Ku Fumaneha fa Mikopano—Ki Buikalabelo Bo Butuna

¹ M’u nga ku fumaneha kwa mikopano ka butuna bo bu cwañi? Yeo ki puzo y’e batisisa maikuto, nji cwañi? Ku si na ku kakanya buñata bwa luna lu ikutwa kuli lwa itebuha mikopano. Niteñi, lipiho li bonisa kuli palo ya ba ba fumaneha fa mikopano mwa liputeho ze ñata cwanoñu fa ikutezi kwatasi. Ki sika mañi se ne si kana sa tahisa cwalo? Kana ba bañwi ku luna lu tuhelela misebezi ya silifasi ye si ya butokwa, ku katala, misebezi ya lituto za kwa sikolo, ku sa ikutwa hande mwa mubili, kamba muinelo o maswe wa mahalimu kuli u filikanye tamo ya luna ya ku fumaneha fa mikopano kamita? (Deut. 31:12) Bakeñisa kuli yeo ki taelo ya mwa Mañolo, yo muñwi ni yo muñwi wa ku luna u swanela ku fa nahanisiso y’e buniti kwa puzo ye, Ku fumaneha kwa mikopano ni k’u nga ka butuna bo bu cwañi?

² Mizwale ba luna ba bañwi ba zamaya lihora ze ñata mwa mikwakwa y’e liluli mi ba sila linuka mo ku tezi likwena kuli ba y’o fumaneha kwa mikopano. Mwa puteho ya habo mina, ne ku kana kwa ba ni bao ba ba sepahala ba ba ‘sa shuti’ ku si na taba ni mapongo a matuna, buyanga bwa kwa mubili, ku ñatafala kwa musebezi kwa mubeleko wa bona, kamba likalulo za lituto za kwa sikolo ze tokwa nako ye ñata. (Lu. 2:37) Ki kabakalañi ha ba eza ka buikatazo kuli ba t’o fumaneha teñi? Kakuli ba izibela kuli ha ba koni ku tula but’ata bwa lifasi le, le li tezi sineneketo ka m’ata a bona fela. Ba lukela ku itinga fa m’ata ao Mulimu a fa.—2 Makor. 12:9, 10.

³ Kacenu lu latelela sikuka se si tomilwe ki Bakreste ba kwa makalelo, bao ne ba kopana kamita kwa neku la ku lapela, ku abana ze bonwi, ni ku ituta Linzwi la Mulimu. (Lik. 4:23-30; 11:4-18; Makolo. 4:16) Lu amuhel’anga taelo ya za bupolofita bwa Bibele ni tuto ye ñwi, buipuluko bwa mayemo a bumulimu ni mizamao ya Sikreste, hamohocwalo ni monyehelo ya ka bunako kwa neku la ku kondolokisa mipilelo ya luna cwale ka ku sebelisa ka tokomelo likuka za mwa Mañolo. (1 Tim. 4:8) Fahalimu a seo, lu hupuliswa ka za sepo ya luna kuli ka zazi le liñwi but’ata bu ka feliswa mane ni manyando. Ki kwa butokwa kuli sepo yeo i be ye pila.—Maheb. 6:19.

⁴ Lubasi lwa mina l’u nga ku fumaneha kwa mikopano ka butuna bo bu cwañi? Kana ki kalulo ye swana fela ni tomahanyo ya mina ya nako ya lico kamba ya musebezi wa silifasi? Ka linako za mikopano, kana mu ipuman’anga inge mu singanyeka ka za ku y’o fumaneha kamba ku tokwa, kamba ku swalisana kwa mina kwa kamita ni mizwale ki taba ya ku iketela mwa lubasi lwa mina? Bahasanyi ba bañata ba sa hupula mutala wa bashemi ba bona ba ba ineezi mwa nako yani inze ba sa hula. “Nto ye ñwi ka za bo Ndate,” ka mwa hupulela eluda yo muñwi ka ku tabela, “ne li ya kuli ka nako kaufela ne ba ikolwisa kuli lubasi lwa ya kwa mikopano. Haiba yo muñwi a kula, yo muñwi ku luna n’a na ni ku siyala ni yena fa ndu, kono ba bañwi kaufela ne ba ya kwa mikopano!”

⁵ Mwa misulo ye sa taha kwapili ya Bukombwa bwa Luna bwa Mubuso, lu ka buhisana butokwa bwa mukopano o muñwi ni o muñwi wa puteho ili ka mulelo wa ku tusa ku tiisa buitebuho kwa litukiso zeo za kwa moya. Haiba ku fumaneha kwa mina fa mikopano ne ku kaba kwa kamita, lu ikolwisa kuli litaba zeo li ka mi tusa ku lemuha ze mu yawa. Li ka kopanyeleza likupuliso z’e tusa ku bao ba ba zamaisa mikopano, hamohocwalo ni liakalezo zeo kaufel’a luna lu kona ku sebelisa ha lu itukiseza yona mane ni ku abana ku yona. Kana ne mu si ke mwa ina hamoho sina lubasi ni ku fa nahanisiso ye buniti kwa mukwa wa mina wa ku fumaneha fa mikopano? Hamulaho mu eze licinceho ze ñwi ze tokwahala mwa tomahanyo ya mina. Ku fumaneha kamita kwa mikopano ki kalulo ya butokwa hahulu ya ku fiwa kwa tuto ya teokratiki mi i swanela k’u ngiwa ka butuna luli.