Muyemele Bubusi Bwa Jehova!

1, 2. Ki buikolwiso mañi bwaswanela kuba ni bona mañi ni mañi waluna? (Mubone siswaniso sesi fahalimu.)

SINA mone luitutezi mwa taba yefelile, Diabulosi upiha kuli Jehova haana tukelo ya kubusa, mi batu bakona kupila hande haiba baipusa ili bona. Kana Satani naabulezi niti? Luungeni kuli batu babaketa kuipusa nebakona kupila kuya kuile. Kana nebaka pila hande kusina kubusiwa ki Mulimu? Kana nemukaba ni tabo hane mukaba ni tukuluho yetuna ya kusabusiwa ki Mulimu, kono inze munani bupilo bobusa feli?

² Hakuna yakona kumialabela lipuzo zeo. Mañi ni mañi waluna uswanela kunahanisisa ka za lipuzo zeo. Halueza cwalo, lukalemuha hande kuli bubusi bwa Mulimu ki bona bobuswanela. Bubusi bo, ki bona bobunde ka kufitisisa. Mi luswanela kubuyemela ka pilu yaluna kaufela. Zeibulela Bibele lilutusa kuba ni buikolwiso bobucwalo. Ka mutala, munyakisise zalubulelela Mañolo ka za kuli Jehova ki yena yaswanela kuba mubusi.

JEHOVA UNANI TUKELO YA KUBUSA

3. Ki kabakalañi Jehova haali feela yena yaswanela kuba Mubusi?

³ Jehova ki yena yaswanela kuba Mubusi wa pupo kaufela bakeñisa kuli ki Mulimu Yamaata Kaufela, mi ki yena Mubupi. (1 Makol. 29:11; Lik. 4:24) Kwa Sinulo 4:11, ba 144,000 babaka busa ni Kreste kwa lihalimu bataluswa mwa pono inze babulela kuli: “Waswanela, wena Jehova Mulimu waluna, kufiwa kanya ni likute ni maata, kakuli neubupile lika kaufela, mi ki kabakala tato yahao hane libile teñi ni hane libupilwe.” Kaniti, bakeñisa kuli Jehova ki yena yabupile lika kaufela, unani tukelo luli ya kubusa batu hamohocwalo ni libupiwa za moya.

4. Ki kabakalañi kulwanisa bubusi bwa Mulimu hakuli kuitusisa maswe tukuluho yelufilwe ya kuiketela za kueza?

⁴ Satani hakuna sabupile. Kabakaleo, haana tukelo ya kuba mubusi wa pupo kaufela. Ka kukwenuhela bubusi bwa Jehova, Satani ni bo muuna ni musali bapili nebabonisize kuli nebanani buikuhumuso. (Jer. 10:23) Ki niti kuli ka kuba libupiwa zenefilwe tukuluho ya kuiketela, nebakona kuiketela kuhana kubusiwa ki Mulimu. Kono kana nebanani tukelo ya kuunga muhato ocwalo bakeñisa kuba ni tukuluho yeo? Batili. Kuba ni tukuluho ya kuiketela za kueza kutusa batu kueza likatulo zeswanela zazi ni zazi. Kono tukuluho yecwalo hai bafi tukelo ya kukwenuhela Mubupi wabona ni Mufani wa bupilo bwabona. Taba yeo ibonisa hande fokusweu kuli, kulwanisa Jehova ki kuitusisa maswe tukuluho yelufilwe ya kuiketela za kueza. Luna batu lutokwa kuba mwatasaa puso ya Jehova yelukile.

