Ka mwa ku Tahiseza Balutiwa ka Buka ya Zibo

¹ Sikonkwani se si lakazwa ki Bakreste kamukana ki sa ku luta ba bañwi niti ni ku tahisa kuli “ba ba mwa mayemo a mande kwa neku la bupilo bo bu sa feli” ba be balutiwa. (Lik. 13:48, NW; Mat. 28:19, 20) Kopano ya Jehova i lu file sisebeliso se sinde se lu ka peta seo ka sona—ili buka ya Zibo ye Isa kwa Bupilo bo Bu Sa Feli. Libizo la yona li koñomeka butokwa bo butuna bwa lituto za Bibele za fa ndu, kakuli bupilo bo bu sa feli bu itingile fa ku ikungela zibo ya ku ziba Jehova, Mulimu a nosi wa niti, ni mwan’a hae, Jesu Kreste.—Joa. 17:3.

² Buka ya Zibo cwale se i li yona hatiso ye tuna ya Sosaiti ye itusiswa mwa ku zamaisa lituto za Bibele za fa ndu. Ka ku itusisa yona, lwa kona ku luta niti ka bunolo, ka ku utwahala, ni ka bukuswani. Seo si ka tusa ku fita kwa lipilu za bao ba ba lutiwa. (Lu. 24:32) Ka mo ku inezi fela, ku na ni tokwahalo ya kuli muzamaisi a itusise milutelo ye minde. Kacwalo, ñambeko ye i lukiselizwe ku fa liakalezo ni likupuliso ze ama milutelo ye se i fumanehile ku ba ye buanyu. Ka ku lemuha lika, ni ka ku ya ka miinelo ya ka butu, ne mu kana mwa kona ku sebelisa ka ku zwelapili ze ñwi za liakalezo ze filwe fa kamba kaufel’a zona. Mu buluke ñambeko ye, mi mu ame ku yona hañata. Lisupo ze fitana-fitana ku yona ne li kana za mi tusa ku ba ni buanyu hahulu mwa ku itusisa buka ya Zibo kwa ku tahisa balutiwa.

³ Mu Zamaise Tuto ya Bibele ya fa Ndu Ili ye Zwelapili: Mu be ni cisehelo ya ka butu ili ye buniti ku muituti ka ku ba ya kona ku fita fa ku ba mulutiwa wa Sikreste ni muzwale kamba kaizeli wa kwa moya. Mu be ba ba mufutumala, ba ba silikani, ni ba ba tukufalelwa. Ka ku ba muteelezi yo munde, mwa kona ku fita fa ku ziba mutu yo muñwi y’o—mayemo a simuluho ya hae ni muinelo wa hae mwa bupilo—ili nto ye ka mi tusa ku lemuha ka mwa ku mu tuseza hande ka ku fitisisa kwa moya. Mu be ba ba itatela ku ifana ku muituti wa mina.—1 Mates. 2:8.

⁴ Tuto ha se i kalisizwe, ku bonwa hande kuli likauhanyo ze mwa buka ya Zibo li itutiwe ka ku latelelana kwa zona. Seo si ka konisa muituti ku fumana kutwisiso ye zwelapili ya niti, kakuli buka yeo i tahisa litaba za Bibele ka ku tatamana ko ku utwahala hande ka ku fitisisa. Mu buluke tuto i li ye bunolo ni ye tabisa ilikuli i be ye pila ni ye zwelapili. (Maro. 12:11) Ka ku itinga fa muinelo ni buikoneli bwa muituti, ne mu kana mwa kona ku feza buñata bwa likauhanyo mwahal’a muitutelo u li muñwi wa hora i liñwi kamba nako ye bat’o likana ni yona, mu sa ituti ka kayeye. Baituti ba ka eza zwelopili ye nde ni ku fita muta muluti hamohocwalo ni muituti ba fumaneha ka nako ye lumelelanwi kuli ba itute ka viki ni viki. Kacwalo, ku ba bañata, ku kana kwa konahala ku feza likauhanyo ze 19 za buka yeo mwahal’a likweli ze bat’o ba ze silezi kamba ze bat’o likana ni zeo.

