Mizwale—mu Calele Moya Mi Mu Kwanise Ze Tokwahala Kuli Mu Fiwe Buikalabelo!
“Ya calela Moya, u ka kutuliswa . . . bupilo bo bu sa feli.”—MAGAL. 6:8.
1, 2. Liñolo la Mateu 9:37, 38 li talelezwa cwañi, mi talelezo yeo i tahisa butokwi bufi mwa liputeho?
MU SWELI mwa iponela litaba ze ezahala ze ka hupulwa ku ya ku ile! Musebezi o ne u polofitilwe ki Jesu Kreste u sweli wa ezwa mwa lifasi kaufela. Jesu na bulezi kuli: “Lukau ki lo lutuna luli, kono ba ba kutula ki ba banyinyani. Mu lapele kihona Muñaa lukau, kuli a lume babeleki mwa lukau lwa hae.” (Mat. 9:37, 38) Jehova Mulimu u sweli ku alaba litapelo ze cwalo ka nzila ye ipitezi. Mwa silimo sa sebelezo sa 2009, liputeho za Lipaki za Jehova mwa lifasi kaufela ne li ekezehile ka palo ye eza 2,031, mi za to fita fa palo ye eza 105,298. Avareji ya batu be ne ba kolobezwa zazi ni zazi ne li 757!
2 Kekezeho yeo i tahisa kuli ku tokwahale hahulu mizwale ba ba eza musebezi wa ku luta ni ku lisa lingu mwa liputeho. (Maef. 4:11) Halaa lilimo-limo, Jehova u itusisize baana ba ba kwanisize ze tokwahala kuli ba babalele lingu za hae, mi lu na ni buikolwiso bwa kuli u ka zwelapili ku eza cwalo. Bupolofita bo bu ñozwi kwa Mika 5:5 bu lu kolwisa kuli mwa mazazi a mafelelezo, batu ba Jehova ba ka ba ni “balisana ba ba 7, ni manduna ba ba 8,” ili ku talusa palo ye tuna ya baana ba ba swanela ba ba ka etelela batu ba Jehova.
3. Ku “calela Moya” ku talusañi?
3 Haiba mu muzwale ya li Paki ya Jehova ya kolobelizwe, ki lika mañi ze kona ku mi tusa ku kwanisa ze tokwahala kuli mu fiwe buikalabelo? Nto ye ka mi tusa hahulu ki ku “calela Moya.” (Magal. 6:8) Ku eza cwalo ku kopanyeleza ku pila ka nzila ye tahisa kuli mu zamaiswe ki moya o kenile wa Mulimu. Mu si ke mwa “calela nama.” Mu si ke mwa lumeleza lika ze cwale ka ku lata bupilo bwa mbombolelwa, ku ikatulusa, ni ku itabisa kuli li fukuze kwa takazo ya mina ya ku sebeleza Mulimu. Bakreste kaufela ba swanela ku “calela Moya,” mi hamulaho wa nako baana ba ba eza cwalo ba kona ku kwanisa ze tokwahala kuli ba fiwe buikalabelo mwa puteho. Bakeñisa kuli batanga ba bukombwa ni maeluda ba tokwahala hahulu kacenu, taba ye sihulu i ñolezwi baana ba Sikreste. Kamukwaocwalo, mizwale, lwa mi susueza kuli mu nyakisise taba ye mi mu lapele ka za teñi.
Mu Kwanise ze Tokwahala Kuli mu Fiwe Musebezi O Munde
4, 5. Baana ba ba kolobelizwe ba susuezwa ku kwanisa ze tokwahala kuli ba fiwe buikalabelo bufi mwa puteho, mi ba kona cwañi ku eza cwalo?
4 Muuna wa Sikreste ha koni ku ba muokameli ha sa ezi buikatazo. U swanela ku kwanisa ze tokwahala kuli a fiwe “musebezi o munde” wo. (1 Tim. 3:1) Ku kwanisa ze tokwahala ku kopanyeleza ku sebeleza balumeli sina mina ni ku ba tokomela. (Mu bale Isaya 32:1, 2.) Muuna ya tukufalelwa ku kwanisa ze tokwahala ka mulelo o munde ha lakazi ku ipahamisa. Kono u na ni takazo ye nde ya ku tusa ba bañwi.
