Molutusezwa Halulatelela Ketelelo ya Mulimu

KULI luswalisane kueza tato ya Jehova, luswanela kulatelela ketelelo ya Mulimu, yena Mubusi wa Pupo Kamukana. Lwaziba kuli Mwanaa hae ki yena toho ya puteho ya Sikreste mi lutokwa kuutwa baba luetelela mwa likalulo zeñwi za bupilo bwaluna. Kulatelela ketelelo yalukisize Mulimu kwalutusa kaufelaa luna.

² Taba ya kuipeya kwatasaa babaetelela neizibisizwe batu lwapili mwa simu ya Edeni. Taba yeo neitalusizwe mwa litaelo za Mulimu ze kwa Genese 1:28 ni Genese 2:16, 17. Lifolofolo nelinani kuipeya kwatasaa batu, mi bo Adama ni Eva nebanani kueza tato ya Mulimu ni kuipeya kwatasaa bubusi bwahae. Kuipeya kwatasaa puso ya Mulimu nekuka tahisa kozo mi lika nelika zamaya hande. Sikuka sesibonisa kuli mañi ni mañi unani toho yahae sibulezwi hasamulaho kwa 1 Makorinte 11:3. Muapositola Paulusi naañozi kuli: “Nibata kuli muzibe kuli toho ya muuna kaufela ki Kreste; mi toho ya musali ki muuna; mi toho ya Kreste ki Mulimu.” Taba yeo ibonisa kuli kwandaa Jehova, mañi ni mañi uswanela kuipeya kwatasaa toho yahae.

³ Batu babañata kacenu habazibi kamba habalateleli sikuka sa butoho. Kabakalañi? Butata nebukalezi mwa Edeni muta bashemi baluna nebaitukuluzi ka bomu kwa bubusi bwa Mulimu Yapahami ka Kufitisisa. (Gen. 3:4, 5) Kono nebasika fumana tukuluho yetuna. Bakala kubusiwa ki sibupiwa sa moya sesimaswe, yena Satani Diabulosi. Bukwenuheli bwapili bo, nebutahisize kuli batu babe kwahule ni Mulimu. (Makolo. 1:21) Kabakaleo, buñata bwa batu kacenu bazwelapili kuba mwa maata a yamaswe.—1 Joa. 5:19.

⁴ Ka kuituta niti ya Linzwi la Mulimu ni kusebelisa litaba zeluituta mwa bupilo bwaluna, lukonile kuitukulula mwa maata a Satani. Ka kuba Lipaki babaineezi ni kukolobezwa, luunga Jehova kuba yena Mubusi waluna yapahami. Lulumelelana ni Mulena Davida, yanaabulezi kuli Jehova ki yena “toho ya batu kaufela.” (1 Makol. 29:11) Kaniti, lubulela ka buikokobezo kuli: “Muzibe kuli Jehova ki Mulimu. Ki yena yalubupile, mi luna lu bahae. Lu batu bahae mi lu lingu za mwa mafulisezo ahae.” (Samu 100:3) Lwalumela kuli Jehova ki yapahami mi luswanela kuipeya kwatasaa hae ka kutala, kakuli ki yena yabupile lika kaufela. (Sin. 4:11) Ka kuba likombwa za Mulimu wa niti, lulatelela Jesu Kreste, yalutomezi mutala omunde hahulu wa kuipeya kwatasaa Mulimu.

⁵ Jesu naaitutileñi kwa manyando anaakopani ni ona hanaali fa lifasi? Maheberu 5:8 ialaba kuli: “Niha naali mwana, naaitutile kuutwa kabakala manyando anaakopani ni ona.” Kaniti, Jesu naazwezipili kusepahala ni kuipeya kwatasaa Ndatahe wa kwa lihalimu niha naakopani ni manyando. Hape, Jesu naasika eza nto niyekana ka ili yena. Naasika ipulelela feela litaba zahae; mi naasika ipatela kanya. (Joa. 5:19, 30; 6:38; 7:16-18) Mwa bukombwa bwahae, naatabela kueza tato ya Ndatahe, nihaike kuli kueza cwalo nekutahisize kuli alwaniswe ni kunyandiswa. (Joa. 15:20) Nihakulicwalo, Jesu naaipeile kwatasaa Mulimu. Jesu ‘naaikokobelize’ mane kuisa kwa “lifu la fa kota ya linyando.” Bakeñisa kuli Jesu naaipeile kwatasaa Jehova ka kutala, batu banani sepo ya kupila kuya kuile, ufilwe situlo sesipahami, mi ukanyisize Ndatahe.—Mafil. 2:5-11; Maheb. 5:9.