⁵ Ka nako kaufela mu kalise ku ituta ka litaluso ze kuswani ze zusulusa cisehelo mwa litaba ze itutiwa. Mu ka lemuha kuli toho ya taba ya kauhanyo ye ñwi ni ye ñwi ki yona makanatelo a tuto, ili a tokwa ku koñomekwa. Tohonyana ya taba ye ñwi ni ye ñwi i tunumeka sisupo se situna, ili ku mi tusa ku toma mamelelo fa makanatelo a kauhanyo. Mu tokomele kuli mu si ke mwa ndendeya hahulu. Mwa sibaka sa seo, mu utwe maikuto a muituti. Ku buza muituti lipuzo ze etelela kwa kalabo ili ze nongile fa taba, ze tomile ku seo a ziba, ku ka mu tusa ku nahanisisa ni ku fita fa kutwisiso ye nepahezi. (Mat. 17:24-26; Lu. 10:25-37; mu bone Buka ya Muzamaisezo wa Sikolo, likepe 51, paragilafu 10.) Mu kumalele hahulu kwa litaba ze hatisizwe za buka ya Zibo. Ku tahisa litaba ze ekezehile ne ku ka fokolisa kamba ku pata lisupo ze tuna ni ku liyehisa tuto. (Joa. 16:12) Haiba ku zusiwa puzo ye sa ami taba ye swelwi ku itutiwa, hañata ne mu ka i alaba kwa mafelelezo a nako ya tuto. Seo si ka mi konisa ku feza tuto ya viki yeo mu sa yaululwi ki lika ze ñwi. Mu taluseze muituti kuli kwa nalulelule buñata bwa lipuzo za hae li ka alabiwa ha mu nze mu ituta.—Mu bone Buka ya Muzamaisezo wa Sikolo, likepe 93, paragilafu 14.

⁶ Haiba muituti u lumela hahulu Silalu, ku sa shwa kwa moyo, mulilo wa lihele, kamba lituto ze ñwi za buhata ze cwalo, mi litaba ze mwa buka ya Zibo ha li mu kolwisi, ne mu ka mu fa buka ya Reasoning kamba hatiso ye ñwi ye buhisana taba yeo. Mu mu bulelele kuli mu ka buhisana taba yeo ni yena ha s’a nahanile ka za seo a ka bala.

⁷ Ku kalisa ni ku feza tuto ka tapelo ya ku kupa ketelelo ni mbuyoti ya Jehova ku kutekehisa kezahalo, ku tahisa kuli mutu a be ni likute mwa munahano, mi ku hohela mamelelo ku Jehova sina yena Muluti wa niti. (Joa. 6:45) Haiba muituti u sa zuba kwai, kwa nalulelule ne mu kana mwa mu kupa ku tokolomoha ku zuba mwahal’a tuto.—Lik. 24:16; Jak. 4:3.

⁸ Mu Lute ka Buanyu ili ka Mañolo, Liswanisezo, ni ka Lipuzo za Lundululo: Ku si na taba ni kuli s’a itutile litaba zeo hakai, muluti ya bunangu u ka lundulula tuto ni tuto ka ku beya mwa munahano muituti tota. Seo sa tusa ku nahana ze ñwi za lipuzo za muituti y’o. Kuli mu lute ka buanyu, mu utwisise hande lisupo ze tuna mwa kauhanyo. Mu apule mañolo ili ku bona ka m’o a amela litaba, mi mu atule kuli ki afi a’ swanelwa ku baliwa mwahal’a tuto. Mu nahanisise ka za m’o mu kona ku lutela ka liswanisezo ni lipuzo za lundululo ze kwa mafelelezo a kauhanyo yeo.

⁹ Ka ku itusisa mañolo ka buanyu, mu ka tusa muituti ku itebuha kuli ka buniti fela u sweli ku ituta Bibele. (Lik. 17:11) Ka ku itusisa sikwenda se si li “Mu Itusise Hande Bibele ya Mina,” se si fa likepe 14 la buka ya Zibo, mu mu lute ka mwa ku fumanela mañolo. Mu mu bonise ka mwa ku zibela litimana ze amilwe mwa tuto. Nako ha i lumeleza, mu apule ni ku bala mañolo a’ bonisizwe ili a si ka amiwa. Mu tahise kuli muituti a fe maikuto a ka m’o a yemela kamba ku utwahaleza se si bulezwi mwa paragilafu. Mu koñomeke likalulo ze butokwa hahulu za manzwi a liñolo ilikuli a fite fa ku utwisisa mabaka a lisupo ze tuna mwa tuto. (Neh. 8:8) Ka nañungelele, ha ku na tokwahalo ya kuli muluti a tise mañolo a mañata mwa puhisano fahalimu a a’ fiwa ki buka. Mu fe maikuto fa butokwa bwa ku ziba mabizo ni mutatamanelo wa libuka za mwa Bibele. Ne ku kana kwa tusa muituti ha n’a ka bala makepe 27-30 a The Watchtower ya June 15, 1991. Ha ku swanela, mu susueze ku itusiswa kwa New World Translation. Ne mu kana mwa zwelapili ku bonisa ka mwa ku itusiseza miinelo ya yona ye fitana-fitana, ye cwale ka za ku ama teñi ze kwa mafelelezo a litaba ni mikoloko ya manzwi a mwa Bibele.

