Ku Kopana Kamita Ku Tokwahala Hahulu Kuli Lu Tiye

¹ Muapositola Paulusi n’a lu susuelize kuli lu zwelepili ku ba ni “tumelo ye pilisa.” (Tite 1:9, 13) Kwa mikopano ya puteho lu nyakisisanga litaba ze nde mi lu lutiwa za mwa ku ipulukela inze lu tinile lisilelezo za kwa moya kaufel’a zona ilikuli lu kone “ku tiya kwa lunya lwa Diabulosi.”—Maef. 6:11; Mafil. 4:8.

² Mikopano I Lu Fa Ze Lu Tokwa: Ku fumaneha kamita kwa mikopano ya puteho ku tokwahala hahulu kuli lu zwelepili ku tiya. (1 Makor. 16:13) Kwa mikopano ku fiwanga litapelo za ku itumela ku Mulimu ni ku mu lumbeka, hamoho ni ku mu kupa ku bonela puteho ze i tokwa. (Mafil. 4:6, 7) Ku abana mwa ku opela lipina za Mubuso kwa lu yahisa mi ku lu konisa ku bonisa mihupulo ni maikuto a luna ha lu nze lu lapela Jehova. (Maef. 5:19, 20) Sango se lu eza kwa Ndu ya Mubuso mikopano i si ka kala kale ni ha se i felile sa lu susueza, ku lu yahisa, ni ku lu katulusa.—1 Mates. 5:11.

³ Ñohola mwa April, ngambolo ye ipitezi, ye li “Bulikani bwa Niti ni Mulimu ni Bomuyahwa ni Luna,” ne i lu tusize kaufela ku utwisisa butuna bwa tohonolo ni tabo ya ku ba mulikan’a Jehova. Hape ne i talusize libaka ha lu swanela ku ikataza ka mo ku konahalela kaufela ku mu ziba ni ku mu tabisa. (Maheb. 11:6) Mwa October, ne ku nyangumuzi luli ku nyakisisa litaba za tuto ze talu za mwa Tora ya ku Libelela ze n’e talusa m’o ba banca ba kona ku boniseza moya o shutana ni wa lifasi mwa mizamao ya bona kaufela. (Makolo. 3:8) Mu nahane ze ne lu ka be lu yawile kambe ne lu si ka fumaneha kwa mikopano yeo.

⁴ Mukopano wa luna wa Sikiliti wa mwa 1999 wa “Linzwi la Bupolofita la Mulimu” ne u tiisize hahulu buikolwiso bwa luna bwa kuli lisepiso za Mulimu kaufela ze si ka talelezwa kale li ka talelezwa. Ne lu susuelizwe kuli lu si ke lwa tuhela ku shaela linzwi la bupolofita la Mulimu. Ka mo ku bulelezwi fa likepe 72 la buka ya Ba Ba Kopanyizwe ku Peta Bukombwa bwa Luna, Sikolo sa Bukombwa sa Teokratiki ki tukiso ya tuto ye sa feli ya puteho kaufela. Kuli lu tusiwe ka ku tala ki tukiso yeo, lu swanela ku mamela kelezo ye lu fiwa. Kacwalo, lu ka na lu bolosola hanyinyani-hanyinyani buikoneli bwa luna bwa ku shaela lushango lwa Mubuso kwa nyangela ni fa ndu ni ndu. Ha lu koni ku icawisa tuto yeo.

⁵ Mukopano wa Sebelezo wa luna u lu tusa ku ba ni buanyu hahulu mwa bukombwa. Taba yeo ne i bonahezi kwa mukopano ko ne lu filwe litaelo ka za m’o lihatiso li ka felwa ka nubu. Bahasanyi ba ba yeziseli be ne ba ezize liponiso ne ba si ka bulela kuli limagazini ni libuka cwale se li za mahala, kono li abelwa ku si na ku lifisa. Ne ba lu bonisize hande mwa ku fela hatiso ni m’o mutu a kona ku buzeza muñ’a ndu haiba n’a ka tabela ku fa nubu kwa musebezi wa mwa lifasi kaufela. Ba ba kopananga kamita ne ba tusizwe ku bona mo ba ka amelwa ki tukiso ye nca yeo ni kuli Jehova u ka fuyaula musebezi wo.—2 Makor. 9:7.

⁶ Kwa Tuto ya Buka ya Puteho, tuto ya luna ya ku ituta Mutu Yo Mutuna ka ku Fitisisa ya Kile a Pila fa Lifasi-Mubu i lu tusize ku itebuha hahulu Jesu Kreste. I lu tusize ku utwisisa hahulu se ku talusa ku mu latelela. Likezahalo ha li nze li akufa mwa lifasi, ni luna lu nyanyezwa ku eza lika ka putako ye tuna ha lu nze lu nyakisisa mazazi a mafelelezo a bukombwa bwa Jesu mwa buka ya Mutu Yo Mutuna ka ku Fitisisa.

⁷ Mu Eze Ku Kopana Kamita ku Ba kwa Butokwa Hahulu: Mwa linaha ze ñata k’o mizwale ba luna ba sweli ku likiwa, ba sa ziba kuli ku butokwa hahulu kuli ba kopanange ka viki ni viki. Ba ba tabela niti ba tahanga kwa mikopano ka buñata kuli mane palo ya bahasanyi i kenanga habeli kamba mane halalu ku ya baputehi mukatumbi. Ka mukwa wo, Jehova u tusa mizwale ku zwelapili ku tiya mwa moya u li muñwi.—Mafil. 1:27; Maheb. 10:23-25.

⁸ Bafi kamba bafi be ne ba sa kopani kamita ba swanela ku eza se siñwi cwale kuli ba tuhele mukwa w’o. (Muek. 4:9-12) Kuli lu zwelepili ku tiya, lu tokwa ku susuezana ni ba ba yeziseli, ili ku susuezana ko ku b’anga teñi ka ku kopana kamita.—Maro. 1:11.