Josiasi Naalata Mulao wa Mulimu

Josiasi naabile mulena wa Juda hanaanani lilimo ze 8. Mwa linako zeo, batu nebaezanga mabibo ni kulapela milimu ya maswaniso. Josiasi hanaanani lilimo ze 16, aituta mwakulapelela Jehova ka nzila yelukile. Hanaanani lilimo ze 20, akala kusinya milimu ya maswaniso ni lialetare mwa naha kaufela. Mi hanaakwanisize lilimo ze 26, alukisa kuli tempele ya Jehova iyahiwe sinca.

Mwa tempele, muprisita yapahami Hilikia, afumana muputo mone kuñozwi Mulao wa Jehova—mwendi neli muputo one uñozwi ki Mushe. Muñoli wa mulena ili yena Shafani atisa muputo ku Josiasi mi akala kubala Mulao ka kutumusa. Josiasi hanaanze ateeleza, alemuha kuli batu nebasa mameli milao ya Jehova ka lilimo zeñata. Mulena Josiasi ki haali ku Hilikia: ‘Jehova ulunyemezi hahulu. Zamaya uyo mukupa. Jehova uka lutaluseza zeluswanela kueza.’ Jehova aalaba ka kuitusisa mupolofita wa musali yabizwa Hulida kuli: ‘Batu ba Juda banifulalezi. Bakafiwa koto kono isiñi ka nako yabusa mulena Josiasi kakuli yena uikokobelize.’

Mulena Josiasi hanaautwile manzwi ao, aya kwa tempele mi akopanya batu ba mwa Juda kaufela. Mi abalela sicaba kaufela Mulao wa Jehova ka kutumusa. Josiasi ni batu bahae baitama kuutwa Jehova ka lipilu zabona kaufela.

Sicaba sa Juda nesisika eza mukiti wa Paseka ka lilimo zeñata. Kono Josiasi amano bala mwa Mulao kuli Paseka iswanela kueziwa feela hañwi ka silimo, abulelela sicaba kaufela ali: ‘Lukaezeza Jehova Paseka.’ Cwale Josiasi alukisa kuli baeze matabelo amañata ni kuli kube ni sikwata sa baopeli kwa tempele. Cwale sicaba saeza mukiti wa Paseka one ulatelezwi ki Mukiti wa Linkwa Zesikaya Mumela one utandile mazazi a 7. Nekusika ezwa kale fateñi mukiti wa Paseka oswana sina wo kuzwa feela mwa mazazi a Samuele. Josiasi naalata hahulu Mulao wa Mulimu. Kana mwaikolanga kuituta ka za Jehova?