¹⁰ Tuto 34 mwa Buka ya Muzamaisezo wa Sikolo i talusa kuli liswanisezo li nyangumuna munahano wa mutu mi li nolofaza ku utwisisa mihupulo ye minca. Li patahanya nyangumuno ya munahano ni ku ama maikuto, ilikuli lushango lu fitiswe ka m’ata ao lu sa koni ku ba ni ona ka ku bulelwa fela kwa litaba. (Mat. 13:34) Buka ya Zibo i na ni liswanisezo ze ñata za ku luta ka zona ze bunolo kono ili ze m’ata. Sina ka mutala, swanisezo ye itusisizwe mwa kauhanyo 17 i hulisa buitebuho kwa neku la m’o Jehova a fela lico, liapalo, ni mukunda ka puteho ya Sikreste ili ka kutwisiso ya kwa moya. Maswaniso a’ buheha a mwa buka ya Zibo a konwa ku itusiswa ka buanyu mwa ku nyangumuna maikuto. Mwatas’a tohonyana ya taba ye li “Zuho ye Tabisa,” fa likepe 185, m’ata a paragilafu 18 a k’a tiiswa ka ku tahisa kuli muituti a kutele ku talima kwa siswaniso se si fa likepe 86. Seo ne si kana sa mu susueza ku nahana ka za zuho sina nto ya luli mwatas’a Mubuso wa Mulimu.

¹¹ Baituti ba Bibele ba tokwa ku eza zwelopili ya kwa moya ka tuto ni tuto. Ka lona libaka leo, mu si ke mwa palelwa ku buza lipuzo ze mwa kakwenda ka ka li “Mu Tatube Zibo ya Mina” ka ka fumaneha kwa mafelelezo a kauhanyo ni kauhanyo. Mu teeleze ka ku bata ku utwa nto ye fita kalabo ya ka manzwi fela ya se si itutilwe. Ze sikai za lituto zeo li lukiselizwe ku tahisa kalabo ya ka butu ye zwelela kwa pilu. Sina ka mutala, mu bone likepe 31, f’o muituti a buzizwe kuli: “Ki tulemeno tufi twa Jehova Mulimu to mu tabela hahulu?”—2 Makor. 13:5.

¹² Mu Lute Baituti ku Itukiseza Tuto: Muituti ya balela cimo tuto, ku lala likalabo, ni ku nahana ka mwa ku li bulelela ka mubulelelo wa hae tota u ka eza zwelopili ya kwa moya ye bubebe ni ku fita. Ka mutala ni susuezo ya mina, mwa kona ku mu luta ku itukiseza tuto. Mu mu bonise buka ya mina, mo mu bonisize kamba ku lala manzwi ni lipulelo ze mutomo. Mu taluse ka mwa ku fumanela likalabo ze nongile fa taba za lipuzo ze hatisizwe. Ku itukiseza kauhanyo ye ñwi hamoho ne ku ka tusa hahulu muituti. Mu mu susueze ku bulela ka mubulelelo wa hae tota. Ki f’o fela ku ka bonahala hande haiba wa utwisisa litaba zeo. Haiba a bala kalabo ya hae mwa buka, mwa kona ku nyangumuna munahano wa hae ka ku mu buza ka mwa n’a ka taluseza sisupo seo ku mutu yo muñwi u sili ka mubulelelo wa hae tota.