5. Ki kabakalañi halukona kukolwa kuli likatulo za Mulimu lilukile?

⁵ Kunani libaka leliñwi Jehova haali yena Mubusi yaswanela. Uitusisanga maata ahae ka kuya ka katulo yelukile. Ubulela kuli: “Ki na Jehova, yabonisa lilato lelisa feli, katulo yelukile, ni kuluka mwa lifasi, kakuli nitabela zeo.” (Jer. 9:24) Jehova haasika itinga fa milao ifi kamba ifi yeñozwi, ili yebapangile batu babasika petahala kuli azibe zende, zelukile. Katulo yahae yelukile isimuluha ku yena muñi kakuli ki mona mobuinezi butu bwahae, mi uitusisanga katulo yeo kufa batu milao. Lwakona kukolwa kuli milao yahae, likuka ni likatulo zahae kaufela lilukile bakeñisa kuli “kuluka ni katulo yelukile ki zona mutomo wa lubona [lwahae].” (Samu 89:14; 119:128) Kono Satani upalezwi kutahisa lifasi mokuezwa feela lika zelukile, niha piha kuli bubusi bwa Jehova habusika luka.

6. Ki lifi libaka leliñwi Jehova haanani tukelo ya kubusa lifasi?

⁶ Hape, Jehova ki yena Mubusi yaswanela bakeñisa kuli unani zibo ni butali zemukonisa kubabalela pupo. Ka mutala, Mulimu naakonisize Mwanaa hae kufolisa matuku ane bapalezwi kufolisa baalafi. (Mat. 4:23, 24; Mare. 5:25-29) Ku Jehova, yeo nesi makazo. Wautwisisa moiinezi mibili yaluna mi unani maata a kutusa batu kuba mwa buiketo haiba bakula. Mi hape unani maata a kuzusa bafu ni kutibela likozi za ka taho.

7. Butali bwa Jehova bufita cwañi butali bwa lifasi lelibusiwa ki Satani?

⁷ Lifasi lelibusiwa ki Satani lisabata linzila za kutatulula ka zona lifapahano zeliteñi mwahalaa linaha ni macaba. Jehova ki yena feela yanani butali bwa kutahisa kozo mwa lifasi kaufela. (Isa. 2:3, 4; 54:13) Halunze luituta za zibo ni butali bwa Jehova, luikutwa sina mwanaaikutwezi muapositola Paulusi, yanaañozi ka kususumezwa ki moya wa Mulimu kuli: “Buliba bwa bufumu bwa Mulimu ki bobutuna, ni butali, ni zibo yahae! Likatulo zahae halikoni kubatisiswa mi linzila zahae halikoni kufumanwa!”—Maro. 11:33.

PUSO YA JEHOVA KI YONA YENDE KA KUFITISISA

8. Ki lika mañi zeemitabisa ka za mwabuseza Jehova?

⁸ Bibele haibonisi feela kuli Jehova ki yena yanani swanelo ya kubusa. Kono hape ibonisa libaka bubusi bwa Mulimu habufita lipuso zeñwi. Libaka leliñwi kikuli Mulimu ubusa ka lilato. Kaniti, lwatabelanga kuba mwatasaa puso yahae bakeñisa mwaitusiseza maata a bubusi bwahae. Ki Mulimu “yanani makeke ni mukekecima, yasaakufi kuhalifa ni yatezi lilato lelisa feli ni niti.” (Exo. 34:6) Mulimu ubonisanga likute kwa batanga bahae ba batu. Walubabalela kufita molukona kuipabalela luna bañi. Jehova haatimangi batanga bahae babasepahala nto ifi kamba ifi yende, sina mwapihelela Diabulosi. Kakuli mane, naalufile Mwanaa hae wa butokwa kuli lukone kuba ni sepo ya bupilo bobusa feli!—Mubale Samu 84:11; Maroma 8:32.

