“Mu Itiise mwa Lipilu za Mina”

“Mu swanezi ku tundamena ku eza se si latwa ki Mulimu, ni kuli mu fiwe se mu sepisizwe.”—MAHEBERU 10:36.

1, 2. (a) Ne ku ezaheziñi kwa Bakreste ba bañata mwa lilimo za mwanda wa pili? (b) Tumelo i kona ku fokolelañi ka bunolo?

KWA bañoli kaufela ba Bibele, ki muapositola Paulusi fela ya bulezi hañata-ñata ka za tumelo. Mi hañata, n’a bulela ka za ba ne ba na ni tumelo ye fokozi kamba ye shwile. Sina ka mutala, Imenea ni Alexandere ne ba “lwelile ka za tumelo.” (1 Timotea 1:19, 20) Demasi n’a fulalezi Paulusi kakuli “[n’a] lata lifasi la cwale.” (2 Timotea 4:10) Ba bañwi, ne ba “latuzi tumelo” ka likezo za bona ze si za Sikreste ili za ku sa ikalabela. Ba bañwi ne ba “keluhile tumelo” kabakala ku pumiwa ki se ne ba li ki butali.—1 Timotea 5:8; 6:20, 21.

² Ki kabakalañi Bakreste ba ba tozizwe bao ha ne ba palezwi cwalo? “Tumelo ki ku sepa ka ku tiya ze lu libelezi, ni ku kolwa ze sa bonwi.” (Maheberu 11:1) Lu bonisa tumelo mwa nto ye lu sa boni. Ha lu i tokwi kwa lika ze bonwa. Ku bunolo ku sebeleza sifumu se lu iponela ku fita maluo a kwa moya a’ sa bonwi. (Mateu 19:21, 22) Lika ze bonwa ze ñata—ze cwale ka “takazo ya nama, ni takazo ya meto”—li tabelwa hahulu ki nama ya luna ye si ka petahala mi li kona ku fokolisa tumelo ya luna.—1 Joani 2:16.

3. Mukreste u swanezi ku hulisa tumelo ifi?

³ Niteñi, Paulusi u li, “ya taha ku Mulimu u swanezi ku lumela kuli Mulimu u teñi, ni kuli ki Yena ya fa ba ba mu bata mupuzo.” Mushe n’a na ni tumelo ye cwalo. N’a “nz’a talimile mupuzo” mi “n’a tiya, inge u bona ya sa bonwi.” (Maheberu 11:6, 24, 26, 27) Mukreste u tokwa tumelo ye cwalo. Sina mo ku boniselizwe mwa taba ye felile, Abrahama n’a li mutala o munde wa tumelo.

Mutala wa Abrahama wa Tumelo

4. Mupilelo wa Abrahama ne u amilwe cwañi ki tumelo ya hae?

⁴ Abrahama n’a pila mwa Ure ha n’a amuhezi sepiso ya Mulimu ya kuli n’a ka tahisa peu ye ne ka ba mbuyoti kwa batu ba macaba kaufela. (Genese 12:1-3; Likezo 7:2, 3) Kabakala sepiso yeo, Abrahama a utwa Jehova, a tutela pili kwa Karani kihona a ya kwa Kanana. Teñi k’o, Jehova a sepisa ku fa naha yeo kwa baikulu ba Abrahama. (Genese 12:7; Nehemia 9:7, 8) Kono lisepiso ze ñata za Jehova ne li ka talelezwa Abrahama ha s’a shwile. Sina ka mutala, yena Abrahama n’a si ka luwa kalulo ni ye kana ya Kanana—kwand’a sikoti sa Makapela, sa n’a lekile kuli si be sibaka sa mabita. (Genese 23:1-20) Niteñi, n’a na ni tumelo mwa linzwi la Jehova. Fahalimw’a seo, n’a na ni tumelo mwa “munzi [wa kwapili] o na ni mitomo ya niti, o Mulali ni Muyahi wa ona ki Mulimu.” (Maheberu 11:10) Tumelo yeo ne i mu tiisize mwa bupilo bwa hae kaufela.

