Mu Be ni Bundume bwa ku Eza Misipili ya Makutisezo

¹ Kana mu ba ba ikolanga ku eza misipili ya makutisezo? Buñata bwa bahasanyi ba ikolanga. Mwendi kwa makalelo ne mu bile ni boi, sihulu ha mu kutela kwa bañi ba mandu be ne ba si ka bonisa cisehelo ye tuna ha ne mu ambozi ni bona lwa pili. Kono ha mu tiya ka Mulimu wa luna kuli mu bulele taba ye nde ka ku eza misipili ya makutisezo, mu kana mwa komoka ku fumana kuli ona musebezi wo ki o bunolo mi u kona ku fa mupuzo. (1 Mates. 2:2) Ka mukwa ufi?

² Nto i liñwi kikuli ku na ni shutano ye butokwa mwahal’a musipili wa makutisezo ni ku pota kwa pili. Musipili wa makutisezo u eziwa ku mutu ye lu ziba, isiñi ye lu sa zibi, mi hape hañata ku bunolo ku ambola ni mutu ye lu ziba ku fita ye lu sa zibi. Haili ka za mipuzo ye mituna ye zwelela mwa ku abana ku ona musebezi wo, misipili ya makutisezo i kana ya libisa kwa lituto za Bibele ze tahisa miselo.

³ Ha lu sebeza fa ndu ni ndu, lu kutela ku potela batu be ne ba si ka bonisa cisehelo ha ne lu ba potezi mwa nako ya kwamulaho. Ki kabakalañi he, ha lu potanga hape? Lu lemuha kuli miinelo ya batu ya cincanga mi mutu ya n’a bonahala ku sa tabela kamba mane ya n’a hanyeza fa mupotelo wa kwamulaho n’a kana a bonisa cisehelo ha lu pota ka nako ye tatama. Ka ku ba ni seo mwa munahano, lu itukiseza misipili ya luna ya makutisezo ni ku lapelela limbuyoti za Jehova kuli se siñwi se lu ka bulela si kone ku zusa cisehelo.

⁴ Haiba, mwa musebezi wa luna wa fa ndu ni ndu, ka ku tabela, lu kutaza kwa batu be ne ba si ka bonisa cisehelo ni hanyinyani, kana ha lu swaneli ku tabela hahulu-hulu ku kutela kwa batu be ne ba bonisize cisehelo mwa taba ya Mubuso?—Lik. 10:34, 35.

⁵ Buñata bwa luna lu mwa niti kacenu ka libaka la kuli muhasanyi yo muñwi n’a ezanga misipili ya makutisezo ku luna ka pilu-telele. Haiba mu ba bañwi ba ba cwalo, ne mu kana mwa ipuza kuli, ‘Ki mubonelo mañi wa pili wo ne ni file ku muhasanyi yale? Kana ne ni amuhezi honafo taba ya mubuso ha ne ni i utwile lwa pili? Kana kikuli ne ni bonahalile ku sa tabela?’ Kono, lu swanela ku ba ba ba tabile kuli muhasanyi yo ya n’a kutile n’a atuzi kuli lwa swanela ku potelwa hape mi ‘a tiyela ku Mulimu wa hae,’ a pota, mi a zwelapili ku lu luta niti. (1 Mates. 2:2) Ku cwañi ka za batu ba ba bonisanga cisehelo kwa makalelo kono hasamulaho ba bonahala kuli ba lu picauka? Mubonelo o lukile ki wa butokwa, sina se si boñwi se si latelela ha si bonisa.

⁶ Ha ne ba nze ba li mwa bupaki bwa mwa likululu kakusasana o muñwi, bahasanyi ba babeli ba katana musali ya n’a nze a sundulula mbututu mwa pulemu. Musali yo a amuhela magazini ni ku mema likaizeli bao kuli ba tahe kwa ndu ya hae lizazi la Sunda le li tatama. Ba fita ka nako ye ne i lumelelelanwi, kono muñ’a ndu a ba taluseza kuli n’a sina nako ya ku ambola. Kono a sepisa kuli u ka be a bile teñi viki ye tatama. Likaizeli bao ne ba sa sepi kuli u ka buluka tumelelano, kono ha ba kuta ba yo fumana kuli n’a ba libelezi. Tuto ya kaliswa, mi zwelopili ya musali yo ne i makaza. Mwa nako ye kuswani fela, a kala ku kopana kamita ni ku abana mwa sebelezo ya mwa simu. Nako ye u kolobelizwe.

