Ze Nde Ze I Tahisa Taba Ye Nde

“[Muñ’a] Bupilo u ni tozize kuli ni tiseze babotana litaba ze nde; u ni lumile ku tiisa ba ba lobehile lipilu, . . . ni ku omba-omba ba ba lila kaufela.”—ISAYA 61:1, 2.

1, 2. (a) Jesu n’a izibahalize kuli ne li yena mañi, mi n’a ezize cwañi cwalo? (b) Taba ye nde ya n’a shaezi Jesu ne i tahisize limbuyoti mañi?

LIZAZI le liñwi la Pumulo kwa makalelo a bukombwa bwa hae, Jesu n’a li mwa sinagoge ya mwa Nazareta. Ka ku ya ka ze ñozwi, “ba mu tambeka buka ya mupolofita Isaya; yena a apula buka mi a fumana fo ku ñozwi kuli: Moya wa Mulena u fahalimw’a ka, kakuli u ni tozize, kuli ni bulelele babotana Evangeli.” Jesu a zwelapili ku bala ze ñwi mwa taba yeo ya bupolofita. Kihona a ina ni ku bulela kuli: “Kacenu liñolo leo li ezahezi, mu nze mu ikutwela.”—Luka 4:16-21.

² Ka ku bulela cwalo, Jesu n’a zibahalize kuli n’e li yena mukutazi ya n’a polofitilwe, mubuleli wa taba ye nde ni muomba-ombi. (Mateu 4:23) Mi Jesu n’a na ni taba ye nde luli ya ku bulela! N’a bulelezi batu be ne ba mu teeleza kuli: “Ki na liseli la lifasi; ya ni latelela h’a na ku zamaya mwa lififi, kono u ka ba ni liseli la bupilo.” (Joani 8:12) Hape n’a ize: “Ha mu tiiseza mwa linzwi la ka, mu ka ba balutiwa ba ka ba niti; mi mu ka ziba niti, mi niti i ka mi lukulula.” (Joani 8:31, 32) Ee, Jesu n’a na ni “manzwi a bupilo bo bu sa feli.” (Joani 6:68, 69) Liseli, bupilo, tukuluho—kaniti, zeo ki lika za butokwa luli!

3. Balutiwa ba Jesu ne ba shaezi taba mañi ye nde?

³ Hamulaho wa Pentekonta ya 33 C.E., balutiwa ba zwelapili ku eza musebezi wa Jesu wa ku kutaza. Ne ba shaezi ‘evangeli ya mubuso’ kwa Maisilaele ni ku bamacaba. (Mateu 24:14; Likezo 15:7; Maroma 1:16) Be ne ba lumezi ne ba fitile fa ku ziba Jehova Mulimu. Ne ba lukuluzwi kwa butanga bwa bulapeli mi ba ba lilama za sicaba sa kwa moya, sona sa “Isilaele wa Mulimu,” ili seo lilama za sona ba na ni tibelelo ya ku busa ku ya ku ile mwa lihalimu ni Mulen’a bona, yena Jesu Kreste. (Magalata 5:1; 6:16; Maefese 3:5-7; Makolose 1:4, 5; Sinulo 22:5) Zeo n’e li limbuyoti ze tuna luli!