5, 6. Tumelo ya Abrahama mwa sepiso ya Jehova ne i likilwe cwañi?

⁵ Seo sihulu si cwalo ka za sepiso ya kuli baikulu ba Abrahama ne ba ka ba sicaba se situna. Kuli seo si ezahale, Abrahama n’a tokwa ku ba ni mwana, mi n’a libelezi nako ye telele kuli a mu fiwe. Ha lu zibi kuli n’a li wa myaha ye mikai ha n’a utwile lwa pili sepiso ya Mulimu yeo, kono ha n’a tamile musipilituna wa ku ya kwa Karani, Jehova n’a si ka mu fa kale mwana. (Genese 11:30) N’a bile mwa Karani nako ye telele ye ne mu konisize ku ‘luwa liluwo,’ mi ha n’a tutezi kwa Kanana, ne li wa myaha ye 75 mi Sara ne li wa myaha ye 65. Niteñi, ne ba si na mwana. (Genese 12:4, 5) Sara ha s’a fitile mwa lilimo za ma 70, a bona kuli n’a s’a supezi hahulu mi n’a si ke a pepela Abrahama mwana. Kacwalo, ka ku latelela sizo sa mwa miteñi yeo, a fa Hagare mutang’a hae ku Abrahama, mi a pepa mwana ka yena. Kono mwana y’o ne si yena ya n’a sepisizwe. Hasamulaho Hagare ni mwan’a hae, Ishimaele, ne ba lelekilwe. Kono Abrahama ha n’a ba lapelezi, Jehova a sepisa ku fuyaula Ishimaele.—Genese 16:1-4, 10; 17:15, 16, 18-20; 21:8-21.

⁶ Ka nako ya Mulimu ye swanela—ili nako ye telele hahulu ku zwa fo ne ba utwezi sepiso lwa pili—Abrahama wa myaha ye 100 ni Sara wa myaha ye 90 ba ba ni mbututu wa mushimani, Isaka. I lukela ku ba ye ne bile makazo ye tuna yeo! Ku bosinyalana ba ne ba supezi bao, ne li inge zuho mibili ya bona ye ne “shwile” ha ne i pepile mwana. (Maroma 4:19-21) Ne li tibelelo ye telele, kono sepiso ha ne i talelelizwe, tibelelo yeo ne i bile ye swanela.

7. Tumelo i swalisani cwañi ni tundamo?

⁷ Mutala wa Abrahama u lu hupulisa kuli tumelo ha i swaneli ku ba fela ya swalelele. Paulusi n’a swalisanisize tumelo kwa tundamo ha n’a ñozi kuli: “Mu swanezi ku tundamena ku eza se si latwa ki Mulimu, ni kuli mu fiwe se mu sepisizwe. . . . Luna ha lu yo ku ba ba kutela mwamulaho, ku y’o lateha; luna lu ku ba ba tiiseza mwa tumelo, ku pilisa mioya ya luna.” (Maheberu 10:36-39) Ba bañata ba libelezi ka nako ye telele ku fiwa se ba sepisizwe. Ba bañwi ba libelezi mwa bupilo bwa bona kaufela. Tumelo ya bona ye tuna i ba tiisize. Mi sina Abrahama, ba ka amuhela mupuzo ka nako ya Jehova ye swanela.—Habakuki 2:3.

