Mu Itusise Limagazini za Luna Hande ka ku Fitisisa

¹ Ha mu atumela sibaka fo ku lekiswa mapampili a makande, ki sifi se mu bona? Limagazini. Fa sintolo se si fa kokozo, ki sika mañi se si hoha mamelelo ya mina? Limagazini. Ki sika mañi se si kotomanisa mulwali wa mañolo ya lwezi mukotana wa mañolo? Limagazini. Kacwalo, ki lika mañi ze ba bala batu ba bañata? Limagazini. Lipatisiso li bonisa kuli fa palo ya ba banca ku b’a 10 kaufela ku na ni b’a 9 ba ba mwa buhulu bwa lilimo ze mwahal’a 10 ni 18, mi pesenti ye swana ya ba bahulu, ba bala magazini i liñwi kamba ku fitelela ka kweli ni kweli. Lifasi li na ni buiyakato kwa limagazini.

² Kana lwa kona ku tahisa kuli batu ba lipilu ze sepahala ba be ni buiyakato kwa Tora ya ku Libelela ni Awake!? Ee, haiba LUNA lu ba ba iyakatitwe ka za Tora ya ku Libelela ni Awake!. Ki sika mañi se si kona ku lu tusa ku ba cwalo? Mu nyakisise liakalezo zeo:

◼ Mu bale Limagazini: Muokameli yo muñwi wa maeto na bihile kuli, ka palo ya fa sihali-hali, ku ba ba mwa mupotoloho wa hae fa palo ya bahasanyi ba balalu ku na ni a li muñwi fela ya balanga musulo o muñwi ni o muñwi wa Tora ya ku Libelela ni Awake! ku zwa fa likepe la fahalimu ku isa fa likepe la mafelelezo. Kana mina mwa eza cwalo? Ha mu nze mu bala taba ye ñwi ni ye ñwi, mu ipuze kuli, ‘Ki mañi ya na ka itebuha litaba zeo—me, ya hana za bumulimu, munna wa lipisinisi, yo munca?’ Mwa kopi ya mina ya ka butu, mu lale sisupo kamba ze peli zeo mu kona ku itusisa ha mu tahisa magazini yeo. Cwale mu nahane ka mo mu kona ku zuseza cisehelo kwa taba ka mubamba u li muñwi kamba ye mibeli fela.

◼ Mu Be ni Oda Tota ya Limagazini: Mu fitise oda ye swanela ku muzwale ya talima za limagazini ka za palo tota ya likopi za musulo o muñwi ni o muñwi. Ka yona nzila yeo, mina hamohocwalo ni lubasi lwa mina mu ka ba ni palo ye nde ya kamita ni ye likani ya limagazini.

◼ Mu Tomahanye Lizazi la Kamita la ku Fa Limagazini: Liputeho ze ñata li beile kwatuko lizazi le li ketilwe sihulu kwa neku la bupaki bwa ku fa limagazini. Kana mwa kona ku fa kemelo kwa Lizazi la ku fa Limagazini la puteho? Haiba mu sa koni, mu like ku itusisa nako ye ñwi ya sebelezo ka siwela kwa neku la bupaki bwa mwa likululu bwa ku fa limagazini ni ku hasanyiwa kwa limagazini ka butu, ili fa munyako ni munyako ni kwa batu bo lu isezanga limagazini.

◼ Mu Be ni Buiyakato kwa “Tora ya ku Libelela” ni “Awake!”: Mu itwalele likopi za limagazini ha mu li mwa lieto kamba ku leka-leka lika. Ha mu sweli ku ambolisana mu li fitise ku bo mubeleka ni bona, bomuyahwa ni bona, bo mu kena ni bona sikolo kamba kwa baluti. Bosinyalana ba ba zamayanga hañata ka lyungamuwilu ba itusisanga sisupo si li siñwi se si mwa limagazini za cwanoñu fa mwa ku tahisa ku ambolisana ni muzamai yo ba inzi ni yena fa sipula. Se ba ikozi ku ba ni ze bonwi ze ñata ze nde. Ba banca ba bañwi kamita ba lwalelanga kwa sikolo litaba ze hatisizwe zeo ba ikutwa kuli li ka ba ze tabelwa ki baluti kamba baituti sina bona. Mu itwalele likopi ha mu li mwa tusipili twa makutela-kaufi, ni ku li fitisa kwa balekisi ha se mu petile mulelo wa kasipili ka mina. Buñata bwa luna lu y’o lekanga mafula kamita; kiñi ha mu sa fi limagazini ku mubeleki wa fo ku nwisezwa limotikala mafula? Mu li beye fakaufi ha mu potelwa ki banabahabo mina, ha mu zamaya mwa linzila za nyangela, kamba ha mu libelela ku talelezwa kwa tumelelano. Kana mwa kona ku hupula linako ze ñwi ze swanela?