Ku Kutaza Kacenu

4. Musebezi wa ku kutaza taba ye nde u sweli ku petiwa cwañi kacenu?

⁴ Kacenu, Bakreste ba ba tozizwe, ba ba tusiwa ki “buñata bo butuna bwa batu” ba ba li “lingu ze ñwi” ba ba sweli ku ekezeha, ba zwelapili ku peta musebezi wa bupolofita w’o pili n’o filwe ku Jesu. (Sinulo 7:9; Joani 10:16) Kabakaleo, taba ye nde i sweli ku kutazwa hahulu ku fita haisali. Mwa linaha ni libaka z’e 235, Lipaki za Jehova se ba “[tiselize] babotana litaba ze nde; . . . ku tiisa ba ba lobehile lipilu, ku bulelela ba ba hapilwe kuli ba lukuluhile, ku zibisa ba ba tamilwe mwa tolongo kuli ba kwalululezwi; ku huweleza kuli mwaha wa sishemo sa [Muñ’a] Bupilo ki wo; ki le lizazi l’a ka likanyisa batu Mulimu wa luna; ni ku omba-omba ba ba lila kaufela.” (Isaya 61:1, 2) Kacwalo, musebezi wa Sikreste wa ku kutaza u zwelapili ku tahiseza ba bañata limbuyoti ni ku omba-omba ha buniti ba ba mwa “ñalelwa ifi kamba ifi.”—2 Makorinte 1:3, 4.

5. Ka za ku shaela taba ye nde, Lipaki za Jehova ba shutana cwañi ni likeleke za Krestendomu?

⁵ Ki niti kuli likeleke za Krestendomu za zamaisa misebezi ya mifuta-futa ya bukutazi. Ba bañata ba lumanga balumiwa ku y’o eza batu ba mwa linaha ze ñwi baproselite. Ka mutala, The Orthodox Christian Mission Center Magazine i biha ka za musebezi wa balumiwa ba keleke ya Orthodox mwa linaha za Madagascar, ze kwa mboela wa Africa, Tanzania, ni Zimbabwe. Kono mwa Keleke ya Orthodox, sina mwa likeleke ze ñwi za Krestendomu, buñata bwa lilama za zona ha ba ezangi musebezi o cwalo. Ka ku shutana, Lipaki za Jehova ba ba ineezi kaufela ba satalala ku abana mwa bukutazi. Ba lemuha kuli ku shaela taba ye nde ki bupaki bwa buniti bwa tumelo ya bona. Paulusi n’a ize: “Mutu u lumela ka pilu, kuli a beiwe ya lukile; mi u paka ka mulomo, kuli a piliswe.” Ka mo ku inezi fela, tumelo ye sa ezisi mutu ku sebeza i shwile.—Maroma 10:10; Jakobo 2:17.

Taba Ye Nde Ye Tahisa Limbuyoti za Kamita

6. Ki taba ye nde mañi ye sweli ku shaelwa kacenu?

⁶ Lipaki za Jehova ba kutaza taba ye nde ka ku fitisisa. Ba apulanga mwa Libibele za bona ni ku bonisa ba ba teeleza kuli Jesu n’a itombozi bupilo bwa hae ilikuli batu ba kone ku atumela Mulimu, ku swalelwa libi za bona, ni ku ba ni sepo ya bupilo bo bu sa feli. (Joani 3:16; 2 Makorinte 5:18, 19) Ba zibahaza kuli Mubuso wa Mulimu s’o tomilwe mwa lihalimu mwatas’a Mulena ya tozizwe, yena Jesu Kreste, ni kuli ona Mubuso w’o u ka tuha u felisa bumaswe fa lifasi ni ku okamela musebezi wa ku ezisa lifasi le ku ba Paradaisi. (Sinulo 11:15; 21:3, 4) Ka ku taleleza bupolofita bwa Isaya, ba zibisa batu kuli nako ye ki yona “mwaha wa sishemo sa [Muñ’a] Bupilo,” f’o batu ba sa na ni nako ya ku amuhela taba ye nde. Hape ba lemusa kuli ku ka tuha ku taha “lizazi l’a ka likanyisa batu Mulimu wa luna,” ili f’o Jehova a ka yundisa baezalibi ba ba sa baki.—Samu 37:9-11.