¹³ Mu susueze muituti ku bala mañolo a’ si ka amiwa ka ku ba kalulo ya ku itukiseza kwa hae kwa ka viki ni viki, kakuli ku kana kwa sa ba ni nako ya ku a bala kaufel’a ona mwahal’a tuto. Mu mu babaze ka za buikatazo bwa sweli ku eza kwa lituto za hae. (2 Pit. 1:5; mu bone Tora ya ku Libelela ya August 1, 1993, makepe 20-21, kwa neku la liakalezo ze ñwi ka za se si konwa ku eziwa ki muluti hamohocwalo ni muituti sa ku ekeza ku ituta fa tuto ya Bibele.) Ka nzila yeo, muituti u sweli ku lutiwa ku itukiseza ni ku fa likalabo ze utwahala kwa mikopano ya puteho. U ka be a itutile ka mwa ku bela ni tuto ya ka butu ye nde ili ye ka mu bakanya ku swalelela ku eza zwelopili mwa niti hamulaho wa ku fezwa kwa tuto ya Bibele ya hae ya ka butu mwa buka ya Zibo.—1 Tim. 4:15; 1 Pit. 2:2.

¹⁴ Mu Libise Baituti kwa Kopano ya Jehova: Ki buikalabelo bwa mutahisi wa balutiwa bwa ku libisa cisehelo ya muituti kwa kopano ya Jehova. Muituti u ka zwelapili ka bubebe ni ku fita kwa buhulu bwa kwa moya haiba a lemuha ni ku itebuha kopano mi a lemuha tokwahalo ya ku ba kalulo ya yona. Lu bata kuli a fumane munyaka mwa ku swalisana ni batu ba Mulimu ni ku libelela ku ba ni luna kwa Ndu ya Mubuso, ili k’o a kona ku amuhela kemelo ya kwa moya ni ya mwa maikuto zeo puteho ya Sikreste i fa.—1 Tim. 3:15.

¹⁵ Broshuwa ya Lipaki za Jehova—Ba Kopani ku Eza Tato ya Mulimu Lifasi Kamukana i tahiselizwe ku zibisa batu ka buñwi ka za kopano inosi ye bonwa yeo Jehova a sweli ku itusisa kacenu mwa ku peta tato ya hae. Tuto ha se i tomilwe, ki kabakalañi ku sa fa muituti kopi ya yona? Ku zwa fela kwa makalelo, mu memelange muituti y’o kwa mikopano. Mu taluse mo i zamaisezwa. Ne mu kana mwa mu bulelela toho ya taba ya ngambolo ya nyangela ye taha kamba ku mu bonisa taba ye ka buhisanwa fa Tuto ya Tora ya ku Libelela. Mwendi ne mu kana mwa mu isa kwa ku bona Ndu ya Mubuso ha ku si na mukopano ili ku kauleza ku kalelwa kufi kamba kufi kwa n’a kana a ba ni kona ka za ku ya kwa sibaka se sinca lwa pili. Ne mu kana mwa kona ku mu fumanela tanansipoti ya ku ya kwa mikopano. Ha fumaneha kwa mikopano, mu mu tahiseze ku ikutwa ku amuhelwa ni ku iketa. (Mat. 7:12) Mu mu taluse kwa Lipaki ba bañwi, ku kopanyeleza cwalo ni maeluda. Ku sepiwa kuli mwendi u ka kalisa ku bona puteho sina lubasi lwa habo lwa kwa moya. (Mat. 12:49, 50; Mare. 10:29, 30) Ne mu kana mwa mu tomela sikonkwani, se si cwale ka ku fumaneha kwa mukopano u li muñwi ka viki ni viki, mi mu hulise sikonkwani seo ka ku zwelapili.—Maheb. 10:24, 25.

¹⁶ Tuto ya Bibele ya fa ndu ha i nze i zwelapili mwa buka ya Zibo, mu koñomeke likalulo ze tunumeka tokwahalo ya ku swalisana kamita ni puteho kwa mikopano. Sihulu mu lemuhe makepe 52, 115, 137-9, 159, hamohocwalo ni kauhanyo 17. Mu bonise maikuto a mina tota a’ tungile a buitebuho kwa kopano ya Jehova. (Mat. 24:45-47) Mu bulele hande ka za puteho ya fa sibaka ni ka za se mu ituta kwa mikopano. (Samu 84:10; 133:1-3) Ne ku ka ba hande haiba baituti ne ba ka buha ye ñwi ni ye ñwi ya lividio za Sosaiti, ku kala ka Jehovah’s Witnesses—The Organization Behind the Name. Kwa neku la mihupulo ye miñwi ka mwa ku libiseza cisehelo kwa kopano, mu bone Tora ya ku Libelela ya April 1, 1985, makepe 15-19, ni ñambeko ya Bukombwa bwa Luna bwa Mubuso bwa April 1993.

