Tabo Ki Kalemeno Kakazwa ku Mulimu

BATU batabela kuba ni tabo mwa bupilo. Kono mwa mazazi a mafelelezo a, batu kaufela bakopana ni miinelo ‘yeziyeza.’ (2 Tim. 3:1) Lika zesika luka, makulanu, kutokwa misebezi, maswabi, ni miinelo yemiñwi yetahisa lipilaelo, likona kutahisa kuli batu babañwi bafelelwe ki tabo yene banani yona. Nihaiba batanga ba Mulimu bakona kuzwafa ni kufelelwa ki tabo. Haiba hamusana tabo, mukona kueza cwañi kuli mube ni tabo hape?

Kuli lualabe puzo yeo, pili lutokwa kuziba kuli tabo ya niti ki nto mañi, ni kuziba lika zetusize babañwi kuzwelapili kuba babatabile niha bakopana ni miinelo yetaata. Kihona lukaituta zelukona kueza kuli luzwelepili kuba ni tabo ni kuekeza kwa tabo yaluna.

TABO KI NTO MAÑI?

Kuba ni tabo hakutalusi kubonisa feela fahalimu kuli mutu utabile. Ka mutala, mutu yakozwi bucwala wakona kuikashaula kuseha. Kono hasaakololokwile, watuhela kuseha, mi unani kutalimana ni miinelo yetaata yanaali ku yona. Maikuto ahae neli feela a ka nakonyana, mi nesi tabo luli.—Liprov. 14:13.

Kono tabo yona ki kalemeno kakazwelela kwatasaa pilu. Tabo italusizwe kuli ki “maikuto abanga ni ona mutu hafumani nto yeñwi kamba halibelela nto yeñwi yende.” Kuba ni tabo kutalusa kuba mutu yatabile kusina taba ni miinelo yeluli ku yona, ibe yeminde kamba yemaswe. (1 Mates. 1:6) Mane mutu wakona kukopana ni butata bobuñwi kono inze atabile mwa pilu. Ka mutala, baapositola nebashapakilwe kabakala kukutaza za Kreste. Niteñi, “bazwa fapilaa kuta ya Sanhedrini, inze batabile kakuli nebaezizwe babalukela kushwaulwa kabakala libizo lahae.” (Lik. 5:41) Nebasika taba kabakala kuli nebashapakilwe. Kono ka kuba batanga ba Mulimu, nebatabile kabakala kuli nebazwezipili kusepahala ku yena.

Halusika pepwa inze lunani tabo; mi kalemeno kao hakaitahelangi feela. Kabakalañi? Kabakala kuli tabo ya niti ki kalulo ya muselo wa moya wa Mulimu okenile. Ka kutusiwa ki moya wa Mulimu, lwakona kuba ni “butu bobunca,” bobukopanyeleza kuba ni tabo. (Maef. 4:24; Magal. 5:22) Mi haluba ni tabo, kuka lubela bunolo kutalimana ni miinelo yetaata mwa bupilo.

MITALA YELUSWANELA KULIKANYISA

Jehova naabata kuli kube ni lika zende fa lifasi, isiñi lika zemaswe zeatile zelusweli kuiponela kacenu. Niteñi, lika zemaswe zebaeza batu halipaleliswi Jehova kuba ni tabo. Linzwi la Mulimu libulela kuli: “Maata ni tabo li mwa sibaka sapila ku sona.” (1 Makol. 16:27) Hape, lika zende zebaeza batanga ba Jehova ‘litabisa pilu yahae.’—Liprov. 27:11.

Lwakona kulikanyisa Jehova ka kusabilaela hahulu haiba lika lisaezahali ka mone luhupulela. Mwa sibaka sa kufelelwa ki tabo, luswanela kuisa pilu kwa lika zende zelunani zona cwale ni kulibelela ka pilu-telele lika zende hahulu zekaba teñi kwapili.a