◼ Mu Itukiseze Mutahisezo wa ka Bukuswani wa Limagazini: Mu lukise ku bulela hanyinyani fela, kono ili ka ku utwahala hande. Mu be ni tukufalelo ye tuna. Mu fite kwa pilu. Mu be ni buniti. Mu ikungele muhupulo u li muñwi mwa taba, mu u beye mwa manzwi-nyana, mi mu fe limagazini. Mutahisezo o munde ka ku fitisisa ki wa ku zusa puzo fa taba yeo ye tabelwa mi cwale ni ku supa kwa taba ye mwahali yeo ye fa kalabo ya mwa Mañolo. Mu nyakisise mitala ye sikai ka mo seo si konwa ku ezezwa:

³ Haiba mu koñomeka taba ye ama za ku yuyuluka kwa sipimo sa bukebenga, mu kana mwa bulela kuli:

◼ “Ku ka tokwa nto mañi kwa neku la luna kuli lu kone ku lobala busihu lu si na sabo ya bukebenga?” Muñ’a ndu na kana a tokwa sepo kwa neku la miinelo ku ba ye minde ni ku fita. Mwa kona ku alaba kuli batu ba bañata ba ikutwa ka nzila ye swana mi mu ekeze kuli mu na ni litaba ze ñwi zeo mu sepa kuli li ka ba ze tabelwa ki yena. Cwale mu ame kwa sisupo se si swanela mwa taba yeo.

⁴ Ha mu fa taba ye ama za bupilo bwa lubasi, ne mu kana mwa bulela kuli:

◼ “Batu ba bañata ba fumana kuli luli ki likulutendano ku fumana mapilelo ni ku uta lubasi ku ona mazazi a. Libuka ze balwa se li ñozwi ze ama fa muinelo o swana, kono nihaili boc’aziba ha ba lumeli ka za ku tatululwa kwa butata bwa luna. Kana ku na ni ko kuñwi k’o lu kona ku yela ketelelo ye itingiwa?” Cwale mu sikuluhele kwa maikuto tenyene a mwa magazini ao a bonisa butali bo bu fumanwa mwa Bibele.

⁵ Ne mu kana mwa itusisa muatumelelo wo ha mu tahisa taba ya za butata bwa mupilelo wa nyangela:

◼ “Buñata bwa batu kacenu ba mwatas’a sineneketo. Ni kamuta Mulimu na si ka lela kuli lu pile cwalo.” Cwale mu bonise ka mo litaba ze tomile fa Bibele ze mwa ya taba yeo li konela ku lu tusa ku talimana ni butata b’o bwa bupilo cwale ni ku fa sepo ya tatululo ya kamita mwa nako ya kwapili.

⁶ Bupaki bwa mwa Likululu ki bo Bu Buanyu: Ne li mwa musulo wa Informant (Bukombwa bwa Luna bwa Mubuso) wa January 1940 mo bahasanyi ne ba susuelizwe lwa pili ku tomahanya lizazi le li ipitezi mwa viki ni viki kwa neku la bupaki bwa mwa likululu ka ku itusisa limagazini. Kana mwa zwelanga mwa bupaki bwa mwa likululu ka linako ze ñwi? Haiba mwa ezanga cwalo, kana muezezo o mu itusisa ki o buanyu luli? Bahasanyi ba bañwi se ba lemuhilwe ba yemi fa kokozo ya likululu le li patehile hahulu, ba sweli ku ambolisana ili fo batu ba bañata ba sweli ku ipitela fela. Mwa sibaka sa ku yema mabapa inze mu sweli limagazini, ki ko ku buanyu hahulu ku yema ka ku kauhana ni ku atumela batu. Baitamaeli ne ba kana ba yema ni ku teeleza ka bukuswani haiba ba atumelwa ki mutu a li muñwi fela, kono ba sikai ba ka nga muhato wa ku atumela sikwata se si mwa ku ambolisana. Bakeñisa kuli lu hoha mamelelo ye tuna mwa likululu, ku ba ni tokwahalo ye ipitezi ya ku ba ni mubonahalelo o munde hamohocwalo ni mutinelo o itikanelezi o’ swanelwa ki likombwa za Mulimu.—1 Tim. 2:9, 10.