7. Ki taba mañi ye n’e ezahezi ye bonisa swalisano ya Lipaki za Jehova, mi ki kabakalañi ha ba na ni swalisano ye cwalo?

⁷ Mwa lifasi le li unjamwi ki likozi, yeo ki yona fela taba ye nde ye na ni lituso za kamita. Ba ba i amuhela ba ba lilama za Bakreste ba ba swalisani ba mwa lifasi kamukana ba ba sa lumelezi lifapahano za naha, mushobo, kamba sifumu ku ba aluhanya. Ba ‘apezi lilato, kakuli ki tamo ye ba fa bupetehi.’ (Makolose 3:14; Joani 15:12) Taba yeo ne i bonahezi ñohola mwa naha ye ñwi ya mwa Africa. Zazi le liñwi kakusasana, mwa muleneñi wa yona, ne ku tumbukile ndwa. Ne ku lelilwe kuli muuso u tululwe. Ndwa yeo ha i t’o fetuha ku ba ya mukowa, lubasi lo luñwi lwa Lipaki ne lu nyazizwe kabakala kuli ne lu patile Lipaki ba bañwi ba mukowa u sili. Lubasi l’o ne lu alabile kuli: “Ba ba li teñi mwa ndu ya luna ki Lipaki za Jehova fela.” Ku bona, lifapahano za mukowa n’e si za butokwa; sa butokwa n’e li lilato la Sikreste—ili ku omba-omba be ne ba ziyelehile. Wahabo bona ya si Paki n’a ize: “Lilama za bulapeli kaufela ne ba betekile be ne ba lapela ni bona. Ki Lipaki za Jehova fela be ne ba si ka beteka ba bona.” Litaba ze ñata ze cwalo ze futuka kwa linaha ze tupwikezi mwa lindwa za bayahi ba teñi li bonisa kuli Lipaki za Jehova kaniti luli ba ‘lata banabahabo bona.’—1 Pitrosi 2:17.

Taba Ye Nde Ya Cinca Batu

8, 9. (a) Ba ba amuhela taba ye nde ba ezanga licinceho mañi? (b) Ki litaba mañi ze ezahezi ze bonisa m’ata a taba ye nde?

⁸ Taba ye nde i ama nto yeo Paulusi n’a bulezi kuli ki ‘bupilo bwa cwale, ni bo bu sa taha.’ (1 Timotea 4:8) Ha i fi fela sepo ye makaza ili ye tiile ya za kwapili kono hape i kondolokisa “bupilo bwa cwale.” Ka butu, Lipaki za Jehova ba etelelwa ki Linzwi la Mulimu, yona Bibele, kuli ba pile ka ku lumelelana ni tato ya Mulimu. (Samu 119:101) Bona butu bwa bona luli bwa uncafazwa ha ba nze ba hulisa mikwa ye cwale ka ku luka ni busepahali.—Maefese 4:24.

⁹ Mu nyakisise mutala wa Franco. N’a na ni bufokoli bwa ku halifanga. Lika ha ne li sa ezahalangi mwa n’a batela, n’a halifanga hahulu ni ku tubaka lika. Musal’a hae n’a itutile Bibele ni Lipaki za Jehova, mi mutala wa bona hanyinyani-hanyinyani n’o tusize Franco ku lemuha kuli n’a na ni ku cinca. N’a itutile Bibele ni bona mi kwa mafelelezo n’a konile ku bonisa miselo ya moya o kenile, yona ya kozo ni buiswalo. (Magalata 5:22, 23) N’a li yo muñwi wa b’a 492 be ne ba kolobelizwe mwa Belgium mwa silimo sa sebelezo sa 2001. Hape, mu nge Alejandro. Mutangana y’o n’a til’o ngongwelwa hahulu ki milyani ye kola kuli mane n’a kalile ku pila ko ne ku yumbelwanga manyalala. N’a nopelelanga lika za n’a kona ku lekisa kuli a fumane mali a ku leka milyani ye kola. Ha n’a li wa lilimo za buhulu z’e 22, Lipaki za Jehova ne ba memile Alejandro ku ituta Bibele, mi n’a lumezi. N’a balanga Bibele ka zazi ni ku fumanehanga kwa mikopano ya Sikreste. Kapili-pili n’a ezize licinceho ze tuna mwa bupilo bwa hae kuli mwa likweli ze sa fiti ku ze silezi fela, n’a kona ku abana mwa musebezi wa ku kutaza. N’a li yo muñwi wa b’a 10,115 be ne ba ezize cwalo ñohola mwa Panama.