Ku Teeleza ku Mulimu

8. Lu teeleza cwañi ku Mulimu kacenu, mi ki kabakalañi seo ha si ka tiisa tumelo?

⁸ Lika z’e ne kamba ku fitelela ne li tiisize tumelo ya Abrahama, mi li kona ku lu tusa ni luna. Pili, n’a ‘lumezi kuli Mulimu u teñi’ ka ku utwa Jehova ha n’a bulela. Kacwalo, n’a sa swani ni Majuda ba mwa lizazi la Jeremia, ba ne ba lumela kuli Jehova u teñi kono ili ba ne ba sa lumeli manzwi a hae. (Jeremia 44:15-19) Kacenu, Jehova u bulela ku luna ka Bibele, lona Linzwi la hae le li buyelezwi, leo Pitrosi n’a bulezi kuli li swana sina “lambi ye lu bonisa mwa sibaka se si lififi . . . mwa lipilu za mina.” (2 Pitrosi 1:19) Ha lu bala Bibele ka tokomelo, lu ‘utiwa ka manzwi a tumelo.’ (1 Timotea 4:6; Maroma 10:17) Hape, mwa mazazi a, a maungulo, “mutanga ya sepahala, ya na ni kutwisiso” wa fa “lico [za kwa moya] ka nako ye lukela,” ili ketelelo ya mwa ku sebeliseza likuka za Bibele ni ku utwisisa bupolofita bwa Bibele. (Mateu 24:45-47) Ku teeleza ku Jehova ka linzila zeo kwa tokwahala kuli lu be ni tumelo ye tiile.

9. Ha lu lumela luli sepo ya Sikreste, ki sifi se si ka zwa mwateñi?

⁹ Tumelo ya Abrahama ne i swalisani hahulu ni sepo ya hae. ‘N’a lumezi ka sepo, mi a ba cwalo ndat’ahe macaba a mañata.’ (Maroma 4:18) Yeo ki nto ya bubeli ye kona ku lu tusa. Lu si libali ni kamuta kuli Jehova ki “Yena ya fa ba ba mu bata mupuzo.” Muapositola Paulusi n’a ize: “Ha lu sebeza mi lu lwana, ki ka taba ya kuli lu sepile Mulimu-Ya-Pila.” (1 Timotea 4:10) Haiba lu lumela luli sepo ya Sikreste, mupilelo wa luna kaufela u ka ba poniso ya tumelo ya luna, sina Abrahama.

Ku Bulela ni Mulimu

10. Ki tapelo ye cwañi ye ka tiisa tumelo ya luna?

¹⁰ Abrahama n’a bulelanga ni Mulimu, mi yeo ki nto ya bulalu ye ne tiisize tumelo ya hae. Kacenu, ni luna lwa kona ku bulela ni Jehova, ka ku itusisa mpo ya tapelo ka Jesu Kreste. (Joani 14:6; Maefese 6:18) Ne li hasamulaho wa ku bulela nguli ye ne koñomeka tokwahalo ya ku lapela kamita f’o Jesu n’a buzelize kuli: “Mwan’a mutu h’a ka taha, kikuli u ka fumana tumelo i li teñi mwa lifasi?” (Luka 18:8) Tapelo ye tiisa tumelo ha i eziwi ku si na nahanisiso kamba mamelelo. I na ni taluso ye tungile. Sina ka mutala, tapelo ya ka pilu kaufela ya tokwahala ha lu eza likatulo za butokwa kamba ha lu li mwa sineneketo ye tuna.—Luka 6:12, 13; 22:41-44.

11. (a) Abrahama n’a tiisizwe cwañi ha n’a bulelezi Mulimu maikuto a hae? (b) Lu kona ku itutañi ku ze ne ezahezi ku Abrahama?

¹¹ Abrahama ha n’a nz’a supala mi Jehova inge a si ka mu fa kale mwana ya n’a mu sepisize, n’a bulelezi Mulimu pilaelo ya hae. Jehova a mu kolwisa sinca. Ki sifi se ne si zwile mwateñi? Abrahama “a lumela ku [Jehova, NW]; mi a mu balela ku lumela kwa hae kuli ki ku luka.” Cwale, Jehova a fa sisupo sa ku tiisa manzwi a hae ao a’ kolwisa. (Genese 15:1-18) Haiba lu bulelela Jehova maikuto a luna kaufela ka tapelo, ku amuhela lisepiso za Jehova ze mwa Linzwi la hae, yona Bibele, ni ku mu utwa ka tumelo ye tezi, u zibe Jehova u ka tiisa tumelo ya luna.—Mateu 21:22; Juda 20, 21.

