LIFASI LITALIMANA NI MIINELO YETAATA

1 | Musileleze Buiketo Bwamina Bwa Kwa Mubili

LIBAKA KUEZA CWALO HAKULI KWA BUTOKWA

Miinelo yetaata kamba likozi likona kuluziyeza ka linzila zeshutana-shutana.

Nto yemaswe haiezahala, batu babanga ni lipilaelo zeñata, mi batu bababanga ni lipilaelo ka nako yetelele bakulanga.
Miinelo yetaata ikona kutahisa kuli bakuli basike bababalelwa hande mwa lipatela ni kuli basike bafumana milyani yeswanela.
Miinelo yetaata ikona kutahisa kuli batu bapalelwe kuba ni masheleñi a kulifela lika zebatokwa hahulu zecwale ka lico ni milyani.

Zemuswanela Kuziba

Matuku amatuna ni lipilaelo likona kutahisa kuli mueze likatulo zemaswe ili zekona kumipalelwisa kusileleza hande buiketo bwamina bwa kwa mubili. Mi nto yeo ikona kutahisa kuli muekeze feela kwa butuku bwamina.
Haiba musaikalafi, butuku bwamina bwakona kutotobela kamba mane mwakona kushwa.
Haiba muba ni buiketo bwa kwa mubili, mukakona kueza likatulo zende hamutalimana ni miinelo yetaata.
Ibe kuli mu babotana kamba mu bafumi, kunani lika zemukona kueza kuli musileleze buiketo bwamina bwa kwa mubili.

Zemukona Kueza

Mwa miinelo yekonahala, mutu ya butali ulemuhanga likozi zekona kuezahala, mi uezanga sesiñwi kuli aisileleze. Taba yeo iama ni kwa buiketo bwa mubili. Hañata, halukenisa mibili yaluna ni libaka zaluna, haluna kuyambula matuku ka bunolo kamba kukula hahulu. Silelezo ki ya butokwa kufita kalafo.

“Ka kukenisa ndu yaluna ni kukenisa mibili yaluna, halukula-kulangi hahulu mi halusinyezangi masheleñi amañata kwa kuleka milyani.”—Bo Andreas.a

a Mabizo amañwi aitusisizwe mwa magazini ye acincizwe.

MOMUKONA KUTIYELA MIINELO YETAATA—Lika Zekona Kumitusa

Hamutalimana ni miinelo yetaata, musileleze buiketo bwamina bwa kwa mubili ka kueza lika zelatelela

MUBE NI MAKETE

Mube ni makete

Bibele ibulela kuli: “Yabutali ubona kozi mi waipata.” (Liproverbia 22:3) Mulike kulemuha ni kuambuka lika zekona kutahisa kuli muyambule matuku.

Mutapange kwa mazoho kamita ka kuitusisa mulola ni mezi, sihulu pili musika swala kale lico kamba hamulaho wa kuitusa simbuzi.
Mukenisange ni kuitusisa milyani ye bulaya maikolokuwawa mwa ndu ya mina kamita, sihulu fa libaka ni lika zeswaliwanga hahulu.
Mwa miinelo yekonahala, muambuke kubanga bukaufi hahulu ni batu babanani butuku bobuyambukela.

MUCANGE LICO ZENDE

Mucange lico zende

Bibele ibulela kuli: “Hakuna muuna yakile atoya mubili wahae, kono waufepa ni kuukatelwa.” (Maefese 5:29) Lubonisa kuli lwalata mibili yaluna ka kutokomela lika zeluca ni zelunwa.

Munwange mezi amañata.
Mucange miselo ni miloho yeshutana-shutana.
Musike mwacanga hahulu lika zenani mafula, zenani lizwai leliñata, ni zenani shuga yeñata.
Musike mwazubanga kwai, kunwa hahulu bucwala, kamba kuitusisa maswe milyani yekola.

“Kuli lusike lwakula-kula, na ni bakuluna lulikanga kuca lico zende; hakusi cwalo, neluka sinyezanga masheleñi aluna kwa kuleka milyani. Neluka tabela kuitusisa masheleñi aluna kwa kuleka lico zetusa mwa mubili.”—Bo Carlos.

MUEZANGE LIPAPALI ZETIISA MIBILI NI KUPUMULA

Muezange lipapali zetiisa mibili

Bibele ibulela kuli: “Ki hande kupumula hanyinyani kufita kubeleka hahulu ka taata ni kumatisa moya.” (Muekelesia 4:6) Lutokwa kubanga ni nako ya kubeleka ni nako ya kupumula.

Muezange lipapali zetiisa mibili. Mwakona kukala ka kuzamaya-zamayanga. Kueza lipapali zetiisa mubili kwakona kumitusa kuba ni buikangulo bobunde bwa kwa mubili nihaike kuli mu basupali, mu liyanga, kamba mukula butuku bobusina kalafo.
Mupumulange

Mubange ni nako yeñata ya kupumula. Haiba musabi ni nako yeñata ya kupumula, mukaba ni lipilaelo zeñata hahulu mi mukapalelwa kuisa pilu kwa lika. Haiba musabi ni nako ya kupumula ka nako yetelele, mwakona kukula.
Mutome nako yende yemuka lobalanga, mi mulobalange ka nako ona yeo. Mulobalange ni kuzuha ka nako yeswana zazi ni zazi.
Muambuke kubuhanga TV kamba kuitusisa ma foni ka nako ya kulobala.
Muambuke kucanga hahulu, kunwa lino zenani caffeine, kamba kunwa bucwala pili musika lobala kale.

“Nilemuhile kuli kulobala kuamanga buiketo bwaka bwa mubili. Haiba nisabi ni nako yelikani ya kulobala, niikutwanga kuopa toho ni kuikutwa mabote. Kono haiba niba ni nako yelikani ya kulobala, niikutwanga hande ni kuli nakona kueza nto ifi kamba ifi yenibata kueza! Nibanga ni maata mi hanikula-kulangi.”—Bo Justin.