⁷ Ba Ba Isezwangwa Limagazini: Bao ba ba na ni batu ba ku isezanga limagazini ba siyalisa limagazini ze ñata mane likalulo za simu niha li kwahelwa kamita. Batu ba ba isezwangwa limagazini ki limbule ze nde hahulu ze mwa mayemo a ku ba ni lituto za Bibele za mwa mandu.

⁸ Ha mu eza misipili ya makutisezo kamita ya ku isa limagazini, mu ka fumana kuli mufutumala ni silikani mwahal’a mina ni muñ’a ndu li ka hula. Ka mo mu fitela fa ku twaelana hande, ki ka mo mu ka fumanela bunolo hahulu mwa ku buhisana litaba za mwa Mañolo. Seo si kona ku isa kwa ku kalisa tuto ya Bibele ya mwa ndu ye zwelapili. Kwa batu k’o ku na ni buitebuho bwa niti kwa limagazini, mu siyalise ñoliso. Mi mu hupule kuli, nako ye ñwi ni ye ñwi ye mu bonana ni muñ’a ndu mwa kona ku biha musipili wa makutisezo.

⁹ Kaizeli yo muñwi na isanga limagazini kamita ku musali yo muñwi ya na li amuhelanga ka nako kaufela kono musali yo n’a bulelanga kuli: “Ha ni lumeli litaba ze mu ni bulelela.” Fa musipili o muñwi hamulaho, kaizeli yo na fumani wa munna fa ndu. Hamulaho wa ku ambolisana ko ku silikani, litukiso ne li ezizwe za ku kalisa tuto ya Bibele. Kaizeli yo na ikezize silikani ni banana ba balalu ba ne ba fumanehanga kwa tuto. Kwa nalulelule, me ni bana ba hae ne ba neezi bupilo bwa bona ku Jehova mi ne ba kolobelizwe. Ku t’o fita la kacenu le, lilama za lubasi l’o ba 35 se ba amuhezi niti. Ku bile cwalo kabakala kuli kaizeli n’a zwezipili ku isezanga batu bao limagazini!

¹⁰ Ku na ni linzila ze ñata za ku kalisa ka zona ku isezanga batu limagazini. Mwa kona ku kalisa ku isezanga mutu lihatiso ka ku buluka ze ñolwa ze mu siyalisa ni ku lukisa za ku kutela teñi mo ku fitela liviki ze peli inze mu lwezi misulo ye minca-nca. Nzila ye ñwi ki ka ku itusisa litaba ze mwatas’a toho ya taba ye li “Ze Mwa Musulo wa Luna O Tatama.” Ha mu kutela teñi, mu bulelele muñ’a ndu kuli mu lwezi taba yeo ne mu kile mwa bulela. Kamba, ha mu eza musipili wa makutisezo, mwa kona ku bulela kuli: “Ha ne ni balile taba yeo, na be na hupula kuli ni mina mu kana mwa i tabela . . . ” Cwale mu fitise maikuto a ka bukuswani fa hatiso yeo ni ku i siyalisa. Ha se mu petile musipili wa mina, mu lemuhe lisupo ze bunolo ze ketalizoho ze fa pulukelo ya mina ya ze ñolwa za fa ndu ni ndu: (1) libizo la muñ’a ndu, (2) keyala ya muñ’a ndu, (3) lizazi la ku potelwa, (4) misulo ye siilwe, ni (5) taba ye sebelisizwe. Bahasanyi ba bañwi se ba kondisize hahulu mwa ku fumana batu ba ku isezanga limagazini, ka ku ipumanela ba bañata luli ba ba fita fa 40 kamba ku fitelela ba ba fa mukoloko wa bona!

¹¹ Kalulo mo ku Fumaneha Lipisinisi: Limagazini ze ñata li siiwa ki bahasanyi ba ba sebeza mwa kalulo mo ku fumaneha lipisinisi. Kana se mu likile ku sebeza fa sintolo se siñwi ni se siñwi? Lipiho li bonisa kuli mwa liputeho ze ñwi, ku abaniwa kwa mwa kalulo yeo ya sebelezo ki kwa fa sipimo se si kwatasi hahulu. Lwa makalelo, ba bañwi ba ba ni sabo ka za ku potela batu ba lipisinisi, kono ha se ba likile ka linako ze balwa, ba fumana nto yeo ku ba ye tabisa ni ye fa mupuzo. Ku cwañi ha ne mu ka buza muhasanyi ya cuukile kamba paina kuli a mi tuse ka za ku kalisa muezezo wo?