12, 13. (a) Abrahama n’a fuyauzwi cwañi ha n’a latelezi ketelelo ya Jehova? (b) Ki lifi ze ezahezi ze ka tiisa tumelo ya luna?

¹² Nto ya bune ye ne tiisize tumelo ya Abrahama ne li kemelo yeo Jehova n’a mu file ha n’a latelezi ketelelo ya Mulimu. Abrahama ha n’a ilo yangwela Lota kwa malena ba ne ba mu hapile, Jehova n’a mu tusize ku tula. (Genese 14:16, 20) Abrahama niha n’a pila sina muenyi mwa naha ye ne ba ka luwa baikulu ba hae, Jehova n’a mu file sifumu. (Mu bapanye Genese 14:21-23.) Jehova n’a tusize mutang’a hae ha n’a ikataza ku fumanela Isaka musali ya swanela. (Genese 24:10-27) Ee, Jehova “n’a fuyauzi Abrahama mwa linto kamukana.” (Genese 24:1) Kacwalo tumelo ya hae ne i tiile mi swalisano ya hae ni Jehova Mulimu ne i bile ye tuna kuli mane Jehova a mu biza “mulatiwa wa ka.”—Isaya 41:8; Jakobo 2:23.

¹³ Kana luna kacenu lwa kona ku ba ni tumelo ye tiile cwalo? Lwa kona. Haiba sina Abrahama, lu lika Jehova ka ku utwa litaelo za hae, u ka lu fuyaula ni luna, mi seo si ka tiisa tumelo ya luna. Sina ka mutala, Piho ya Silimo sa Sebelezo sa 1998 i bonisa kuli ba bañata ne ba fuyauzwi ka butuna ha ne ba utwile taelo ya hae ya ku kutaza taba ye nde.—Mareka 13:10.

Litaba za Tumelo Kacenu

14. Jehova n’a fuyauzi cwañi musebezi wa ku abela pampili ya Taba ya Mubuso No. 35?

¹⁴ Mwa October ya 1997, musebezi wa mwa lifasi kamukana wa ku abela pampili ya Taba ya Mubuso No. 35 ne u kondile hahulu, kabakala tukufalelo ni cisehelo ya yo muñwi ni yo muñwi wa bolule-lule ba Lipaki. Mutala wa seo ki wa se ne si ezahezi mwa Ghana. Ibat’o ba likopi ze eza bolule b’a 2.5 ne li abezwi mwa lipuo z’e ne, mi kacwalo lituto za Bibele ze bat’o eza 2,000 ne li kupilwe. Mwa Cyprus Lipaki ba babeli ba ne ba abela pampili ya Taba ya Mubuso ne ba boni muprisita inz’a ba latelela. Hasamulahonyana, ba mu fa kopi ya pampili ya Taba ya Mubuso. N’a s’a amuhezi kale kopi mi a li: “Ne ni susuelizwe hahulu ki lushango lwa yona mi ne ni bata ku itumela kwa batu ba ne ba i lukisize.” Mwa Denmark, likopi za pampili ya Taba ya Mubuso ze eza bolule b’a 1.5 ne li abezwi mi ne ku zwile mwateñi ze nde. Teñi k’o musali ya talima za likutwano mwahal’a nyangela ni lipisinisi n’a ize: “Manzwi a trakiti a ama mañi ni mañi. I bunolo ku i utwisisa, mi ya susueza, ni ku lakazisa mutu ku ziba ze ñata. Ki ye nongile luli!”

