Mwa ku Yoliseza Linako

¹ Ku ba ni ze ñata za ku eza mwa sebelezo ya Jehova kwa lu patehisa luli! (1 Makor. 15:58) Lu lemuha butokwa bwa ku ituta ka butu ni ka lubasi, ku bala Bibele ka zazi, ku itukiseza mikopano ya puteho ni ku fumaneha teñi, ni ku abana kamita mwa bukombwa bwa mwa simu. Baokameli ba na ni buikalabelo bwa ku lisa, mi ba na ni buikalabelo bo buñwi bwa mwa puteho. Ba bañwi ba na ni buikalabelo bo butuna bwa lubasi kamba mifuta-futa ya buikalabelo ku ba bañwi. Kuli lika li eziwe hande, bote ba tokwa ku likanyeza lika ni ku lukisa hande litaba za ka butu.

² Mu Itomele Ze Li za Butokwa: Ku kona ku ‘yolisa linako’ ku itingile fa ku ba ni kutwisiso kwa luna ni ku eza likatulo ze nde. (Maef. 5:15, 16) Lu lukela ku ziba kuli “linto ze nde ku fita” ki lifi ni ku li isa hahulu pilu. (Mafil. 1:10) Bosinyalana ba bañwi ba talusa cwana ka za lubasi lwa bona lwa Sikreste: “Niti i ama likalulo kaufela za luna za bupilo bwa luna . . . Niti haki kalulo ya bupilo bwa luna, kono ki mupilelo wa luna. Ze ñwi kaufela li mwa sibaka sa bubeli.” Ku iyakatwa hahulu bulapeli bwa Jehova ni sebelezo ya hae ki kwa butokwa.

³ Mu Lemuhe Ze Mi Sinyeza Nako: Mwa viki ku na ni lihora ze 168, mi lu tokwa ku itusisa hande nako ye lu na ni yona. Kuli lu be ni nako ye likani ya ku eza misebezi ya Mulimu, lu lukela ku ziba z’e lu sinyezanga nako ni ku li fukuza. Mwa patisiso ye ñwi, ne ku fumanwi kuli buñata bwa ba bahulu mwa United States ba tandanga lihora ze fitelela 30 mwa viki inze ba buha TV! Ku ba bañwi, nako ye ñata i sinyehela fa ku bala libuka za silifasi. Ba bañwi ba kana ba fumana kuli ba sinyezanga nako ye ñata hahulu kwa mikiti, za ku ikatuluseza teñi, za ku itabisa ka zona, kamba lika ze ñwi za fa kompyuta. Lu kana lwa tokwa ku tokomela ze lu ezanga mwa viki kuli lu bone mo lu kona ku itusiseza hande nako ya luna. Lu ba ba butali ha lu toma maciñekelo a nako ye lu sinyeza fa lika ze si za butokwa.

⁴ Mu Be ni Tomahanyo Ye Nde: Ku si na taba ni miinelo ya luna ya ka butu, mañi ni mañi wa luna wa kona ku yolisa linako kuli a eze ze ama za kwa moya. Ba bañwi ba fumani kuli ku pakela ku ba tusa ku peta ze ñata. Ha lu sinyeza nako ye ñata fa ku ya ni ku kuta kwa musebezi kamba ku libelela ba bañwi, lwa kona ku itusisa ye ñwi ya nako yeo ku bala Bibele, ku itukiseza mikopano, kamba ku teeleza kwa litaba ze fa matepu a’ lukisizwe ki Sosaiti. Mabasi a tusiwa hahulu ka ku ba ni nako ye sa cinca-cinci ili ye tomilwe ya ku ituta hamoho. Haiba ba mwa lubasi kaufela ba tahanga ka bunako kwa tuto ya ka lubasi, bote ba ba ni nako ya ku eza lika ze ñwi.

⁵ Mazazi h’a nze a ya, lu lukela ku lemuha hahulu kuli “nako [“ye siyezi,” NW] ki ye kuswani.” (1 Makor. 7:29) Bupilo bwa luna bu itingile ka mo lu itusiseza nako ya butokwa hahulu ye siyezi. Lu ka fuyolwa ha lu yolisa linako ilikuli lu beye ze ama za Mubuso mwa sibaka sa pili!—Mat. 6:33.