Buitukisezo—Sinotolo kwa ku Kondisa Lika
1 Ku itukiseza cimo bukombwa ku ka tusa ku tula ku zina-zina kufi kamba kufi k’o mutu n’a kana a ikutwa ka za ku abana mwa sebelezo ya mwa simu. Ha mu nze mu atumela kwa minyako, mu ka ziba se mu bata ku bulela kwa bañi ba mandu. Ha mu na ku ikalelwa ka za miinelo ye t’ata ye mu kana mwa talimana ni yona. Ha mu kuta kwa ndu ku zwa mwa sebelezo, mu ka ikutwa ku susuezwa, ka ku ziba kuli mu ezize buikatazo bo bunde mwa bukombwa. Ee, buitukisezo bo bu tezi ki sona sinotolo kwa ku shemuna bucaziba bwa luna bwa ku kutaza ni ku luta.
2 Paulusi n’a koñomekile buitukisezo ka ku lu susueza kuli “kwa mautu [lu] apale za ku itukiseza ku isa Evangeli ya kozo.” (Maef. 6:15) Seo si kopanyeleza ku itukiseza mwa munahano ni mwa pilu hamohocwalo ni ku fumana mubonelo o buniti ni wa ku itatela. Ha lu itukiselize ku abana niti ni ba bañwi, musebezi wa luna u ka fiwa mupuzo wa siselo sa Mubuso, ili nto ye ka lu tabisa.—Lik. 20:35.
3 Ka Mwa ku Itukiseza Musebezi wa ku Kutaza: Lu swanela ku keta mutahisezo o lu ikutwa ku lukuluha ha lu itusisa ona, mwendi ili o zwa ku ye akalelizwe mwa buka ya Reasoning kamba ye fumanwa fa likepe la mafelelezo la Bukombwa bwa Luna bwa Mubuso. Mu fe nahanisiso ya ka tokomelo kwa liñolo le mu lela ku itusisa, ili ku eza katulo ka za manzwi kamba lipulelo ze mu ka koñomeka kuli sisupo sa mina se situna si utwahale hande. Ha ku na tokwahalo ya ku peta mutahisezo; mwa sibaka sa seo, ki ko kunde ka ku fitisisa ku ba ni muhupulo mwa munahano, ku u bulela ka manzwi a mina, ni ku u bulela ka mukwa o mu ikutwa kuli u ka ba o tabisa ku muteelezi wa mina.
4 Mu nyakisise hatiso ye mu lela ku fa, mi mu kete lisupo ze tabisa za ku ambolisana. Mu kete nto ye ñwi ye mu hupula kuli ikaba ye tabelwa ki batu mwa kalulo ya mina. Mu nahananisise mo mu kana mwa cinceza mutahisezo wa mina kwa bañi ba mandu ba ba fitana-fitana—munna, musali, musupali, kamba yo munca.
5 Kana se mu likile ku ba ni linako za ku itwaeza? Mu kopane hamoho ni lilama za lubasi lwa mina kamba bahasanyi ba bañwi kuli mu buhisane mitahisezo ye neikana ya ba ye buanyu, mi cwale mu i lundulule ka ku tumusa ilikuli bote ba be ni yona hande mwa munahano. Mu like ku likanyisa miinelo ni likanyezo tenyene ze ne li kana za talimanwa ni zona mwa kalulo. Ku itwaeza ko ku cwalo ku ka zwisezapili ku bulela hande kwa mina, ku ekeza buanyu bwa mina mwa ku kutaza, ni ku hulisa buikolwiso bwa mina.
6 Fahalimu a ku itukiseza ni ku itwaeza mitahisezo ya mina, hape mu swanela ku ipuza kuli, ‘Kana liapalo ze ni lela ku tina ki ze swanela mwa bukombwa? Kana ni na ni ze ni tokwa mwa mukotana wa ka wa libuka, ku kopanyeleza cwalo ni lihatiso ze ni lela ku itusisa? Kana u mwa muinelo o munde? Kana ni na ni buka ya ka ya Reasoning, matrakiti, ze ñolwa za fa ndu ni ndu, ni potoloto?’ Ku lela kwa ka nahanisiso pili nako i si ka fita kale ku ka peta kalulo ye ñwi mwa ku ba ni lizazi le li tahisa se siñwi mwa sebelezo.
7 Ha se lu ezize hande ka mo lu konela kaufela mwa ku itukiseza, lu swanela ku lapelela moya wa Jehova kuli u lu tuse ku kondisa lika. (1 Joa. 5:14, 15) Ku fa mamelelo ya ka tokomelo kwa buitukisezo ku ka tisa kuli lu fumane tabo ye ekezehile mwa musebezi wa luna, ha lu nze lu ‘feleleza za bukombwa bwa luna.’—2 Tim. 4:5.