Mamota A Jerusalema

Halunyakisiseñi zeneezahezi lilimonyana pili mamota a Jerusalema asika fezwa kale kuyahiwa. Nehemia, mutangaa Mulena Aritazerisi, neli Muisilaele yanaapila mwa muleneñi wa Shushani mwa Peresia. Muhabo Nehemia yanaazwa kwa Juda ato biha taba yeñwi yemaswe, ali: ‘Batu babakutezi kwa Jerusalema habayo mwa buiketo. Mamota a muleneñi ni minyako yaona zene basinyize Mababilona halisika yahiwa kale sinca.’ Nehemia aikutwa hahulu bumaswe. Naabata kuya kwa Jerusalema kuyo tusa, kacwalo alapela kuli mulena amulumeleze kuya.

Hamulaho, mulena alemuha kuli Nehemia naabonahala kulembwala. Kihaa li ku yena: ‘Hanisika kubona kale inze ubonahala cwana. Kiñi zefosahalile?’ Nehemia ali: ‘Nikona kupalelwa cwañi kuswaba haili fo Jerusalema wona muleneñi wahesu usinyehile?’ Mulena amubuza kuli: ‘Kiñi zeubata kuli nikuezeze?’ Honafo feela, Nehemia alapela mwa pilu. Hasamulaho, aalaba kuli: ‘Nikupa kuli unilumeleze kuya kwa Jerusalema kuli niyo yaha sinca mamota ayona.’ Mulena Aritazerisi abulelela Nehemia kuli wakona kuya, mi abona teñi kuli Nehemia wasilelezwa mwa musipili omutelele wo. Hape abeya Nehemia kuli abe mubusisi wa Juda mi amufa mulamu wa minyako ya muleneñi.

Nehemia hafita mwa Jerusalema, atatuba mamota a muleneñi. Hamulaho, akopanya baprisita ni babusi mi ali ku bona: ‘Muleneñi usinyehile hahulu. Luswanela kukala kusebeza.’ Batu balumela, mi bakala kuyaha sinca mamota.

Kono lila zeñwi za Maisilaele bakala kubasheununa, mi bali: ‘Luwawa lwakona kuwisa mamota emusweli kuyaha.’ Babeleki nebasika isa pilu kwa batu bane babasheununa, kono bazwelapili kuyaha. Limota laba lelitelele hahulu mi latiya.

Lila zalela kulwanisa Jerusalema ka kuzwelela mwa libaka zeshutana-shutana mi nelibata kueza cwalo kuli litaseze muleneñi ka sipundumukela. Majuda hane bautwile taba yeo, basaba maswe. Kono Nehemia ali ku bona: ‘Musike mwasaba. Jehova uinzi ni luna.’ Akupa bakanteli kuli basileleze babeleki, mi lila zapalelwa kubataseza.

Mwa mazazi a 52 feela, bafeza kuyaha mamota ni minyako yaona. Nehemia atisa Malivi kaufela mwa Jerusalema kuli bato eza kakulo. Aba alula mwa likwata zepeli za baopeli. Bakambama fa mamota ka kuitusisa Munyako wa Liweluwelu mi bacaula kuya kwa lineku leliñwi la muleneñi. Baliza litolombita, likambeliso, ni liharepa mi baopelela Jehova. Ezira aya ni sikwata sesiñwi, mi Nehemia aya ni sesiñwi, kufitela bakopana hamoho kwa tempele. Batu kaufela, ili baana, basali, ni banana, bafa matabelo ku Jehova mi baikola mukiti. Mulumo wa manzwi abona neukona kuutwahala mutu inze ali kwahule.