Mutanga Yanaautwile Mulimu

Josefa neli yomuñwi wa bana ba Jakobo ba banana babashimani. Bahulwani bahae balemuha kuli Jakobo naalata hahulu Josefa. Munahana kuli nebaikutwile cwañi ka za taba yeo? Nebautwela muna Josefa mi neba mutoile. Josefa hanaalolile litolo, naalitaluselize bahulwani bahae. Nebanahana kuli litolo zeo nelitalusa kuli zazi leliñwi nebaka mukubamela. Mi bamutoya hahulu ni kufita!

Zazi leliñwi bahulwani ba Josefa nebasweli kulisa lingu bukaufi ni muleneñi wa Sikemi. Jakobo aluma Josefa kuli ayo bona haiba bahulwani bahae baiketile. Bamubona asali kwahule mi babulelisana bali: ‘Muloli wa litolo ki yo wataha. Halu mubulayeñi!’ Bamuswala mi bamuyumbela mwa musima otungile. Kono Juda, yomuñwi wa bahulwani bahae, kihaa li: ‘Musike mwa mubulaya! Halu mulekiseñi kuli ayoba mutanga.’ Kacwalo, balekisa Josefa ka lishekele za silivera ze 20 kwa balekisi ba Mamidiani bane baya kwa Egepita.

Hasamulaho, bahulwani ba Josefa bacupwa siapalo sahae mwa mali a puli, mi kihona baisa siapalo seo ku ndataa bona, mi bali: ‘Kana se haki siapalo sa mwanaa hao?’ Jakobo naanahana kuli Josefa naabulailwe ki sibatana. Naautwile hahulu butuku kwa pilu. Hakuna yanaakona kumuomba-omba.

Mwa Egepita, Josefa naalekisizwe sina mutanga ku Potifaro, ili yanaanani situlo sesituna. Kono Jehova naali ni Josefa. Potifaro abona kuli Josefa naakondisa misebezi yahae mi nakona kumusepa. Hamulaho wa nakonyana, Josefa afiwa musebezi wa kubabalela lika kaufela zanaaluwile Potifaro.

Musalaa Potifaro alemuha kuli Josefa neli yomunde mi naatiile. Zazi ni zazi naakupanga Josefa kuli alobale ni yena. Ki lika mañi zanaaka eza Josefa? Ahana mi ali: ‘Batili! Hanikoni kueza mafosisa a cwalo. Mulenaaka unisepile, mi wena u musalaa hae. Haiba nilobala ni wena, nikafoseza Mulimu!’

Zazi leliñwi musalaa Potifaro ahapeleza Josefa kuli alobale ni yena. Kihaa muswala kwa siapalo, kono yena amata. Potifaro hanaakutile kwanaaile, musalaa hae amutaluseza kuli Josefa naamutundanisize. Naasabuleli niti. Potifaro naanyemile hahulu mi akenya Josefa mwa tolongo. Kono Jehova naasika libala Josefa.