¹⁷ Mu Susueze Baituti ku Fa Bupaki ku Ba Bañwi: Sikonkwani sa luna mwa ku ituta ni batu ki ku tahisa balutiwa ba ba fa bupaki ka za Jehova. (Is. 43:10-12) Seo si talusa kuli muluti u swanela ku susueza muituti ku bulela ku ba bañwi ka za seo a sweli ku ituta ku zwelela mwa Bibele. Seo si konwa ku eziwa ka bunolo fela sina ka ku buza kuli: “Ne mu ka talusa cwañi niti yeo kwa lubasi lwa habo mina?” kamba “Ki liñolo lifi le ne mu ka itusisa mwa ku bonisa seo ku mulikani?” Mu koñomeke libaka ze mutomo mwa buka ya Zibo f’o ku fa bupaki ku susuelizwe, ze cwale ka makepe 22, 93-5, 105-6, hamohocwalo ni kauhanyo 18. Ha ku konahala, muituti n’a kana a fiwa matrakiti a mañwi a ku itusisa mwa ku kutaza ku ba bañwi ka ku tandalelwa. Mu akaleze kuli a meme lilama za lubasi lwa habo kuli ba fumanehe kwa tuto ya hae. Kana u na ni balikani bao ni bona ne ba ka tabela ku ituta? Mu mu kupe ku mi kakanyeza ku bao ba ba tabela.

¹⁸ Ka ku fumaneha kwa Sikolo sa Bukombwa sa Teokratiki ni Mukopano wa Sebelezo, yena y’o ya libelezi ku ba mulutiwa u kona ku fumana tuto ni susuezo ye ekezehile ili ze ka mu tusa ku ba muhasanyi wa taba ye nde. Ha bonisa cisehelo mwa ku iñolisa mwa sikolo kamba ku ba muhasanyi ya si ka kolobezwa, likuka ze ñozwi fa makepe 98 ni 99 a buka ya Bukombwa bwa Luna li ka sebeza. Haiba ku na ni muinelo mwa bupilo bwa hae o mu paleliswa ku fita ku ze konisa, mwa kona ku bata litaba ze tusa mwa lihatiso za Sosaiti ili ze ama taba yeo ni ku li abana ni yena. Sina ka mutala, muituti n’a kana a sweli ku fumana butata mwa ku tula ku ngongwelwa ki ku zuba kwai kamba milyani ye miñwi ye kola. Buka ya Reasoning i fa mabaka a’ tiile a ka Mañolo Bakreste ha ba ambuka mikwa ye holofaza ye cwalo, mi fa likepe 112 i bonisa nzila ye se i bonahezi ku ba ye kondisa hahulu lika mwa ku tusa ba bañwi ku ikayutula kwa mikwa yeo. Mu lapele ni yena ka za taba yeo, ili ku mu luta ku yaha buitingo bwa hae ku Jehova kwa neku la tuso.—Jak. 4:8.

¹⁹ Muezezo o na ni ku latelelwa mwa ku bonisisa haiba mutu u fita ku ze konisa za ku abana mwa bukombwa bwa fa nyangela u bonisizwe mwa Tora ya ku Libelela ya January 1, 1996, makepe 27-8, paragilafu 6. Muituti ha fita ku ze konisa, ku swanela ku ba ko ku tusa ku fumana nako ya ku twaeza ili ya ku mu lukiseza lizazi la hae la pili mwa sebelezo ya mwa simu. Ka nzila ye susueza, mu buhisane miingelo ya batu ya mihato ni mihanelo ye atile mwa kalulo ya mina. Haiba ku konahala mu mu kalise ka musebezi wa fa ndu ni ndu pili, mi ka ku zwelapili mu mu lute miinelo ye miñwi ya bukombwa. Haiba mu buluka mitahisezo ya mina i li ye mikuswani ni ye bunolo, ku likanyisa ku ka mu bela bunolo. Mu be ba ba yahisa ni ba ba susueza, ba ba bonisa tabo mwa musebezi, ilikuli a hoze moya wa mina ni ku u bonahaza. (Lik. 18:25) Sikonkwani sa mulutiwa yo munca si swanela ku ba sa ku ba muhasanyi wa taba ye nde wa kamita, ya na ni tukufalelo. Mwendi mwa kona ku mu tusa ku eza tomahanyo ye sebeza hande ya za sebelezo. Kuli a kone ku eza zwelopili mwa buikoneli bwa hae bwa ku fa bupaki ku ba bañwi, ne mu kana mwa akaleza kuli a bale misulo ya The Watchtower ya August 15, 1984, makepe 15-25; Tora ya ku Libelela ya August 1, 1989, makepe 21-32; The Watchtower ya January 15, 1991, makepe 15-20; ni Tora ya ku Libelela ya January 1, 1994, makepe 16-21.