¹² Ku na ni miinelo ye minde ye sikai ya ku sebeza fa sintolo ni sintolo. Ba ba siyo teñi ki ba banyinyani hahulu, sihulu mwahal’a lihora za mubeleko! Batu ba lipisinisi hañata ba likute, mane niha ne ba si ke ba ba ni cisehelo ye tuna kwa Bibele. Mu kalise ka ku itahanela; ka mo ku bonahalela mu kana mwa ba ni ku amuhelwa ko kunde ni ku fita. Ha se mu ipulezi, mu kana mwa bulela kuli ki ka siwela mu fumana batu ba lipisinisi fa mandu a bona, kacwalo mu ba potela kwa libaka za mubeleko wa bona ka nakonyana fela ili ku ba fitiseza misulo ye minca-nca ya Tora ya ku Libelela ni Awake! Mu bonise hande kuli batu ba bañata ba lipisinisi ba itebuha limagazini za luna kakuli ba tokwa ku zamaelela ni nako ya likezahalo za lifasi kono ba na ni nako ye nyinyani ya ku li bala. Limagazini li tahisa litaba ze nyangumuna munahano ze zwelela kwa kutwisiso ye ñwi ye nca, ye si na tengamo ya bulapeli, bupolitiki, kamba litekisano. Mutu wa ku isezanga limagazini na kana a tahiswa ka batu ba ba tabela ba ba fumanwa mwa kalulo mo ku fumaneha lipisinisi.

¹³ Mu Itukiseze Sina Lubasi: Nakonyana neikana ya beiwa kwatuko mwahal’a tuto ya mina ya lubasi ili ku buhisana ka za litaba ze mwa limagazini ze nca-nca zeo ne li kana za ba ze swanela kwa ku itusisa zona mwa kalulo ya mina ya simu. Lilama za lubasi—ku kopanyeleza ni banana—ba kona ku icapa mwa ku itukiseza ka ku kuta-kutela mitahisezo ya bona ni mwa ku tulela miinelo ye atile ya ku sa tabela yeo ye tahiswa, ye cwale ka ye: “Ni patehile,” “Lu na ni bulapeli bwa luna tota,” kamba “Ha ni tabeli.” Swalisano ye nde i kona ku tahisa kuli lubasi mukatumbi lu be ni kabelo mwa ku hasanya limagazini.

¹⁴ Bazamaisi ba Tuto ya Buka Ba Kona ku Tusa: Nako kaufela ha ku li ko ku swanela, mu tomahanye mikopano ya sebelezo kwa neku la Lizazi la ku Fa Limagazini kwa libaka za tuto ya buka mwa sibaka sa kuli puteho kaufel’a yona i kopane kwa Ndu ya Mubuso. Bao ba ba na ni buikalabelo bwa mikopano ya sebelezo ya mwa simu ba swanela ku itukiseza hande ka liakalezo tenyene ze fitiswa kwa sitopa. Ne li kana za kopanyeleza teñi mutahisezo o li mutala ni sisupo kamba ze peli ze zwelela mwa misulo ya cwanoñu fa zeo ne li kana za itusiswa mwa ku zusulusa cisehelo mwa kalulo ya fa sibaka. Mikopano ya sebelezo ya mwa simu—ku kopanyeleza cwalo ni ku ketahanywa kwa sikwata—i swanela ku eziwa ka bukuswani, ha i swaneli ku fitelela mizuzu ye 10 ku isa ku ye 15. Bazamaisi ba tuto ba swanela ku bona teñi kuli ku na ni kalulo ya simu ye likani yeo ye ka konisa sikwata ku ba se si patehile mwahal’a nako mukatumbi ya sebelezo ya mwa simu.