9. Luziba cwañi kuli Mulimu waiyakatwa mañi ni mañi waluna?

⁹ Jehova haababalelangi feela batu bahae ka sikwata. Hape ubonisanga kuli uiyakatwa hahulu yomuñwi ni yomuñwi wa batanga bahae. Ka mutala, halunyakisiseñi zeneezahezi mwa lilimo ze 300, ka nako yeo Jehova naaketa baatuli ni kubafa maata a kupunyusa sicaba sa Isilaele kwa macaba anaa banyandisa. Mwahalaa yona nako yetaata yeo, Jehova naakonile kulemuha musali yomuñwi yasi Muisilaele yabizwa Ruti. Musali yo naasiile lika zeñata ni kukala kuswalisana ni bulapeli bwa niti. Jehova naafuyauzi Ruti ka kumutusa kufumana muuna ni kupepa mwana. Kono haki zeo feela. Ruti haakazusiwa kwa bafu, ukafita fa kuziba kuli mwanaa hae naabile mwa lusika mokusimuluhile Mesia. Mi munahane feela tabo yakaba ni yona hakalemuha kuli likande la bupilo bwahae neliñozwi mwa buka ya mwa Bibele, yebizwa ka libizo lahae!—Ruti 4:13; Mat. 1:5, 16.

10. Ki kabakalañi bubusi bwa Jehova habusa paleliswi batu kuba ni tukuluho?

¹⁰ Jehova haabusangi ka nzila yesituhu kamba yetaata. Puso yahae ifa batu tukuluho ni kubakonisa kupila ka tabo. (2 Makor. 3:17) Davida naatalusize taba yeo cwana: “Likute ni kanya li fapilaa hae [Mulimu]; maata ni tabo li mwa sibaka sapila ku sona.” (1 Makol 16:7, 27) Ka nzila yeswana, muñoli wa samu yeñwi yabizwa Etani, naañozi kuli: “Tabo ki ya batu babaziba muhuwo wa nyakalalo. Bazamaya mwa liseli la pata yahao, wena Jehova. Bataba kabakala libizo lahao lizazi kaufela, mi babubekiwa ka kuluka kwahao.”—Samu 89:15, 16.

11. Lukona kutiisa cwañi buikolwiso bwaluna bwa kuli bubusi bwa Jehova ki bona bobunde ka kufitisisa?

¹¹ Kunahanisisanga kamita ka za bunde bwa Jehova kwakona kutiisa buikolwiso bolunani bona bwa kuli puso yahae ki yona yende ka kufitisisa. Lukaikutwa sina mwanaaikutwezi muñoli yomuñwi wa samu, yanaaize: “Kuina lizazi lililiñwi mwa malapa ahao ki kokunde kufita kuina mazazi a 1,000 kusili!” (Samu 84:10) Hakuna niti yefita yeo! Ka kuba Mubupi waluna yalilato, Jehova waziba zelutokwa kuli lube ni tabo sakata, mi ulufanga lika zeo ka buñata. Lika zatokwa Jehova kuli lueze ki zeelutusa mi lilutahisezanga tabo yetuna. Kumamela litaelo zahae kuka lutusa niha lukatokwa kueza buitomboli bobuñwi.—Mubale Isaya 48:17.

12. Ki lifi libaka lelituna leli lususueza kuyemela bubusi bwa Jehova?

¹² Bibele ibonisa kuli hamulaho wa Puso ya Kreste ya Lilimo ze 1,000, batu babañwi bakaketa kukwenuhela bubusi bwa Jehova. (Sin. 20:7, 8) Ki lika mañi zekatahisa kuli batu bao baeze cwalo? Hamulaho wa kulukululwa mwa tolongo, Diabulosi kaniti ukalika kukukueza batu kuli babonise moya wa buitati. Saaezize cwalo kuzwa fela kwa makalelo. Mwendi ukabata kukolwisa batu kulumela kuli bakona kupila kuya kuile kusina kuutwa Jehova. Kono lwaziba kuli taba yeo haikonahali. Kono sisupo sesituna ki sa kuli: Kana lukalumela taba ya buhata yecwalo? Haiba lwalata Jehova mi lumusebeleza kabakala bunde bwahae, ni kabakala kuli ki yena Mubusi wa pupo yaswanela, haluna kuteeleza nihanyinyani kwa taba yecwalo yenyenyisa. Lukaitakaleza feela kupila mwatasaa puso yeswanela ya Jehova, ili yelilato, mi haluna kulakaza nihanyinyani kupila ka nzila yeñwi.