²⁰ Mu Susueze Baituti ku Liba kwa Buineelo ni Kolobezo: Ku swanela ku ba ko ku konahala ku muituti wa pilu ye sepahala ku ituta ze likani ka tuto ya buka ya Zibo kuli a eza buineelo ku Mulimu ni ku fita ku ze konisa za kolobezo. (Mu bapanye Likezo 8:27-39; 16:25-34.) Nihakulicwalo, pili mutu a si ka susuezwa ku eza buineelo, u tokwa ku tahisa buipeyo ku Jehova. (Samu 73:25-28) Mwahal’a nako kaufela ya tuto, mu bate linako za ku yaha buitebuho kwa tulemeno twa Jehova. Mu taluse maikuto a mina tota a’ tungile ka za Mulimu. Mu tuse muituti ku nahana ka za ku tahisa swalisano ni Jehova ye silikani, ya ka butu. Haiba luli a fita fa ku ziba ni ku lata Mulimu, f’o he u ka Mu sebeleza ka busepahali, kakuli buipeyo bwa silumeli bu ama ka mo lu ikutwela ka za Jehova sina mutu.—1 Tim. 4:7, 8; mu bone Buka ya Muzamaisezo wa Sikolo, likepe 76, paragilafu 11.

²¹ Mu like ka t’ata ku fita kwa pilu ya muituti. (Samu 119:11; Lik. 16:14; Maro. 10:10) U tokwa ku bona ka m’o niti i mu amela ka butu ni ku atula seo a swanela ku eza ka za seo a itutile. (Maro. 12:2) Kana luli wa lumela niti ye tahiswa ku yena ka viki ni viki? (1 Mates. 2:13) Kuli mu lemuhe seo, mu kona ku bata maikuto a muituti ka ku mu buza lipuzo ze lemuhisa za mubonelo, ze cwale ka ze: Mu ikutwa cwañi ka za seo? Mu kona ku sebelisa cwañi seo mwa bupilo bwa mina? Ka lipulelo za hae ne mu kana mwa lemuha fo ku tokwiwa tuso ye ekezehile mwa ku fita kwa pilu ya hae. (Lu. 8:15; mu bone Buka ya Muzamaisezo wa Sikolo, likepe 52, paragilafu 11.) Litaba ze talusa maswaniso a fa makepe 172 ni 174 a buka ya Zibo li buza kuli: “Kana se mu ezize buineelo ku Mulimu mwa tapelo?” ni “Ki sifi se si mi paleliswa ku kolobezwa?” Zeo ne li kana za susueza muituti ka buanyu kuli a’ nge muhato.

²² Muezezo o na ni ku latelelwa muhasanyi ya si ka kolobezwa ha lakaza ku kolobezwa u bonisizwe mwa Tora ya ku Libelela ya January 1, 1996, likepe 28, paragilafu 9. Buka ya Zibo ne i ñozwi ka mulelo wa ku bakanya mutu kuli a kone ku alaba “Lipuzo ku Bao Ba Ba Lakaza ku Kolobezwa,” ze fumanwa mwa kalulo ya litaba ze ekelizwe za buka ya Bukombwa bwa Luna, ili zeo maeluda ba ka lundulula ni yena. Haiba mu koñomekile likalabo kwa lipuzo ze hatisizwe ze mwa buka ya Zibo, muituti u swanela ku ba ya bakanyizwe hande kwa neku la linako za lipuzo ze zamaiswa ki maeluda ka ku mu lukiseza kolobezo ya hae.