Hape lwakona kuituta kwa mitala ya batu bababulezwi mwa Bibele bane bazwezipili kuba ni tabo niha nebali mwa miinelo yetaata. Abrahama naatiyezi miinelo yetaata yeneka tahisa kuli abulaiwe ni miinelo yemiñwi yetaata yenetahisizwe ki babañwi. (Gen. 12:10-20; 14:8-16; 16:4, 5; 20:1-18; 21:8, 9) Niha naali mwa miinelo yecwalo, Abrahama naazwezipili kuba ni tabo. Ki lika mañi zene mukonisize kuitiisa? Naazwezipili kunahanisisa sepo yanaanani yona ya kupila mwa lifasi lelinca mwa Mubuso okabusiwa ki Mesia. (Gen. 22:15-18; Maheb. 11:10) Jesu naabulezi kuli: “Abrahama ndataa mina naatabile hahulu kuba ni sepo ya kubona lizazi laka.” (Joa. 8:56) Lwakona kulikanyisa mutala wa Abrahama ka kunahanisisanga linako zetabisa zelulibelela kwapili.—Maro. 8:21.

Ka kuswana ni Abrahama, muapositola Paulusi ni mulikanaa hae Silasi, nebaisize pilu kwa lisepiso za Mulimu. Nebanani tumelo yetiile, mi nebazwezipili kuba ni tabo kusina taba ni lika zemaswe zeneezahezi ku bona. Ka mutala, hamulaho wa kunatakiwa hahulu ni kukenyiwa mwa tolongo, “fahalaa busihu, Paulusi ni Silasi nebalapela ni kulumbeka Mulimu ka lipina.” (Lik. 16:23-25) Bo Paulusi ni Silusi nebabile ni tabo kabakala sepo yene banani yona, mi nebatabile bakeñisa kuli nebanyandiswa kabakala libizo la Kreste. Lwakona kulikanyisa mutala wa Paulusi ni Silasi ka kunahanisisanga limbuyoti zelukaba ni zona haiba lusebeleza Mulimu ka busepahali.—Mafil. 1:12-14.

Mwa linako zaluna, kunani mitala yeminde yemiñata ya mizwale ni likaizeli babazwezipili kuba ni tabo niha bakopana ni manyando. Ka mutala, mwa November 2013, nekubile ni liñungwa lelituna (lelibizwa Super Typhoon Haiyan) mwa sibaka sesi mwahalaa naha ya Philippines, mi nelisinyize mandu a Lipaki za Jehova afitelela 1,000. Muzwale George yanaasinyehezwi ki ndu yahae yeneli mwa muleneñi wa Tacloban, naabulezi kuli: “Mizwale batabile kusina taba ni zeezahezi. Hanizibi feela monikona kutaluseza tabo yeluikutwa.” Ni luna halukopana ni miinelo yetaata, lwakona kuzwelapili kuba ni tabo haiba lunahanisisa ni kuitumela lika zaluezelize Jehova. Ki lika mañi zeñwi zalufile Jehova zekona kulutahiseza tabo?

LIBAKA HALULI BABATABILE

Libaka lelituna halunani tabo kikuli lunani silikani sesinde ni Mulimu. Munahane feela taba ye: Lwaziba Mubusi wa Pupo Kaufela. Mi ki Ndataa luna, Mulimu waluna, ni Mulikanaa luna!—Samu 71:17, 18.

Hape lwaitumela kuli Mulimu ulufile mpo ya bupilo ni kulukonisa kuikola bona. (Muek. 3:12, 13) Bakeñisa kuli Jehova uluhohezi ku yena, lwakona kuutwisisa zabata ku luna. (Makolo. 1:9, 10) Kabakaleo, lwaziba mulelo wa bupilo ni moluswanela kupilela. Kono batu babañata habazibi mulelo wa bupilo. Mane Paulusi naabonisize shutano yeliteñi mwahalaa luna ni batu bao hanaañozi kuli: “‘Liito halisika bona ni zebe haisika utwa, mi nihaiba pilu ya mutu haisika utwisisa lika zeo Mulimu alukiselize baba mulata.’ Kakuli ki luna bapatululezi Mulimu lika zeo ka moya wahae.” (1 Makor. 2:9, 10) Kuziba tato ya Mulimu ni mulelo wahae kulutahiseza tabo yetuna.

Halunyakisiseñi lika zeñwi zaluezelize Jehova. Lutabile kuli libi zaluna zakona kuswalelwa. (1 Joa. 2:12) Hape, bakeñisa kuli Mulimu unani sishemo, ulufile sepo ya kuli hona cwale-cwale fa, lukato pila mwa lifasi lelinca. (Maro. 12:12) Mane nihaiba ka nako ya cwale, Jehova ulufile mizwale ni likaizeli kuli luswalisane ni bona kumulapela. (Samu 133:1) Linzwi la Mulimu hape lilukolwisa kuli Jehova usileleza batu bahae ku Satani ni Madimona ahae. (Samu 91:11) Haiba lunahanisisa limbuyoti zeo kaufela zalufile Mulimu, lukaba ni tabo yetuna.—Mafil. 4:4.