Taba Ye Nde—Mbuyoti ku Ba Ba Ishuwa

10. Ki bomañi ba ba amuhela taba ye nde, mi moya wa bona u cincanga cwañi?

¹⁰ Isaya n’a polofitile kuli taba ye nde ne i ka kutazwa ku ba ba ishuwa. Ba ba ishuwa bao ki bomañi? Ki bona ba ba talusizwe mwa buka ya Likezo kuli ba “ketezwi bupilo bo bu sa feli.” (Likezo 13:48) Ki batu ba ba ishuwa ba ba fumaneha mwa miinelo kaufela ya nyangela ba ba amuhela lushango lwa niti. Ba ba cwalo ba ituta kuli ku eza tato ya Mulimu ku tahisa limbuyoti ze tuna hahulu ku fita nto ifi kamba ifi yeo lifasi le li kona ku fa. (1 Joani 2:15-17) Kono Lipaki za Jehova ba kona ku susumeza cwañi batu ka musebezi wa bona wa ku kutaza?

11. Ka ku ya ka Paulusi, taba ye nde i lukela ku shaelwa cwañi?

¹¹ Mu nyakisise mutala wa muapositola Paulusi, ya n’a ñolezi Makorinte kuli: “Na banabahesu, ha ni tile ku mina ku mi bulelela bupaki bwa Mulimu, ha ni si ka taha ka bunde bo butuna bwa manzwi, kamba bwa butali. Kakuli neli mulelo wa ka o tiile kuli ha ni na ku ziba se siñwi mo ku mina, konji Jesu Kreste, mi ili ya kokotezwi fa [kota ya linyando, NW].” (1 Makorinte 2:1, 2) Paulusi n’a si ka lika ku tabisa batu ka tuto ya hae. N’a lutile fela litaba za niti za Mulimu, ili litaba zeo kacenu li ñozwi mwa Bibele. Hape mu lemuhe m’o Paulusi n’a susuelelize Timotea, mukutazi yo muñwi ha n’a ize: “Bulela Linzwi, u [li] tiise.” (2 Timotea 4:2) Timotea n’a na ni ku shaela “Linzwi,” ili lushango lwa Mulimu. Paulusi hape n’a ñolezi Timotea kuli: “Tundamena ku itahisa ku Mulimu unz’o lumelelwa, u li mubeleki ya sa nyazwi, ya aba Linzwi la niti ka mukwa o lukile.”—2 Timotea 2:15.

12. Lipaki za Jehova kacenu ba mamela cwañi manzwi a Paulusi ni mutala wa hae?

¹² Lipaki za Jehova ba latelela mutala wa Paulusi, hamoho ni manzwi a hae ku Timotea. Ba lemuha m’ata a Linzwi la Mulimu mi ba itusisa lona hande ha ba nze ba bata ku bonisa batu manzwi a swanela a sepo ni a toba pilu. (Samu 119:52; 2 Timotea 3:16, 17; Maheberu 4:12) Ki niti kuli ba itusisa hande lihatiso ze tomile fa Bibele ilikuli ba ba tabela ba kone ku ba ni zibo ye ñwi ka za Bibele mwa nako ya bona. Kono kamita ba likanga ku bonisa batu manzwi a mwa Bibele. Ba ziba kuli Linzwi la Mulimu le li tahile ka moya wa hae li ka susueza lipilu za ba ba ishuwa. Mi ni bona Lipaki ha ba itusisa lona cwalo, tumelo ya bona ya tiiswa.

