Jehoyada Ubonisa Bundume

Jezabele naanani mwana wamusizana yanaabizwa Atalia, ili yanaanani situhu sina mahe. Atalia naanyezwi ki mulena wa Juda. Muunaa hae hasaashwile, mwanaa hae wamushimani akala kubusa. Kono mwanaa hae hasaashwile, Atalia aipeya fa bulena kuli abuse Juda. Cwale abulaya bana ba mulena kaufela, abulaya mutu kaufela yanaakona kuba mulena mwa sibaka sahae, mane nihaiba baikulu bahae. Batu kaufela neba musaba.

Muprisita Yapahami Jehoyada ni musalaa hae, Jehosheba, nebaziba kuli zanaaeza Atalia neli zemaswe hahulu. Nebabeile bupilo bwabona mwa lubeta ka kupata yomuñwi wa baikulu ba Atalia, ili mbututu yenebizwa Joasi. Bamuhuliseza kwa tempele.

Joasi hanaanani lilimo ze 7, Jehoyada akopanya manduna ni Malivi hamoho mi ali ku bona: ‘Mulibelele fa minyako ya tempele, mi musike mwalumeleza mutu ufi kamba ufi kukena mwahali.’ Cwale Jehoyada abeya Joasi fa bulena kuli abuse Juda mi amubeya kuwani ya bulena kwa toho yahae. Batu ba mwa Juda kihaa bahuwa kuli: ‘Mulena apile kuya kuile!’

Muoli Atalia autwa muhuwo wa batu mi amatela kwa tempele. Hanaaboni mulena yomunca, ahuwa kuli: “Ki petuhelo! Ki petuhelo!” Manduna baswala muoli yamaswe, bamuisa kwande, mi bamubulaya. Kono kucwañi ka za kukuezo yahae yemaswe yanaatahisize mwa naha?

Jehoyada naatusize batu kueza tumelelano ni Jehova, mi batu basepisa kusebeleza feela Jehova. Jehoyada ataluseza batu kusinya tempele ya Baale ni kupwaca milimu ya maswaniso buemba-emba. Naaketile baprisita ni Malivi kuli basebeleze kwa tempele ilikuli batu bakone kulapela Jehova kwateñi hape. Naalaezi balibeleli ba minyako kulibelela tempele ilikuli mutu yanani masila asike akena mwateñi. Cwale Jehoyada ni manduna baisa Joasi kwa ndu ya mulena mi bamubeya mwa lubona. Batu ba Juda bataba hahulu. Nebakona kusebeleza Jehova, mi nebalukuluzwi ku Atalia ya situhu ni kwa bulapeli bwa Baale. Kana mulemuhile mo bundume bwanaabonisize Jehoyada nebutuselize batu babañata?