MOMUKONA KUEKELEZA KWA TABO YAMINA

Kana kwakonahala kuli Mukreste yanani tabo aekeze kwa tabo yahae? Jesu naabulezi kuli: “Nimibulelezi lika ze, kuli tabo yaka ibe ku mina mi tabo yamina ikwanelele.” (Joa. 15:11) Taba yeo ibonisa kuli lwakona kuekeza kwa tabo yelunani yona. Kuikataza kuekeza kwa tabo yamina kuswana ni kukoteza mulilo. Kuli mulilo uzwelepili kutuka, muswanela kuukoteza ka kubeya kwateñi likota zeñata. Ka nzila yeswana, muswanela kueza lika zeka mitusa kutiya kwa moya kuli muekeze kwa tabo yamina. Muhupule kuli moya wa Mulimu ki ona olutusa kuba ni tabo. Kacwalo, mukakona kuekeza kwa tabo yamina haiba kamita mukupa moya wa Jehova kuli umituse, mi muswanela kulapelanga ni kunahanisisa litaba zemubala mwa Linzwi la Mulimu, lona leliñozwi ka kususumezwa ki moya wahae.—Samu 1:1, 2; Luka 11:13.

Hape mwakona kuekeza kwa tabo yamina haiba mutukufalelwa mwa misebezi yetabisa Jehova. (Samu 35:27; 112:1) Kabakalañi? Kabakala kuli nelubupilwe kuli ‘lusabe Mulimu wa niti ni kumamela milao yahae, kakuli yeo ki yona swanelo kaufela ya mutu.’ (Muek. 12:13) Taba yeo ibonisa kuli nelubupilwe kuli lueze tato ya Mulimu. Kacwalo, halusebeleza Jehova, lukaikola hahulu bupilo.b

LIMBUYOTI ZETISWA KI KUBA NI TABO

Haluba ni kalemeno ka Mulimu ka tabo, haluna kuba feela ni maikuto amande, kono hape lukaba ni limbuyoti zeñata. Ka mutala, lukatabisa Ndataa luna ya kwa lihalimu halunze lumusebeleza ka tabo kusina taba ni miinelo yetaata yelukopana ni yona. (Deut. 16:15; 1 Mates. 5:16-18) Hape, kuba ni tabo kuka lutusa kuambuka moya wa kulata hahulu sifumu, mi lukaitoboha lika zeñwi kuli luzwisezepili Mubuso wa Mulimu. (Mat. 13:44) Mi haluka iponela limbuyoti zetiswa ki buitomboli bwaluna, lukaba ni tabo yetuna, mi lukatahisa kuli babañwi ni bona babe ni tabo.—Lik. 20:35; Mafil. 1:3-5.

Mubatisisi wa litaba wa fa sikolo sesipahami sa University of Nebraska kwa United States, naañozi taba yeñwi hamulaho wa kuituta za buikangulo bwa batu. Naañozi kuli: “Haiba munani tabo mi mwaikola bupilo ka nako ya cwale, mukaba ni mibili yeikanguzi kwapili.” Taba yeo ilumelelana ni zeibulela Bibele, haitalusa kuli: “Pilu yetabile ki mulyani omunde.” (Liprov. 17:22) Kaniti luli, hamuekeza kwa tabo yamina, mukaba ni mibili yeikanguzi.

Kacwalo, kusina taba kuli lupila mwa linako zetaata, lwakona kuba ni tabo ya niti haiba lulapela ku Jehova kuli alufe moya okenile ni kuituta Linzwi lahae, hamohocwalo ni kunahanisisa zeluituta. Hape, lwakona kuekeza kwa tabo yaluna ka kunahanisisanga limbuyoti zeluikola ka nako ya cwale, kulikanyisa tumelo ya babañwi, ni kueza tato ya Mulimu. Halueza cwalo, lukabonisa kuli manzwi a kwa Samu 64:10 ki a niti, aali: “Yalukile ukataba kabakala Jehova mi ukasabela ku yena.”