⁷ Mu Yale Mutomo fa Mupotelo wa Pili: Mutomo wa musipili wa makutisezo o kondile u yaliwanga fa ku pota kwa pili. Mu teeleze hande kwa maikuto a muñ’a ndu. A mi taluseza sika mañi? Kana ki mutu wa bulapeli? kana ki ya isa pilu kwa litaba za mipilelo ya nyangela? Kana ki ya tabela za sayansi? litaba za kwa kale? maino a ka taho? Kwa mafelelezo a ku pota, mu kana mwa buza puzo ye nyangumuna ni ku sepisa ku to ambolisana kalabo ye mwa Bibele ha mu ka taha hape.

⁸ Sina ka mutala, haiba muñ’a ndu a fa kalabo kwa sepiso ye mwa Bibele ya lifasi ku ba paradaisi, puhisano ya ka ku ekeza fa taba yeo ne i ka ba ye swanela. Mu si ka funduka kale, ne mu kana mwa buza kuli: “Lu kona ku ba cwañi ni sepo ye tuna ya kuli Mulimu u ka taleleza yona sepiso ye?” Mi mu ekeze kuli: “Mwendi n’a kona ku taha ka nako yeo lubasi kaufela lu li teñi fa ndu, kuli ni kone ku to mi bonisa kalabo ya Bibele ku yona puzo ye.”

⁹ Haiba ha ku na taba ye ñwi ili mo muñ’a ndu a bonisize cisehelo, ne mu kana mwa buza ye ñwi ya lipuzo ze bonisizwe mwa mitahisezo ye fa likepe la mafelelezo mwa Bukombwa bwa Luna bwa Mubuso ni ku itusisa yona ku ba ona mutomo wa puhisano ya mina ye tatama.

¹⁰ Mu Buluke ze Ñozwi ze Nepahezi: Ze ñozwi za mina za fa ndu ni ndu li swanela ku ba ze nepahezi ni ze kwanile. Mu ñole libizo ni keyala za muñ’a ndu mu sa zwa fela fa ku mu potela. Mu si ke mwa nuha nombolo ya ndu kamba libizo la mukwakwa—mu tatube ni ku ikolwisa kuli litaba li nepahezi. Mu ñole ponahalo ya mutu yo. Mu ñole ngambolo ye ne mu buhisani, mañolo e ne mu balile, libuka ze ne mu siile, ni puzo yeo mu ka yo alaba ha mu ka kuta. Mu ñole cwalo ni lizazi ni nako ye ne mu potile lwa pili ni ye ne mu bulezi kuli mu ka kuta. Cwale ze ñozwi za mina ha se li kwanile, mu si ke mwa li lata! Mu li beye mwa sibaka se si silelelizwe kuli mu kone ku itusisa zona ka nako ye ñwi. Mu zwelepili ku nahana mutu yo ni mo mu ka yo sebeleza fa ku pota kwa mina ko ku tatama.

¹¹ Mu Zibe Kuli Milelo ya Mina Ki Ifi: Sa pili, ka ku ba ni mufutumala ni silikani, mu like mo mu konela kaufela ku ezisa muñ’a ndu ku ikutwa ku lukuluha. Mu mu bonise kuli mu ba ba na ni cisehelo ya ka butu ku yena, kono isi ka ku bonahaza hahulu ku ba ni sitwaelelo. Ku zwa fo, mu mu hupulise puzo yeo ne mu buzize fa ku pota ko ku felile. Mu teeleze hande kwa maikuto a hae, mi mu fitise buitebuho bwa luli kwa neku la maikuto a hae. Cwale mu mu bonise libaka mubonelo wa Bibele ha u li o sebeza. Haiba ku konahala, mu mu bonise taba ye swana ye fumaneha mwa buka ya Zibo Ye Isa kwa Bupilo bo Bu Sa Feli. Mu buluke hande mwa munahano kuli mulelo wa mina o mutuna fa musipili wa makutisezo ki ku kala tuto ya Bibele.

¹² Ku sa potoloha-potoloha litaba kwa buka ya Zibo ku susuelize buñata bwa luna ku ‘ba ni bundume’ fa lituto za Bibele mwa ku susueza baituti ku fumaneha kwa mikopano ni ku swalisana ni kopano ya Jehova. Mwa linako ze felile, ne lu litelanga ku fitela mutu ha s’a itutile ka nakonyana kona lu mu mema ku kopana ni luna. Nako ye, buñata bwa baituti ba fumaneha kwa mikopano ba sa kala fela ku ituta, mi kacwalo ba zwelapili kapili.