MUYEMELE BUBUSI BWA MULIMU KA BUSEPAHALI

13. Lukona kubonisa cwañi kuli lwayemela bubusi bwa Mulimu?

¹³ Kaniti luswanela kuyemela bubusi bwa Jehova ka pilu yaluna kaufela. Sina moluitutezi, ki yena yanani tukelo ya kubusa, mi bubusi bwahae ki bona bobunde ka kufitisisa. Lubonisa kuli luyemela bubusi bwa Jehova ka kuzwelapili kusepahala ku yena ku sina taba ni miinelo yelukopana ni yona ni ka kusebeleza Mulimu ka busepahali. Ki mwa linzila lifi zeñwi molukona kuboniseza kuli lwayemela bubusi bwahae? Lukona kueza cwalo haiba lueza lika ka kuya ka tato ya Jehova. Haiba lulikanyisa Jehova mwa lika zelueza, lubonisa kuli lwamulata ni kuli luyemela bubusi bwahae.—Mubale Maefese 5:1, 2.

14. Baana-bahulu ni litoho za mabasi bakona kulikanyisa cwañi Jehova?

¹⁴ Mwa Bibele, luitutile kuli Jehova uitusisanga maata ahae ka nzila yelilato. Kacwalo, litoho za mabasi ni baana-bahulu babalata bubusi bwahae habana kuimeza batu baba mwatasaa pabalelo yabona, kamba kueza inge kuli banani maata a kubabusa. Kono bakalikanyisa Jehova. Paulusi ki yomuñwi wa batu bane balikanyisize Mulimu ni Mwanaa hae. (1 Makor. 11:1) Paulusi naasika tahiseza batu babañwi kuikutwa bumaswe kamba kubahapeleza kuli baeze sesilukile. Kono naabakupile ka lilato. (Maro. 12:1; Maef. 4:1; Fil. 8-10) Jehova ki mona mwaezezanga lika cwalo. Kacwalo, batu baba mulata ni babayemela puso yahae baswanela kuezanga cwalo ni bona.

15. Halukuteka batu baafile Jehova maata a kuzamaisa, lubonisa cwañi kuli lwayemela bubusi bwahae?

¹⁵ Luswanela kuunga cwañi batu baafile Mulimu maata a kuzamaisa? Haiba luswalisana ni bona ka likute, lubonisa kuli lwayemela bubusi bwa Jehova. Nihaikaba kuli haluutwisisi hande kamba kulumelelana ni katulo yeezizwe, lusatokwa kuyemela bubusi bwa Mulimu. Muezezo wo, ushutana hahulu ni mobaezeza lika batu mwa lifasi, kono Jehova ubata kuli lueze cwalo haiba lubata kubusiwa ki yena. (Maef. 5:22, 23; 6:1-3; Maheb. 13:17) Kueza cwalo kwalutusa, kakuli mulelo wa Mulimu ki kubata kulutusa.

16. Batu babayemela bubusi bwa Mulimu baezanga cwañi likatulo?

¹⁶ Hape lukona kubonisa kuli lwayemela bubusi bwa Mulimu ka likatulo zelueza. Jehova haalufangi milao ya kulatelela mwa nto ni nto yelueza. Kono ulufanga ketelelo yeelutusa kuziba mubonelo wahae. Ka mutala, haasika lufa milao yenongile yebonisa mobaswanela kuapalela Bakreste. Kono ubata kuli luapale ni kuikabisa ka nzila yebonisa likute ni yeswanela Bakreste. (1 Tim. 2:9, 10) Hape haatabeli kuli lusitatalise babañwi kamba kubafilikanya ka likatulo zelueza. (1 Makor. 10:31-33) Haiba lueza likatulo sihulu ka kuya ka mwabatela Jehova, isiñi feela ka molubatela luna, foo lubonisa kuli lwalata puso yahae mi lwaiyemela.

