Lipaki za Jehova—Babuleli ba Evangeli ba Niti
1 Jesu Kreste n’a file balutiwa ba hae kaufela buikalabelo bwa ku bulela evangeli, ku ba taluseza ka ku nonga kuli ba kutaze taba ye nde ya Mubuso. (Mat. 24:14; Lik. 10:42) Balutiwa ba hae ba kwa makalelo ne ba tomile mutala ku seo ka ku bulela ka za Mubuso ku si na ku lisela—isi fela kwa libaka za ku lapelela teñi kono kai ni kai ko ne ba fumana batu fa nyangela ni fa ndu ni ndu. (Lik. 5:42; 20:20) Ka ku ba Lipaki za Jehova kacenu, lu bonisize kuli lu babuleli ba evangeli ba niti, ba ba kutaza lushango lwa Mubuso mwa linaha ze 232 ili ba ba kolobelize balutiwa ba banca ba ba fitelela lule mwahal’a lilimo ze talu fela ze felile! Ki kabakalañi musebezi wa luna wa ku bulela evangeli ha u kondisize lika cwalo?
2 Taba ye Nde ya Lu Susueza: Babuleli ba evangeli ki bakutazi, kamba linumwana za taba ye nde. Kacwalo, lu na ni tohonolo ye susueza ya ku zibahaza Mubuso wa Jehova—ili yona fela taba ye nde ya luli ye konwa ku bulelelwa mufuta wa mutu o kalezwi. Lu cisehela hahulu ku zibela cimo ka za lihalimu le linca le li ka busa ka ku luka lifasi le linca la mufuta wa mutu o sepahala mwa Paradaisi ye taha. (2 Pit. 3:13, 17) Ki luna fela ba ba na ni sepo yeo, mi lu lakaza hahulu ku i abana ni ba bañwi.
3 Lilato la Niti la Lu Susueza: Ku bulela evangeli ki musebezi o pilisa bupilo. (Maro. 1:16) Ki lona libaka ha lu fumana tabo ye tuna mwa ku hasanya lushango lwa Mubuso. Ka ku ba babuleli ba evangeli ba niti, lu lata batu, mi seo si lu susueza ku abana taba ye nde ni bona—mabasi a luna, bomuyahwa ni bona, balikani ba luna, ni ba bañwi kaufela mo ku konahalela kaufela. Ku eza musebezi wo ka moyo kaufela ki nzila ye nde ka ku fitisisa yeo ka yona lu kona ku bonisa lilato la luna ku ba bañwi.—1 Mates. 2:8.
4 Moya wa Mulimu wa Lu Yemela: Linzwi la Mulimu li lu kolwisa kuli ha lu eza musebezi wa luna wa ku cala ni ku selaela peu ya Mubuso, ki Jehova “ya melisa.” Seo ki sona luli se lu bona si ezahala mwa kopano ya luna kacenu. (1 Makor. 3:5-7) Ki moya wa Mulimu o lu yemela mwa musebezi wa luna wa ku bulela evangeli mi u lu tahiseza ku u kondisa hahulu.—Joe. 2:28, 29.
5 Ka ku beya mwa munahano susuezo ya kwa 2 Timotea 4:5 ya ku “[eza] musebezi wa mubuleli wa Evangeli,” mi kabakala lilato la luna la ku lata batu kaufela haike lu susuezwe ku abana taba ye nde ya Mubuso ye tabisa fo lu fumanela sibaka kaufela, ka sepo ya kuli Jehova u ka zwelapili ku fuyaula musebezi wa luna.