Taba ya Teokratiki

Angola: Palo ye tuna ka ku fitisisa ya bahasanyi ye eza 26,129 ne i fitilwe ku yona kwa mafelelezo a silimo sa sebelezo. Hape ne ku na ni palo ye tuna ya mapaina ba kamita ye eza 1,309. Bahasanyi ba bile ni avareji ya lihora ze fitelela 15 ni lituto za Bibele ze peli mwa August.

Zambia: La Mukibelo November 25, 1995 ne ku kakuzwi Mandu a Mubuso a mañwi a mabeli, ili ku fitisa fa palo hamoho ya a malalu mwa 1995. Ndu ya Mubuso ya Lusaka Chilenje South ne i kakuzwi ki muyemeli wa Sitopa se si Busa ya n’a sebeleza Mutai wa Zambia. Ndu yeo ne i yahilwe mwa likweli ze talu fela. Hape, Muswalisanisi wa Katengo ka fa Mutai wa South Africa n’a kakuzi Ndu ya Mubuso ye kwa Lusaka Addis Ababa Drive, ili ye itusiswa ki liputeho ze ne. Babuleli ne ba koñomekile kuli Mandu a Mubuso ki ona mandu a’ butokwa ka ku fitisisa fa silalanda, mi a swanelwa ku babalelwa sina m’o maofisi a mitai ya Sosaiti a babalelwa. Hailif’o muyaho ki wa butokwa, ki bulapeli ni muzamao wa batu ba ba itusisa ndu yeo ze li mane za butokwa ni ku fita. Kana Ndu ya Mubuso ya mina i se i kakuzwi? Mu sebeleze ku liba fa sikonkwani seo.