5 Mutu ya bata ku ba mutangaa bukombwa kamba muokameli u likanga ka taata ku kwanisa ze tokwahala ze ñozwi mwa Mañolo. (1 Tim. 3:1-10, 12, 13; Tite 1:5-9) Haiba mu muzwale ya ineezi, mu ipuze kuli: ‘Kana na kutazanga hahulu, mi kana na tusanga ba bañwi ku eza cwalo? Kana na susueza balapeli sina na ka ku iyakatwa za buiketo bwa bona? Kana ni zibahala kuli ni muituti yo munde wa Linzwi la Mulimu? Kana na likanga ku fa likalabo ze nde? Kana na ikatazanga ku eza hande misebezi ye ni filwe ki maeluda?’ (2 Tim. 4:5) Mu swanela ku nyakisisa lipuzo zeo.
6. Ki nto mañi ye kona ku mi tusa hahulu ku kwanisa ze tokwahala kuli mu fiwe buikalabelo mwa puteho?
6 Nto ye ñwi ye kona ku mi tusa ku kwanisa ze tokwahala kuli mu fiwe buikalabelo mwa puteho ki ku “tiiswa ka maata ki Moya wa [Mulimu] mwa mutu wa mwahali.” (Maef. 3:16) Batanga ba bukombwa ni maeluda mwa puteho ya Sikreste ha ba ketiwangi ka liketisa. Mutu u kona feela ku ketiwa ha tiisa bulikani bwa hae ni Jehova. Mi mutu u kona ku tiisa cwañi bulikani bwa hae ni Jehova? Ye ñwi ya linzila za kona ku eza cwalo ka zona ki ka ku zwelapili ku ‘zamaya ka moya’ ni ku ba ni muselo wa ona. (Magal. 5:16, 22, 23) Ha mu nze mu bonisa tulemeno to tu tabisa Mulimu ili to tu tokwahala kuli mu lwale buikalabelo bo bu ekezehile, ni ha mu itusisa likelezo ze mu fiwa, ku ‘zwelapili kwa mina ku ka lemuhiwa ki batu kaufela.’—1 Tim. 4:15.
Mu Tokwa ku ba ni Moya wa Buitomboli
7. Ku sebeleza ba bañwi ku tokwañi?
7 Kuli mu sebeleze ba bañwi mu tokwa ku ikataza ni ku ba ni moya wa buitomboli. Bakeñisa kuli baokameli ba Sikreste ki balisana ba swanisezo, ba iyakatwanga hahulu matata a tahela mutapi. Ha mu bone mwa na ikutwezi muapositola Paulusi ka za musebezi wa hae wa bulisana. Na bulelezi balumeli ka yena ba kwa Korinte kuli: “Ni kile na mi ñolela ni nze ni kalehile, pilu i mwa ziyezi, mi ni lila miyoko ye miñata; mi nesi ku mi swabisa, kono neli kuli mu zibe lilato le lituna le ni mi lata ka lona.” (2 Makor. 2:4) Kwa iponahaza hande kuli Paulusi na ezize musebezi wa hae ka pilu ya hae kaufela.
8, 9. Mu fe mitala ya mwa Bibele ye bonisa ka mo baana ne ba babalelezi batu ba bañwi.
8 Ku zwa kwa makalelo, baana ba ba sebeleza batu ba Jehova ba bonisize hahulu moya wa buitomboli. Ka mutala, Nuwe na si ka bulelela ba ndu ya hae kuli: ‘Mu ni bulelele ha mu ka feza ku yaha aleka kuli ni na ni kene mwateñi.’ Mushe na si ka bulelela Maisilaele ha na li mwa Egepita kuli: ‘Lu ka yo kopanela kwa Liwate le li Fubelu. Mu like ka mo mu konela kaufela ku yo fita kwateñi.’ Joshua na si ka bulela kuli: ‘Mamota a Jeriko ha ka wa mu ni bulelele.’ Mi Isaya na si ka supa mutu u sili ni ku bulela kuli: ‘Ki yani, u lume yena!’—Isa. 6:8.