²³ Mu Tuse Bao Ba Ba Feza Tuto ya Bibele ya fa Ndu: Ku swanelwa ku libelelwa kuli mutu ha sa felize ku ituta buka ya Zibo, buniti bwa hae ni butungi bwa cisehelo mwa ku sebeleza Mulimu li ka be li bonahezi. (Mat. 13:23) Ki ka libaka leo tohonyana ya taba ya mafelelezo ya buka yeo i buza kuli, “Ki Sifi Se Mu ka Eza?” Liparagilafu za mafelelezo li kupa muituti ku toma mamelelo fa swalisano yeo a swanezi ku tahisa ku Mulimu, tokwahalo ya ku sebelisa zibo ya itutile, ni tokwahalo ya k’u nga muhato kapili ili ku bonisa lilato la hae ku Jehova. Ha ku na tukiso ya ku ituta lihatiso ze ñwi ni ba ba feza buka ya Zibo. Ka sishemo ni ka ku utwahala hande mu taluseze muituti ya palelwa k’u nga muhato kwa zibo ya ku ziba Mulimu seo a na ni ku eza kuli a zwelepili kwa moya. Ne mu kana mwa bonananga ni yena ka linako ze ñwi, ili ku siya nzila inze i ngwalumukile ya kuli a’ nge mihato ye isa kwa bupilo bo bu sa feli.—Muek. 12:13.

²⁴ Mulutiwa yo munca ya ikungela niti ni ku kolobezwa u sa na ni ku hula mwa zibo ni kutwisiso ya hae kuli a be ya tomile ka ku tala mwa tumelo. (Makolo. 2:6, 7) Mwa sibaka sa ku zwisezapili tuto ya hae ya Bibele ya fa ndu hamulaho wa ku feza buka ya Zibo, mwa kona ku ipumanehisa kuli mu fe tuso ifi kamba ifi ya ka butu ya n’a kana a tokwa kuli a hule kwa moya. (Magal. 6:10; Maheb. 6:1) Haili yena, u kona ku taleleza kutwisiso ya hae ka ku bala Bibele ka zazi, ku ituta ka butu Tora ya ku Libelela ni lihatiso ze ñwi za “mutanga ya sepahala,” ku itukiseza ni ku fumaneha kwa mikopano, ni ku buhisana niti ni balumeli ba bañwi. (Mat. 24:45-47; Samu 1:2; Lik. 2:41, 42; Makolo. 1:9, 10) Ku bala kwa hae buka ya Bukombwa bwa Luna ni ku sebelisa se si fumaneha ku yona ku ka peta kalulo ya butokwa hahulu mwa ku ba kwa hae ya zamaisa hande lika kuli a pete bukombwa bwa hae ka ku tala.—2 Tim. 2:2; 4:5.

²⁵ Mu Hulise Bukwala bwa ku Luta: Lu filwe musebezi wa ku ‘luta macaba . . . ku ba luta.’ (Mat. 28:19, 20) Bakeñisa kuli bukwala bwa ku luta bu tamahani hahulu ni ku tahisa balutiwa, lu bata ku lika ka t’ata kuli lu eze zwelopili sina baluti. (1 Tim. 4:16; 2 Tim. 4:2) Kwa neku la liakalezo ze ekezehile ka mwa ku huliseza bukwala bwa ku luta, ne mu ka bata ku bala: “Ku Hulisa Bukwala bwa ku Luta,” ni “Ku Fita kwa Pilu ya Bateelezi ba Hao” mwa Buka ya Muzamaisezo wa Sikolo, lituto 10 ni 15; “Teacher, Teaching” (Muluti, Ku Luta), mwa buka ya Insight, Volyumu 2; ni litaba za Tora ya ku Libelela ze li “Ku Yaha ka Liyahiso ze Sa Ci Mulilo” ni “Ha Mu Luta, Mu Fite fa Pilu,” ku ya March 1, 1985; “Kana wa Bulela Ka Buanyu Ku Zwelela mwa Mañolo?” ku ya November 1, 1986; ni “How to Find Joy in Disciple Making” (Ka mwa ku Fumanela Tabo mwa ku Tahisa Balutiwa), ku ya Sikuwa ya February 15, 1996.

²⁶ Ha mu nze mu lika ka t’ata ku tahisa balutiwa, ka ku itusisa buka ya Zibo, mu lapele kamita kuli Jehova, yena “ya melisa,” a fuyaule buikatazo bwa mina mwa ku fita kwa lipilu za batu ka taba ye nde ya Mubuso. (1 Makor. 3:5-7) Haike mu fumane tabo ya ku luta ba bañwi ku utwisisa, ku itebuha, ni k’u nga muhato kwa zibo ye isa kwa bupilo bo bu sa feli!