“[Jehova, NW] ki Yena ya Ni Tusa”

¹ Jesu ha n’a file balutiwa ba hae ba pili musebezi, n’a ba bulelezi kuli: “Cwalehe, ni mi luma inge lingu mwahal’a litongwani.” (Mat. 10:16) Kana seo ne si ba tahiselize sabo ni ku tuhela? Kutokwa. Ne ba bile ni mubonelo wa n’a talusize muapositola Paulusi hasamulaho ha n’a bulelela Bakreste sina yena kuli: “Lu ka bulela ka pilu ye tiile, lu li: Mulena ki Yena ya ni tusa, ha ni sabi se siñwi; Mutu s’a ka ni eza ki nto mañi?” (Maheb. 13:6) Ne ba tabile kuli ne b’a ngiwa ku ba ba swanela ku shubulwa kabakala libizo la Jesu, mi ne ba zwezipili ku luta ni ku zibahaza taba ye nde ku si na ku lisela.—Lik. 5:41, 42.

² Kacenu musebezi wa ku kutaza mwa lifasi kamukana se u li kwa mafelezo a ona. Mane sina mwa n’a bulelezi cimo Jesu, lu toilwe ki macaba kaufela. (Mat. 24:9) Musebezi wa luna wa ku kutaza u lwanisizwe ni ku sheununwa, mi mwa likalulo ze ñwi za lifasi-mubu, mane u yemisizwe. Ha ne lu katokwa tumelo, ne lu ka ba ni sabo. Nihakulicwalo, ku ziba kuli Jehova ki Yena ya lu tusa kwa lu wetulusa ni ku lu tiisa kuli lu tundamene.

³ Bundume ki muinelo wa ku tiya, ku sa saba. Ki fapahano ya sabo, boi, bupyeha. Balutiwa ba Jesu kamita se ba tokwile bundume kuli ba itiise. Ki kwa butokwa hahulu kuli lu pime ku filikanyiwa ki mibonelo ni likezo za lifasi le li li sila ku Mulimu. Kwa lu susueza hakalo ku nahana ka za mutala o munde hahulu wa Jesu, yena ya tuzi lifasi! (Joa. 16:33) Hape, mu hupule ka za baapositola bao ha ne ba talimani ni litiko ze maswe hahulu ne ba zibahalize ka bundume kuli: “Ki swanelo kuli lu utwe Mulimu ku fita batu.”—Lik. 5:29.

⁴ Ha Lu Yo ku Ba ba Kutela Mwamulaho: Lu swanela ku lika ka t’ata ku zwelapili ku ba ni mubonelo o munde wa musebezi wa luna. (Maheb. 10:39) Kamita lu hupule kuli lu lumilwe ki Jehova ka ku ba poniso ya lilato ni mufelañeke wa hae kwa mufuta wa mutu kaufela. Ni kamuta ha tokwi batanga ba hae ku eza nto ye sa tusi se siñwi. Nto kaufela ye lu filwe ku eza kwa nalulelule i ka tisa ze nde ku ba ba lata Mulimu.—Maro. 8:28.

⁵ Mubonelo o munde u ka lu tusa ku zwelapili ku bata ba ba swana sina lingu mwa kalulo ya luna ya simu. Lu kana lwa bona ku sa iseza pilu kwa batu ku ba poniso ya ku zwafa ni kutokwa sepo. Haike lilato la luna li lu susueze ku ba ni makeke ni pilu-telele. Nako kaufela yeo lu siyalisa hatiso kamba ku lemuha cisehelo ye ñwi, sikonkwani sa luna si swanela ku ba sa ku eza musipili wa makutisezo ka bubebe ni ku zusulusa cisehelo ye ekezehile. Ni kamuta lu si ke lwa kakanya buikoneli bwa luna bwa ku kalisa tuto ya Bibele kamba ku ba ni buanyu mwa ku i zamaisa. Kono, lu swanela ku kupa tuso ni ketelelo ya Jehova kamita ni ka tapelo, ka sepo ye tiile ya kuli u ka lu tusa.

⁶ Lu lumela ka ku tiya kuli Jehova u ka etelela mwa ku petahala kwa musebezi. (Mu bapanye Mafilipi 1:6.) Ku mu sepa ka ku tala kwa luna sina Mutusi wa luna kwa lu tiisa, ilikuli “lu si ke lwa katala ku eza hande.”—Magal. 6:9.