15. Ki lifi ze ezahezi ze bonisa kuli Jehova n’a fuyauzi buikatazo bwa ku fita kwa batu kai ni kai?

¹⁵ Mwa 1998 buikatazo ne bu ezizwe bwa ku kutaza kwa batu kai ni kai isi fela kwa mandu a bona. Mwa Côte d’Ivoire bosinyalana ba ba li balumiwa ne ba potezi lisepe ze 322 fa makamba. Ne ba siile libuka ze 247, limagazini ze 2,284, libroshuwa ze 500, ni matrakiti a’ mianda-nda, hamohocwalo ni mavidio kuli bazamai ba buhe ha ba nze ba li mwa lieto. Mwa Canada Paki yo muñwi n’a ile kwa sibaka ko ku lukisezwa limota. Muñ’a sibaka seo n’a tabela, mi muzwale y’o a ina lihora z’e ne ni licika teñi k’o, nihaike kuli nako hamoho ya n’a kutalize ne li ye bat’o ba fela hora kabakala baleki ba ne ba tahanga. Hasamulaho, ba lukisa ku itutanga ka 22:00 hrs. Kono fokuñwi tuto ne i kalisanga fahal’a busihu ni ku fela ka 02:00 hrs. Ku kona ku ba kuli tomahanyo yeo ne li ye t’ata, kono ne ku zwile mwateñi ze nde. Munna y’o a ikatulela ku kwalanga sibaka sa hae seo la Sunda kuli a yange kwa mikopano. Yena ni lubasi lwa hae hañihañi ba eza zwelopili ye nde.

16. Ki lifi ze ezahezi ze bonisa kuli broshuwa ya Seo A Tokwa ni buka ya Zibo ki liitusiso ze m’ata mwa musebezi wa ku kutaza ni ku luta?

¹⁶ Broshuwa ya Ki Sifi Seo Mulimu A Tokwa ku Luna? ni buka ya Zibo ye Isa kwa Bupilo bo Bu Sa Feli li zwelapili ku ba liitusiso ze m’ata mwa musebezi wa ku kutaza ni ku luta. Mwa Italy sisita ya n’a libelela mbasi n’a amuhezi kopi ya pampili ya Taba ya Mubuso. Habusa, a atumelwa hape mi a amuhela broshuwa ya Seo A Tokwa. Ka zazi ni zazi hasamulaho n’a banga ni tuto ya Bibele ya mizuzu ye 10 ku isa ku ye 15 fa sitishini sa limbasi. Hamulaho wa kweli ni licika, a ikatulela ku zwa mwa ndu ya masisita ni ku ya habo kwa Guatemala kuli a yo zwelapili ku ituta. Mwa Malawi mulapeli ya tiile ya bizwa Lobina n’a nyemile bana ba hae ha ne ba kalile ku ituta Bibele ni Lipaki za Jehova. Niteñi, basizana bao ne ba bulelelanga ma bona y’o niti ya Bibele ha ne ku konahalanga. Mwa June ya 1997, Lobina a bona buka ya Zibo mi a nyangumunwa ki pulelo ye li “Zibo ye Isa.” Mwa July a amuhela tuto ya Bibele. Mwa August a fumaneha kwa mukopano wa sikiliti mi a teeleza ka tokomelo kwa tukiso kaufela. Mafelelezo a kweli yeo h’a to fita, n’a sa zwile mwa keleke ya hae ni ku kona ku ba muhasanyi ya si ka kolobezwa. N’a kolobelizwe mwa November ya 1997.

17, 18. Mavidio a Sosaiti a konile cwañi ku tusa batu ku “bona” lika za kwa moya?

¹⁷ Mavidio a Sosaiti a tusize ba bañata ku “bona” lika za kwa moya. Mwa Mauritius munna yo muñwi n’a zwile mwa keleke ya habo kakuli ne ku na ni mifilifili. Mulumiwa a mu bonisa buñwi bwa Lipaki za Jehova, ka ku itusisa vidio ye bizwa United by Divine Teaching. Munna y’o a susuezwa, mi a li: “Mina Lipaki za Jehova ki kale mu ba mwa Paradaisi!” A amuhela tuto ya Bibele. Kaizeli yo muñwi mwa Japan n’a bonisize munn’a hae ya n’a si mulumeli vidio ye bizwa Jehovah’s Witnesses—The Organization Behind the Name, mi a susuezwa ku ba ni tuto ya Bibele ya kamita. Ha s’a buhile vidio ye bizwa United by Divine Teaching, a bata ku ba yo muñwi wa Lipaki za Jehova. Mavidio a malalu a’ tatamana a’ bizwa The Bible—A Book of Fact and Prophecy ne a mu tusize ku sebelisa likuka za Bibele mwa bupilo bwa hae. Kwa mafelelezo vidio ye li Jehovah’s Witnesses Stand Firm Against Nazi Assault ne i mu bonisize kuli Jehova u tiisanga batu ba Hae ha ba lwaniswa ki Satani. Munna y’o n’a kolobelizwe mwa October ya 1997.