“Ku Omba-Omba Ba Ba Lila Kaufela”

13. Mwa silimo sa 2001, ki likezahalo mañi ze n’e ezisize kuli ku be ni butokwa bo butuna bwa ku omba-omba balili?

¹³ Silimo sa 2001 ne si bile ni makayamana a sona, mi kabakaleo, batu ba bañata ne ba tokwa ku omba-ombiwa. Ñohola mwa September, mutala o ipitezi wa seo n’o bonahezi hahulu mwa United States, f’o balwanisi ba milonga ne ba taselize ni ku wisa miyaho ya World Trade Center mwa New York ni muyaho wa Pentagon bukaufi ni Washington, D.C. Litwaniso zeo ne li mbemukisize batu ba mwa naha kaufela! Mwa likezahalo ze cwalo, Lipaki za Jehova ba satalala ku peta musebezi wa bona wa ku “omba-omba ba ba lila kaufela.” Litaba ze ezahezi ze sikai li ka bonisa mo ba ezeza cwalo.

14, 15. Lipaki mwa miinelo ye shutana ye mibeli ne ba konile ku itusisa hande cwañi mañolo kuli ba omba-ombe ba ba lila?

¹⁴ Paki yo muñwi ya li mukutazi wa ka nako ye tezi n’a atumezi musali cwana mwa likululu ni ku mu buza mwa n’a ikutwela ka za twaniso yeo ye n’e sa zo ezahala. Musali y’o a kalisa ku lila. N’a ize n’a ikutwile bumaswe mi n’a lakaza kuli kambe ku na ni mw’a n’a ka tuseza. Paki y’o n’a mu bulelezi kuli Mulimu u iyakatwa hahulu batu kaufela, mi a bala Isaya 61:1, 2. Musali y’o, ya n’a bulezi kuli mañi ni mañi n’a lila, n’a utwisisize manzwi ao a tahile ka moya wa Mulimu. N’a amuhezi trakiti ni ku kupa yena Paki y’o ku t’o mu potela kwa ndu ya hae.

¹⁵ Lipaki ba babeli be ne ba sweli ku kutaza ne ba katani munna ya n’a sebeza mwa muyaho wa hae wa ku bulukela teñi lika. Ne ba kupile ku mu bonisa manzwi a omba-omba a mwa Bibele kabakala twaniso ye n’e sa zo ezahala kwa miyaho ya World Trade Center. Ha n’a lumezi, ne ba balile 2 Makorinte 1:3-7, yeo manzwi a mañwi a yona a li: “Lu atezwi ni ki ze tiisa pilu ku Kreste.” Munna y’o n’a itebuhile kuli Lipaki bao ne ba sweli ku abana ni ba bañwi litaba ze omba-omba mi n’a ize: “Haike Mulimu a fuyole musebezi o munde o mu sweli ku eza.”

16, 17. Ki litaba lifi ze peli ze ezahezi ze bonisa m’ata a Bibele mwa ku tusa batu ba ba swabile kamba ba ba filikanyizwe ki likozi?

¹⁶ Paki yo muñwi ya n’a il’o potela batu be ne ba bonisize kuli ne ba tabela n’a kopani ni mwan’a musali cwana y’o kwamulaho n’a bonisize kuli wa tabela mi a talusa kuli n’a sweli ku lekula bomuyahwa hamulaho wa twaniso yeo ye n’e ezahezi. Munna y’o n’a komokile kuli Paki y’o n’a sweli ku lekula batu mwa nako ya hae. N’a bulezi kuli n’a sebeleza bukaufi hahulu ni miyaho ya World Trade Center yona twaniso yeo ha ne i ezahezi mi n’a iponezi kezahalo yeo kaufela. Ha n’a buzize libaka Mulimu ha tuhelela manyando, Paki y’o n’a balile mañolo a mwa Bibele, ku kopanyeleza cwalo ni Samu 37:39, ye li: “Ku piliswa kwa ba ba na ni niti, ku zwa ku [Muñ’a] Bupilo; ki Yena sisabelo sa bona mwa nako ya ziyezi.” Munna y’o ka sishemo a buza Paki y’o kuli yena ni lubasi lwa hae ne ba zuhile cwañi, a mu kupa ku t’o pota hape, mi n’a itebuhile ha buniti kwa ku mu potela.