9 Jesu Kreste na lu tomezi mutala o mutuna wa ku lumeleza moya wa Mulimu ku mu zamaisa. Na itatezi ku amuhela musebezi wa ku liulula batu. (Joa. 3:16) Kana lilato la na bonisize Jesu ka ku itombola ha li swaneli ku lu susueza ku ba ni moya wa buitomboli? Muzwale yo muñwi ya sa bile eluda ka nako ye telele ha na talusa mwa ikutwelanga ka za mutapi, na ize: “Manzwi a Jesu a na bulelezi Pitrosi—a li, lisa lingu za ka—a ni susuezanga hahulu. Halaa lilimo ze fitile, ni itutile kuli mutu wa konwa ku tiiswa ka manzwinyana a lilato kamba ka ku mu eza ka musa. Ni ikolanga hahulu musebezi wa bulisana.”—Joa. 21:16.
10. Kiñi se si kona ku susueza baana ba Sikreste ku latelela mutala wa Jesu wa ku sebeleza ba bañwi?
10 Baana ba mwa puteho ba ba ineezi ba lata ku bonisa moya o swana ni wa na bonisize Jesu kwa lingu za Mulimu. Jesu na ize: “Ni ka mi imulula.” (Mat. 11:28) Ku ba ni tumelo ku Mulimu ni ku lata puteho ku susueza baana ba Sikreste ku kwanisa ze tokwahala kuli ba fiwe musebezi o munde wo, mi ha ba nahani kuli ku eza cwalo ki buitomboli bo butuna hahulu kamba ku taata. Kono ku cwañi haiba muzwale ha tabeli hahulu ku kwanisa ze tokwahala? Kana wa kona ku ba ni takazo ya ku sebeleza puteho?
Mu be ni Takazo ya ku Sebeleza ba Bañwi
11. Mutu u kona cwañi ku ba ni takazo ya ku sebeleza ba bañwi?
11 Haiba ha mu si ka kwanisa ze tokwahala bakeñisa ku ikutwa kuli ha mu koni ku lwala buikalabelo, mu swanela ku kupa moya o kenile. (Luka 11:13) Moya wa Jehova u ka mi tusa ku felisa lipilaelo ze mu kona ku ba ni zona ka za taba ye. Takazo ya ku sebeleza ba bañwi i zwa ku Mulimu, kakuli moya wa Jehova ki ona o susueza muzwale kuli a kwanise ze tokwahala ni ku mu fa maata kuli a eze sebelezo ye kenile. (2 Makor. 4:7; Mafil. 2:13) Kacwalo kwa swanela ku kupa Jehova kuli a mi tuse ku ba ni takazo ya ku amuhela buikalabelo.—Mu bale Samu 25:4, 5.
12. Mutu u kona cwañi ku fumana butali kuli a lwale buikalabelo bwa filwe?
12 Mukreste ya bona kuli ku babalela mutapi ku taata ni kuli ku ka mu patehisa hahulu, u kona ku itulela ku kwanisa ze tokwahala kuli a fiwe buikalabelo. Kamba u kona ku ikutwa kuli ha na hande butali bwa mwa ku lwalela buikalabelo. Haiba ku cwalo, u ka fumana butali haiba a tukufalelwa ku ituta Linzwi la Mulimu ni lihatiso ze tomile fa Bibele. U swanela ku ipuza kuli, ‘Kana ni itomezi nako ya ku itutanga Linzwi la Mulimu, mi kana na kupanga butali?’ Mulutiwa Jakobo na ñozi kuli: “Mutu ku mina ha tokwa butali, a bu kupe ku Mulimu ya fanga batu kamukana ka bufani bo butuna, a sa kanani; mi u ka bu fiwa.” (Jak. 1:5) Kana mwa lumela manzwi ao a tahile ka moya wa Mulimu? Mulimu ha na alabile tapelo ya Salumoni, na mu file “pilu ye na ni butali ni kutwisiso” ili ye ne mu tusize ku lemuha ze nde ku ze maswe ha na atulanga batu. (1 Mal. 3:7-14) Ki niti kuli taba ya Salumoni ne li ye ipitezi. Kono lu na ni buikolwiso bwa kuli Mulimu u ka fa butali baana ba ba filwe buikalabelo mwa liputeho kuli ba babalele lingu za hae hande.—Liprov. 2:6.