¹⁸ Zeo ki ze sikai fela ku ze ezahezi ze ñata-ñata ze ne ikozwi mwahal’a silimo sa sebelezo sa ñohola. Li bonisa kuli Lipaki za Jehova ba na ni tumelo ye tiile ni kuli Jehova u tiisa tumelo yeo ka ku fuyaula misebezi ya bona.—Jakobo 2:17.

Mu Hulise Tumelo Kacenu

19. (a) Luna lu mwa muinelo o munde cwañi ku fita Abrahama? (b) Ki ba bakai ba ne ba kubukani ñohola ili ku hupula sitabelo sa lifu la Jesu? (c) Ki lifi linaha ze ne li bile ni palo ye tuna ya baputehi kwa Kupuzo ñohola? (Mu bone mukoloko fa makepe 26 ku isa 29.)

¹⁹ Mwa linzila ze ñata luna kacenu lu mwa muinelo o munde ku fita Abrahama. Lwa ziba kuli Jehova n’a talelelize lisepiso za hae kaufela ku Abrahama. Baikulu ba Abrahama ne ba luwile Kanana, mi ne ba bile sicaba se situna. (1 Malena 4:20; Maheberu 11:12) Hape, ibat’o ba lilimo ze 1,971 ku zwa fa n’a zwezi Abrahama mwa Karani, Jesu muikulyae, n’a kolobelizwe mwa mezi ki Joani Mukolobezi ni ka moya o kenile ki Jehova ka sibili kuli a be Mesiya, Peu ya Abrahama ka kutwisiso ye tezi, ya kwa moya. (Mateu 3:16, 17; Magalata 3:16) Ka la Nisani 14, 33 C.E., Jesu n’a fanile bupilo bwa hae ku bu eza tiululo ku ba ne ba ka bonisa tumelo ku yena. (Mateu 20:28; Joani 3:16) Bolule-lule cwale ba kona ku fiwa mbuyoti ka yena. Ñohola, b’a 13,896,312 ne ba kubukani la Nisani 14 kuli ba hupule ona kezo ye lilato yeo ye makaza. Jehova, yena Mutalelezi yo Mutuna wa lisepiso n’a bubanisizwe luli!

20, 21. Batu ba mwahal’a macaba kaufela ne ba filwe cwañi mbuyoti ka Peu ya Abrahama mwa lilimo za mwanda wa pili, mi ba fiwa cwañi mbuyoti kacenu?

²⁰ Mwa lilimo za mwanda wa pili, ba bañata mwahal’a macaba kaufela—ku kala ka Isilaele wa nama—ne ba bonisize tumelo mwa Peu ya Abrahama yeo mi ne ba bile bana ba Mulimu ba ba tozizwe, ili lilama za “Isilaele wa Mulimu” yo munca, wa kwa moya. (Magalata 3:26-29; 6:16; Likezo 3:25, 26) Ne ba sepile ku fiwa bupilo bwa moya bo bu sa shwi mwa lihalimu ka ku ba babusi mwa Mubuso wa Mulimu. Ki b’a 144,000 fela ba ne ba ka fuyaulwa cwalo, mi ba sikai mwahal’a bona ba sa li teñi. (Sinulo 5:9, 10; 7:4) Ñohola, b’a 8,756 ne ba pakile kuli ki ba bañwi ba bona ka ku ca liswanisezo kwa mukiti wa Kupuzo.