¹⁷ Yo muñwi kwa balili b’a likiti-kiti be ne ba omba-ombilwe ki Lipaki za Jehova mwa mazazi a n’a latelezi twaniso ya balwanisi ba milonga n’e li musali y’o Lipaki ba bañwi ne ba kopani ni yena ha ne ba nze ba potela batu. N’a filikani hahulu kabakala ze n’e ezahezi mi n’a teelelize ha ne ba nze ba bala Samu 72:12-14, ye li: “U ka lamulela mubotana ya itilelela ku yena, ni yena mukunyandela ya si na ya mu tusa. Ya fokozi, ni ya shebile, u ka ba utwela butuku, a lamulele bupilo bwa ba ba nyandile; a ba liulule ku ba ba limba, ba ba ba nyandisa. Mali a mwa mibili ya bona a ka babaleha mwa meto a hae.” Manzwi ao n’e li a butokwa luli! Musali y’o n’a kupile Lipaki bao ku kutela ku bala liñolo leo mi n’a ba memile ku kena mwa ndu ilikuli ba zwelepili ku ambola. Ha ne ba felize ku ambola, ne se ba kalisize tuto ya Bibele.

18. Paki yo muñwi n’a tusize cwañi batu ha n’a memilwe ku ba lapelela?

¹⁸ Paki yo muñwi u sebeza mwa licelo mwa silalanda sa ba ba fumile hahulu ili m’o batu kwamulaho ne ba si ka bonisa kuli ba tabela hahulu taba ye nde ya Mubuso. Hamulaho wa twaniso yeo, batu ba mwa silalanda seo ne ba bonahezi ku saba. Fa lizazi la Butanu manzibwana hamulaho wa twaniso yeo, muzamaisi wa licelo leo n’a kupile bote ku zwela kwande ni ku swala likandela mwa mazoho, ku yema inge ba kutumani ka ku hupula ba ba shwile mwa twaniso yeo. Ka ku kuteka maikuto a bona, Paki y’o a zwela kwande mi a y’o yema a kuzize mwa likululu. Muzamaisi y’o n’a ziba kuli munna y’o n’a li yo muñwi wa likombwa za Lipaki za Jehova, mi nako ya ku kutumana ha ne i felile, n’a mu kupile ku yemela bote mwa tapelo. Paki y’o n’a lumezi. Mwa tapelo ya hae, n’a bulezi za kuli ba bañata ne ba li mwa maswabi kono n’a bulezi kuli balili ne ba sa tokwi ku swaba hahulu inge kuli ne ku si na sepo. N’a bulezi ka za nako f’o likezahalo ze maswe ze cwalo ne li si ke za ezahala hape. Hape n’a bulezi kuli, ka zibo ye nepahezi ye mwa Bibele, bote ne ba kona ku sutelela ku Mulimu ya omba-omba. Ha s’a bulezi kuli “Amen,” muzamaisi y’o ni ba bañwi be ne ba fitelela 60 be ne ba li teñi f’o ba atumela Paki y’o, ba itumela ku yena, ni ku mu kumbatela. Muzamaisi y’o a bulela kuli tapelo yeo n’e li yona tapelo ye nde ka ku fitisisa ya kile a utwa.