13, 14. (a) Mu taluse mwa na amezwi Paulusi ki “lilato la Kreste.” (b) “Lilato la Kreste” li swanela ku lu ama cwañi?
13 Nto ye ñwi ye kona ku lu tusa ku ba ni takazo ya ku sebeleza ba bañwi ki ku nahanisisa lika kaufela za lu ezelize Jehova ni Mwanaa hae. Ka mutala, mu nyakisise liñolo la 2 Makorinte 5:14, 15. (Mu bale.) “Lilato la Kreste li lu sweli” cwañi? Kreste na bonisize lilato ka ku lu shwela kuli a pete tato ya Mulimu, mi lilato leo ne li le lituna hahulu kuli mane ha lu nze lu itebuha lona lipilu za luna za susuezwa. Paulusi na zamaisizwe ki lilato la Kreste. Ne li mu tusize ku sa ba ni buitati ni kuli mulelo wa hae o mutuna ibe ku sebeleza Mulimu ni batu ba mwa puteho mane ni ba kwande.
14 Ku nahanisisa lilato la na ni lona Kreste kwa batu ku lu tusa ku ba ni buitumelo. Kacwalo, lu lemuha kuli ha lu swaneli ni hanyinyani ku “calela nama” ka ku ndongwama likonkwani za buitati ni ku ipatela feela ze lu tabisa. Kono lu eza licinceho mwa bupilo bwa luna ilikuli lu beye musebezi wa lu file Mulimu mwa sibaka sa pili. Lu ‘sebeleza’ mizwale ba luna kabakala kuli lwa ba lata. (Mu bale Magalata 5:13.) Haiba lu ipona kuli lu batanga ba ba sebeleza batu ba Jehova ba ba ineezi, lu ka ba fa likute. Mi kaniti ha lu na ku ba ni moya wa susueza Satani wa ku lata ku nyaza-nyaza.—Sin. 12:10.
Lubasi lu Swanela ku Sebelisana
15, 16. Ba mwa lubasi ba swanela ku ezañi kuli ndate-lubasi a kone ku ketiwa ku ba mutangaa bukombwa kamba eluda?
15 Maeluda ha ba nyakisisa muzwale ya nyezi ili ya na ni bana kuli ba bone nji u kwanisize ze tokwahala kuli a be mutangaa bukombwa kamba eluda, ba nyakisisanga ni mupilelo wa lubasi lwa hae. Mo lu ezeza lubasi lwa hae mwa niti ni mo lu zibahalela ku kona ku tisa kuli a ketiwe kamba ku sa ketiwa. Taba ye i koñomeka musebezi wo lu na ni ona lubasi wa ku tusa ndate-lubasi ya bata ku sebeleza puteho sina mutangaa bukombwa kamba eluda.—Mu bale 1 Timotea 3:4, 5, 12.
16 Jehova wa tabelanga ku bona lubasi lwa Sikreste ha lu swalisana. (Maheb. 6:10) Toho ya lubasi u tokwa ku ezanga lika ka buitikaneleli ilikuli a pete buikalabelo bwa hae mwa puteho ni kuli a zamaise ba ndu ya hae “hande.” Kacwalo ki kwa butokwa kuli eluda kamba mutangaa bukombwa a itutange Bibele ni musalaa hae ni bana ba hae sunda ni sunda ka Nako ya ku Lapela Sina Lubasi ilikuli mañi ni mañi mwa lubasi a tusiwe. U swanela ku yanga ni bona mwa simu kamita. Mi ba mwa lubasi ni bona ba swanela ku swalisana ni toho ya lubasi.
Kana mu ka Fumana Buikalabelo Hape?