²¹ Ibat’o ba Lipaki za Jehova kaufela kacenu ki ba “buñata bo butuna” bo bu polofitilwe kwa Sinulo 7:9-17. Bakeñisa kuli ba fiwa mbuyoti ka Jesu, ba sepile ku pila ku ya ku ile mwa paradaisi fa lifasi-mubu. (Sinulo 21:3-5) B’a 5,888,650 ba ne ba abanile mwa musebezi wa ku kutaza ka 1998 ki bupaki bwa kuli batu bao luli ki “buñata bo butuna.” Sihulu ne ku nyangumuna Russia ni Ukraine ha ne li bihile lwa pili bahasanyi ba ba fitelela 100,000. Piho ye ñwi ye ne zwile mubano ne i zwelezi kwa United States—ye ne bile ni bahasanyi b’a 1,040,283 mwa August! Zeo ki linaha ze talu fela ku ze 19 ze ne li bihile bahasanyi ba ba fitelela 100,000 ñohola.

Sepo Ye Ka Tuha I Talelezwa

22, 23. (a) Lu swanela ku itiisezañi mwa lipilu za luna kacenu? (b) Lu kona cwañi ku ba sina Abrahama, isi sina ba ba sa lumeli ba n’a bulezi Paulusi?

²² Baputehi kwa Kupuzo ne ba hupulisizwe fo lu zamaela mwa talelezo ya lisepiso za Jehova. Ka 1914, Jesu n’a beilwe fa lubona kuli a be Mulena wa Mubuso wa Mulimu wa kwa lihalimu, ili ku kalisa ku ba teñi a li Mulena. (Mateu 24:3; Sinulo 11:15) Ee, Peu ya Abrahama cwale ya busa kwa lihalimu! Jakobo n’a bulelezi Bakreste ba mwa lizazi la hae kuli: “Mu libelele; mi mu itiise mwa lipilu za mina; kakuli ku [ba teñi, NW] kwa mulena ku se ku li fakaufi.” (Jakobo 5:8) Ki kale a ba teñi cwale! Ki libaka le lituna leo la kuli lu itiise mwa lipilu za luna!

²³ Haike sepo ya luna mwa lisepiso za Mulimu i uncafazwe kamita ka ku ituta Bibele kamita ni ku lapela ka pilu kaufela. Haike lu fuyaulwe ki Jehova kamita ha lu nze lu utwa Linzwi la hae. Kacwalo lu ka ba sina Abrahama, isi sina bao Paulusi n’a bulezi kuli ne ba na ni tumelo ye fokozi kamba ye shwile. Ha ku na se si ka lu kauhanya kwa tumelo ya luna ye kenile hahulu. (Juda 20) Lu lapela kuli ku be cwalo kwa batanga ba Jehova kaufela mwahal’a silimo sa sebelezo sa 1999 ni ku ya ku ile.

Kana Mwa Ziba?

◻ Lu kona ku teeleza cwañi ku Mulimu kacenu?

◻ Ki lifi lituso ze tahiswa ki litapelo za ka pilu kaufela ku Mulimu?

◻ Haiba lu latelela ketelelo ya Jehova, tumelo ya luna i ka tiiswa cwañi?

◻ Ki lifi likalulo za piho ya silimo (makepe 26 ku isa 29) ze mu tabezi hahulu?

[Chati fa likepe 26-29]

PUHO YA MWA SILIMO SA SEBELEZO SA 1998 YA LIPAKI ZA JEHOVA MWA LIFASI KAMUKANA

(Mu bone muputo o tiile)

[Siswaniso se si fa likepe 24]

Ha lu teeleza kwa Linzwi la Jehova, sepo ya luna mwa lisepiso za hae i ka uncafazwa

[Siswaniso se si fa likepe 31]

Tumelo ya luna ya tiiswa ha lu abana mwa bukombwa