiso bo butuna, n’a ize: “Ha ni na mulatu mwa mali a [batu] kaufela.” (Lik. 20:26) N’a si ka ikutwa ku ba ni mulatu wa mali ka ku palelwa kufi kamba kufi ku utwahaza temuso. Kabakalañi? Kakuli n’a kona ku bulela za bukombwa bwa hae kuli: “Ki sona se ni sebeza, ni nze ni lwana.” (Makolo. 1:29) Haike lu ikole munyaka o swana wa ku abana ka ku tala ka mo lu konela kaufela mwa musebezi o si ke wa kutelwa ni kamuta!—2 Tim. 2:15.