17, 18. (a) Haiba muzwale a zwiswa fa buikalabelo bakeñisa kuli ha sa kwanisa ze tokwahala, u tokwa ku ezañi? (b) Muzwale ya na banga eluda kamba mutangaa bukombwa kwamulaho u swanela ku ba ni mubonelo mañi?
17 Mwendi ne mu banga maeluda kamba batanga ba bukombwa ka nako ye ñwi. Mwa lata Jehova mi mu na ni buikolwiso bwa kuli u sa mi tokomela. (1 Pit. 5:6, 7) Kana ne mu taluselizwe kuli mu tokwa ku eza licinceho ze ñwi? Mu itumelele mafosisa ni ku belekela ku ona ka tuso ya Mulimu. Mu si ke mwa ba ni sikoto kwa pilu. Mu be ni butali mi mu bonise moya o munde. Muzwale yo muñwi ya na bile eluda ka nako ye telele kono ili ya na zwisizwe fa buikalabelo bwa hae, na ize: “Ne ni itamile kuli ni ka zwelapili ku yanga kwa mikopano ni mwa simu, ni ku balanga Bibele, sina mo ne ni ezezanga inge ni sa li eluda, mi ne ni konile ku eza cwalo. Ne ni itutile ku ba ni pilu-telele kakuli ne ni nahana kuli ne ni ka ketiwa sinca ku ba eluda hamulaho wa silimo si li siñwi kamba ze peli, kono ne ku fitile lilimo ze bato ze 7 kuli ni ketiwe sinca. Halaa nako yeo ne ni tusizwe hahulu ki susuezo ya kuli ni si ke na zwafa kono ni zwelepili ku tukufalelwa ku kwanisa ze tokwahala kuli ni fiwe buikalabelo.”
18 Haiba mu mwa muinelo o swana ni wa muzwale yo, mu si ke mwa zwafa. Mu nahanisise ka mo Jehova a fuyaulela bukombwa bwa mina ni lubasi lwa mina. Mu tuse lubasi lwa mina kuli lu be ni bulikani bo bu tiile ni Jehova, mu lekulange bakuli, mi mu tiise ba ba fokola. Mi sihulu mu katelwe tohonolo ye mu na ni ya ku lumbeka Mulimu ni ku zibahaza taba ye nde ya Mubuso sina yo muñwi wa Lipaki za Jehova.a—Samu 145:1, 2; Isa. 43:10-12.
Mu Itatube
19, 20. (a) Mizwale bote ba ba kolobelizwe ba susuezwa ku ezañi? (b) Lu ka nyakisisañi mwa taba ye tatama?
19 Baokameli ni batanga ba bukombwa ba tokwahala hahulu kacenu. Kacwalo, lu susueza mizwale bote ba ba kolobelizwe kuli ba itatube ni ku ipuza kuli, ‘Haiba ha ni mutangaa bukombwa kamba eluda, ki kabakalañi ha ni si ka ketiwa?’ Haike moya wa Mulimu u mi tuse ku ba ni mubonelo o munde mwa taba ya butokwa ye.
20 Batu ba mwa puteho kaufela ba ka tusiwa kabakala buitomboli bwa balumeli ka bona. Ha lu eza ba bañwi ka musa lu ka ba ni tabo ye tiswa ki ku sebeleza ba bañwi ni ku calela moya. Kono sina mo i ka boniseza taba ye tatama, ha lu swaneli ku swabisa moya o kenile wa Mulimu. Lu kona ku eza cwañi kuli lu si ke lwa swabisa moya o kenile?
[Litaluso za kwatasi]
Mu Kona ku Alaba Cwañi?
• Bupolofita bo bu kwa Mika 5:5 bu lu fa buikolwiso mañi?
• Ku ba ni moya wa buitomboli ku talusañi?
• Mutu u kona cwañi ku ba ni takazo ya ku sebeleza ba bañwi?
• Swalisano ya lubasi ki ya butokwa cwañi kuli muuna a kone ku ketiwa ku ba mutangaa bukombwa kamba eluda?
[Maswaniso a fa likepe 25]
Mu kona ku ezañi kuli mu kwanise ze tokwahala?