MOLUKONA KUBONISEZA KULI LWAIPEYA KWATASAA KETELELO YA MULIMU

⁶ Haiba luipeya kwatasaa ketelelo ya Mulimu ka kueza tato yahae, haluna kuba ni lipilaelo zeñata zebabanga ni zona batu babahana kubusiwa ki Jehova kamba kutalimana ni miinelo yetaata yebatalimana ni yona. Sila saluna, yena Diabulosi uzwelapili kubata linzila zaka lumiza ka zona. Kuli lusilelezwe ku yamaswe yo, luswanela kumuhanela ni kuikokobeza fapilaa Jehova ka kuipeya ku yena ka pilu kaufela.—Mat. 6:10, 13; 1 Pit. 5:6-9.

⁷ Mwa puteho ya Sikreste, luswanela kulemuha kuli Kreste ki yena toho mi ufile maata ku “mutanga yasepahala yanani kutwisiso.” Kulemuha taba yeo kulutusa kubonisa moya omunde ku babañwi ni kupilisana hande ni bona. Haiba lulatelela ketelelo ya Mulimu mwa puteho, lukasusuezwa kumamela Linzwi la Mulimu mwa likalulo kaufela za bulapeli bwaluna. Lukabonisa kuli luipeya kuutwa ka moluezeza bukombwa bwaluna, ka kufumaneha kwa mikopano ni kualaba, ka kuswalisana ni baana-bahulu, ni kulatelela litukiso za kopano.—Mat. 24:45-47; 28:19, 20; Maheb. 10:24, 25; 13:7, 17.

⁸ Kuipeya kwatasaa ketelelo ya Mulimu kulutusa kuikola kozo ni buiketo, mi kutusa kuli lika lizamaye hande mwa puteho ya Sikreste. Batu babaipeya kwatasaa zamaiso ya Jehova babonisanga tulemeno twahae. (1 Makor. 14:33, 40) Zeluiponezi mwa kopano ya Jehova litahisa kuli lubulele manzwi aswana ni anaabulezi Mulena Davida. Davida hasaaboni fapahano ye mwahalaa batanga ba Jehova ni batu babamaswe, naabulezi ka tabo kuli: “Tabo ki ya batu bao Jehova ali Mulimu wabona!”—Samu 144:15.

⁹ Mwa linyalo ni mwa lubasi, “toho ya musali ki muuna.” Kono hape baana banani kuipeya kwatasaa Kreste, mi toho ya Kreste ki Mulimu. (1 Makor. 11:3) Basali balukela kuipeya kwatasaa baana babona, mi bana balukela kuipeya kwatasaa bashemi babona. (Maef. 5:22-24; 6:1) Kubanga ni kozo haiba yomuñwi ni yomuñwi mwa lubasi alatelela sikuka seo sa butoho.

¹⁰ Muuna uswanela kulikanyisa Kreste ka kuba toho ya lubasi yalilato. (Maef. 5:25-29) Haiba asaitusisi maswe buikalabelo bwahae bwa kuba toho ya lubasi kamba asatuheli kubupeta, musalaa hae ni bana bakatabela kuipeya kwatasaa hae. Musali ki mutusi wa muuna. (Gen. 2:18) Ka kutusa muunaa hae ka pilu-telele ni kumukuteka, musali ukalatiwa ki muunaa hae ni kulumbekisa Mulimu. (1 Pit. 3:1-4) Baana ni basali habalatelela kelezo ya mwa Bibele ya kuipeya kwatasaa toho yabona, batomela bana babona mutala wa kuipeya kwatasaa ketelelo ya Mulimu.

¹¹ Kuipeya kwaluna kwatasaa ketelelo ya Mulimu kuama hape moluungela “milonga,” yeinzi “mwa libaka zayona zeshutana-shutana ka tumelezo ya Mulimu.” (Maro. 13:1-7) Bakreste balifanga mitelo kakuli bakuteka milao ya naha yebapila ku yona, mi ka kueza cwalo, bakutiseza ‘Sesare zeli za Sesare, kono bakutiseza Mulimu zeli za Mulimu.’ (Mat. 22:21) Hape, habakwahela kalulo ya simu, litaba zebañolanga lilumelelananga ni milao ya mwa sibaka ya mwakuitusiseza litaba. Haiba luipeya kwatasaa babaketilwe kuli baluzamaise ni kulatelela lika kaufela zeba lubulelela, ibile feela lisalwanisani ni mulao wa Jehova olukile, haluna kunyandiswa hahulu ki ba mulao, mi lukakona kuitusisa maata aluna mwa musebezi wa kukutaza.—Mare. 13:10; Lik. 5:29.

¹² Kuipeya kwatasaa ketelelo ya Mulimu kuama mupilelo waluna kaufela. Lunyolezwi nako yeo batu kaufela bakaipeya kwatasaa ketelelo ya Jehova Mulimu. (1 Makor. 15:27, 28) Jehova ukafuyaula batu kaufela babazwelapili kubonisa kuli balata bubusi bwahae ni babaipeya kwatasaa ketelelo yahae kuya kuile!