Mbuyoti kwa Nyangela

19. Ki taba mañi ye n’e ezahezi ye bonisa kuli ba bañwi ba lemuha lipimo ze pahami za Lipaki za Jehova?

¹⁹ Sihulu mwa miteñi ye, batu ba mwa libaka ko ba li teñi Lipaki za Jehova ba sweli ba tusiwa—sina mo se ba bulelezi ba bañata. Ee, batu ba kozo, ba ba sepahala, ili ba ba na ni mikwa ye kenile kaniti luli ba na ni susuezo ye nde. Mwa naha ye ñwi ya kwa Central Asia, Lipaki ne ba kopani ni munna ya n’a sebezanga mwa liluko la muuso la silelezo ya naha. N’a ize muta o muñwi n’a filwe musebezi wa ku tikitiba likopano ze shutana-shutana za bulapeli. Ha n’a shokile Lipaki za Jehova, n’a tabezi busepahali bwa bona ni muzamao wa bona o munde. N’a tabezi tumelo ya bona ye tiile ni kuli lituto za bona ne li tomile fa Mañolo. Munna y’o n’a lumezi ku ituta Bibele.

20. (a) Misebezi ye ne ba ezize Lipaki za Jehova ñohola i bonisañi? (b) Ki lika mañi ze bonisa kuli ku sa na ni musebezi o mutuna o na ni ku eziwa, mi lu nga cwañi tohonolo ya luna ya ku kutaza?

²⁰ Ku zwelela kwa litaba li sikai ze bulezwi mwa taba ye, kwa likiti-kiti za litaba ze kona ku kandekiwa, kwa iponelwa hande kuli Lipaki za Jehova ne ba patehile mwa silimo sa sebelezo sa 2001.a Ne ba ambozi ni batu ba ba eza bolule-lule, ne ba omba-ombile balili ba bañata, mi musebezi wa bona wa ku kutaza n’o tahisize ze nde. B’a 263,431 ne ba bonisize buineelo bwa bona ku Mulimu ka ku kolobezwa. Mwa lifasi kaufela, palo ya bakutazi ne i ekezehile ka 1.7 pesenti. Mi niti ya kuli b’a 15,374,986 ne ba fumanehile kwa Kupuzo ya ka silimo ya lifu la Jesu i bonisa kuli ku sa na ni musebezi o mutuna o tokwa ku eziwa. (1 Makorinte 11:23-26) Haike lu zweleñipili ku bata ba ba ishuwa ba ba ka amuhela taba ye nde. Mi ibile fela mwaha wa sishemo sa Jehova u zwelapili, haike lu zweleñipili ku omba-omba “ba ba lobehile lipilu.” Lu na ni musebezi o munde luli! Kaniti, kaufela luna lu kutela ku bulela manzwi a Isaya, a li: “Ni ka wabelelwa hahulu [Muñ’a] Bupilo, pilu ya ka i tabele Mulimu wa ka.” (Isaya 61:10) Haike Mulimu a zwelepili ku itusisa luna h’a nze a taleleza manzwi a bupolofita a, a’ li: “Mulena [Muñ’a] Bupilo u ka tahisa ze lukile, ze lumbwa li bonahale fapil’a macaba kaufela.”—Isaya 61:11.

[Litaluso za kwatasi]

Kana Mwa Hupula?

• Ba ba ishuwa ne ba tusizwe cwañi ki taba ye nde ya n’a kutalize Jesu?

• Be ne ba amuhezi musebezi wa ku kutaza wa balutiwa ba Jesu ba mwa lilimo za mwanda wa pili ne ba fuyozwi cwañi?

• Ba ba tabela mwa miteñi ya luna ba tusizwe cwañi ki taba ye nde?

• Lu nga cwañi tohonolo ya luna ya ku ba bakutazi?

[Chati fa likepe 19-22]

PUHO YA SILIMO SA SEBELEZO SA 2001 YALIPAKI ZA JEHOVA MWA LIFASI KAMUKANA(Mu bone muputo o tiile)

[Maswaniso a fa likepe 15]

Lipaki za Jehova kamita ba hupulanga za buikalabelo bwa bona bwa ku kutaza

[Maswaniso a fa likepe 17]

Ba ba amuhela taba ye nde ba ba ba bañwi ba mizwale ba ba swalisani ba mwa lifasi kamukana