17, 18. Ki mwa linzila lifi zeñwi mo bo muuna ni musali babanyalani bakona kubonisa kuli bayemela bubusi bwa Jehova?

¹⁷ Halunyakisiseñi nzila yeo Bakreste babanyalani bakona kubonisa ka yona kuli balatelela linzila za Jehova, ni kubonisa hape kuli bayemela bubusi bwahae. Bakreste bao bakona kueza cwañi haiba linyalo labona liba ni matata amatuna kufita mone balibelela? Kucwañi haiba bakalisa kuikutwa kuli habana tabo mwa linyalo labona? Mwa muinelo ocwalo, bakona kunahanisisa mo Jehova naasebelisanezi ni Maisilaele. Jehova naaitalusize kuli naaswana sina muunaa sicaba sa Isilaele sa kwaikale seo. (Isa. 54:5; 62:4) Sicaba seo nesikuta-kutezi kufoseza Jehova, ili kubonisa kuli linyalo labona nelibile lelitaata hahulu. Nihakulicwalo, Jehova naasika yubeka kapili sicaba seo. Naazwezipili kusiswalela ni kusepahala kwa tumelelano yanaaezize ni sona. (Mubale Samu 106:43-45.) Kana lilato lelisa feli lanaabonisize Jehova leo hali lususuezi kusutelela ku yena?

¹⁸ Kacwalo, bo muuna ni musali babanyalani ili babalata linzila za Jehova bamulikanyisanga mwa lika zebaeza. Haiba bakopana ni butata, hababatangi kufeza linyalo labona ka nzila yesi ya ka Mañolo. Balemuha kuli Jehova ki yena yabakopanyize hamoho mi ubata kuli ‘bakumalelane.’ Nzila feela inosi ya mwa Mañolo yelumeleza teleko ni kulumeleza mutu kunyala kamba kunyalwa ku mutu usili, ki haiba yanyalani ni yena aeza buhule. (Mat. 19:5, 6, 9) Haiba bo muuna ni musali babanyalani balika ka taata kubata nzila ya kukondisa ka yona linyalo labona ni kutatulula butata bwabona, babonisa kuli bayemela puso ya Jehova yelukile.

19. Haiba lupalelwa kuyemela bubusi bwa Mulimu ka linako zeñwi, ki sika mañi seluswanela kueza?

¹⁹ Ka kuba batu babasika petahala, lwaziba kuli ka linako zeñwi, lukafoseza Jehova. Jehova waziba cwalo, mi ka lilato, ulufile sitabelo sa Kreste sesikona kululiulula kwa sibi. Kacwalo, haiba lufoseza Jehova ka nzila yeñwi, luswanela kumukupa kuli aluswalele. (1 Joa. 2:1, 2) Mwa sibaka sa kuzwelapili kuikutwa mulatu, luswanela kulika ka taata kuituta kwa mafosisa aluna. Haiba luzwelapili kusutelela ku Jehova, uka luswalela ni kulutusa kusanahana hahulu za bufosi bwaluna, mi uka lufa maata a kutiyela muinelo oswana wo haiba lukopana ni ona kwapili.—Samu 103:3.

20. Ki kabakalañi haluswanela kuyemela bubusi bwa Jehova kacenu?

²⁰ Mwa lifasi lelinca, batu kaufela bakabusiwa ki Jehova mi bakaituta linzila zahae zelukile. (Isa. 11:9) Kono nihaiba kacenu, lusweli lwalutiwa lituto zeñata ka za linzila zeo. Mi taba yeama bubusi bwa Jehova seiya inze itatululwa. Ye ki yona nako ya kuyemela bubusi bwa Mulimu ka kubonisa kuli lwasepahala ku yena, ka kumusebeleza, ni ka kulika ka taata kumulikanyisa mwa lika kaufela zelueza.