¹⁵ Mu Bonise Buitebuho kwa Limagazini: Taba ye li “Ku Itusisa Hande Tora ya ku Libelela ni Awake!” ye ne i hatisizwe mwa musulo wa Bukombwa bwa Luna bwa Mubuso bwa July 1993 ne i tahisize sisupo seo sa butokwa, kuli: “Tora ya ku Libelela ni Awake! ha li fiti fa ku ba ze si na tuso, mane nihaiba li si ka siiwa mwa simu kaufel’a zona mwahal’a kweli i liñwi kamba ze peli hamulaho wa lizazi la musulo w’o. Litaba ze ku zona ha li bi ze si za butokwa ka ku fela kwa nako . . . Ku tuhelela limagazini za kale li bundama mi ni kamuta mu sa itusisi zona ki ku tokwa buitebuho kwa lisebeliso zeo ze butokwa hahulu. . . . Mwa sibaka sa ku beya kwatuko limagazini za kale hahulu ni ku li libala, kana ne i si ke ya ba nto ye nde ni ku fita ku eza buikatazo bo bu ipitezi kwa ku li fa mwa mazoho a batu ba ba tabela?”

¹⁶ Kacenu ku na ni batu ba bañata ba lipilu ze sepahala ba ba sweli ku batisisa niti. Litaba ze mwa magazini i liñwi ne li ka ba zona fela ze ba tokwa mwa ku ba etelela kwa niti! Jehova u lu file lushango lo lu nyangumuna lo lu swanela ku shaela, mi limagazini za luna li peta kalulo ye butokwa hahulu mwa ku fitisa lushango l’o ku ba bañwi. Kana mu ka ba ni buiyakato bo butuna mwa ku hasanya limagazini mwa nako ya kwapili? Kana mu ka sebelisa ze ñwi za zona liakalezo zeo kwa mafelelezo a yona viki ye? Mu ka fuyaulwa ka butuna haiba mu ka eza cwalo.

Liakalezo ze Sebeza:

◼ Mu bale limagazini ka bunako, mi mu zibe hande litaba ze ku zona.

◼ Mu kete taba ye ama nto ye ñwi ye tahisa cisehelo ya ka nañungelele mwa nyangela ye mu pila ku yona.

◼ Mu itukiseze mutahisezo o ka swanela kwa batu ba ba fapahana-fapahana, ibe banna, basali, kamba ba banca. Mu bonise ka mo magazini i amela muñ’a ndu ni ka mo lubasi kaufela lu ka ikolela yona.

◼ Mu like ku zwela mwa musebezi wa mina wa sebelezo ya mwa simu fo buñata bwa batu ba li fa mandu. Liputeho ze ñwi li ezanga tukiso ya ku fa bupaki bwa manzibuana ka limagazini.

◼ Mutahisezo wa mina u be o kusufezi ni o nongile fa taba.

◼ Mu si ke mwa bulela ka ku akufisa hahulu. Haiba muteelezi wa mina ha na cisehelo, ku bulela ka ku akufisa ha ku na ku tusa se siñwi. Mu like ku iketa mwa ku bulela, mi mu fe muñ’a ndu sibaka sa ku alaba.

Ku Fa Limagazini fa Ndu ni Ndu:

◼ Mu be ni lumenyo lo lu silikani ni mulumo wa linzwi le li sishemo.

◼ Mu be ni cisehelo ye tuna ka za limagazini.

◼ Mu bulele ka bunya ni ka ku utwahala hande.

◼ Mu bulele fela fa taba i liñwi; ka bukuswani mu nyangumune cisehelo, mi mu bonise butokwa bwa yona ku muñ’a ndu.

◼ Mu koñomeke taba i liñwi fela.

◼ Mu itusise magazini i liñwi fela, ni ku siyalisa ye ñwi sina ye zamaelela ni yona.

◼ Mu tambeke limagazini ku muñ’a ndu.

◼ Mu zibise muñ’a ndu kuli mu lela za ku kutela teñi.

◼ Mu be ni mafelelezo a silikani, a’ utwahala hande haiba limagazini li hanilwe.

◼ Mu ñole fa pampili ya pulukelo ya fa ndu ni ndu batu kaufela ba ba bonisize cisehelo ni lihatiso ze siilwe.

Fo ku Fumanelwa Sibaka sa ku Siya Limagazini:

◼ Bupaki bwa fa ndu ni ndu

◼ Bupaki bwa mwa likululu

◼ Musebezi wa fa sintolo ni sintolo

◼ Ba ba isezwangwa limagazini

◼ Bupaki bwa manzibuana

◼ Ha mu eza misipili ya makutisezo

◼ Ku fita kwa baituti ba Bibele ba kale

◼ Ha mu li mwa lieto, mwa ku leka-leka lika

◼ Ha mu ambolisana ni banabahabo mina, babeleki ni mina, bomuyahwa ni mina, bo mu kena ni bona sikolo, baluti

◼ Ha mu li mwa linzila za nyangela, mwa mizuzu ya ku libelela teñi