¹³ Bosinyalana ba bañwi ne ba file bupaki bwa ku tandalelwa ku mubeleki yo muñwi. Ha n’a bonisize cisehelo mwa niti, ba mu mema kuli a be ni tuto ya Bibele mwa buka ya Zibo. Ka nako ye swana, ba mu taluseza kuli u swanela ku fumanehanga kwa mikopano, ili ko buñata bwa lipuzo za hae ne li ka alabiwa. Munna yo n’a si ka amuhela fela memo ya bona ya ku ituta kono mane n’a ituta habeli ka viki mi a kala ku fumaneha kwa mikopano ka nako kaufela kwa Ndu ya Mubuso.

¹⁴ Mu Itusise Broshuwa ya Ki Sifi Seo Mulimu A Tokwa ku Luna?: Kwa Mikopano ya Sikiliti ya “Linumwana za Kozo ya Silumeli,” Ne lu amuhezi broshuwa ye li “Ki Sifi Seo Mulimu A tokwa ku Luna? Broshuwa ye i butokwa kwa ku kala lituto za Bibele ni batu ba ba saba Mulimu ku si na taba ni tuto ya sikolo yeo ba bile ni yona. I na ni lituto ze kwanile hande, ze ama lituto za Bibele ze mutomo. Hatiso ye i ka ba sisebeliso se si buanyu hahulu kwa ku luta zibo ya ku ziba mulimu. I talusa niti ka ku utwahala ni ka bunolo kuli ibat’o ba mañi ni mañi wa luna u ka kona ku itusisa yona mwa ku luta ba bañwi zeo Mulimu a tokwa. I kona ku ba kuli buñata bwa bahasanyi ba ka ba ni tohonolo ya ku zamaisa tuto ya Bibele ku zwelela ku yona Broshuwa ye.

¹⁵ Batu ba bañwi ba ba ikutwa kuli ha ba na nako ya ku ituta buka ya Zibo ba kana ba tabela ku ba ni tuto ye kusufezi mwa broshuwa ya Seo A Tokwa. Ba ka tabiswa hahulu ki seo ba ituta! Mwa makepe a mabeli kamba a malalu fela, ba ka fumana likalabo kwa lipuzo zeo batu ba bile ni zona ka myanda ya lilimo: Mulimu ki mañi? Diabulosi ki mañi? Mulelo wa Mulimu kwa neku la lifasi-mubu ki ufi? Mubuso wa Mulimu ki nto mañi? Mu kona ku fumana cwañi bulapeli bwa niti? Nihaili kuli broshuwa ye i tahisa niti ka nzila ye bunolo, lushango lwa yona lu m’ata hahulu. I ama fa lisupo ze tuna zeo maeluda ba ka lundulula ni linumwana ba kolobezo mi hape i kona ku sebeza sina matatekelo a tuto ye tezi ya mwa buka ya Zibo.

¹⁶ Kuli mu fe tuto fa Musipili wa Makutisezo, ka bunolo ne mu ka bulela kuli: “Kana mwa ziba kuli ka k’u nga fela mizuzu ye minyinyani, mwa kona ku ba ni kalabo kwa puzo ya butokwa ya mwa Bibele?” Cwale, mu buze puzo ye li teñi kwa makalelo a tuto ye ñwi mwa broshuwa. Sina ka mutala, haiba mu ambola ni mutu yo muhulu, ne mu kana mwa bulela kuli: “Lwa ziba kuli mwa linako za kale Jesu n’a folisanga batu. Kono mwa linako za kwapili, ki sifi seo Jesu a ka ezeza bakuli, basupali, bafu?” Likalabo li fumaneha mwa tuto 5. Mutu ya na ni tengamelo kwa bulapeli n’a kana a tabiswa ki puzo ye li: “Kana Mulimu wa teeleza kwa litapelo kaufela?” I alabiwa mwa tuto 7. Lilama za lubasi ba ka bata ku ziba se: “Ki sifi seo Mulimu a tokwa kwa bashemi ni kwa bana?” Ba ka ziba ka ku ituta tuto 8. Lipuzo ze ñwi ki z’e li: “Kana bafu ba kona ku holofaza ba ba pila?” ye talusizwe mwa tuto 11; “Ki kabakalañi ha ku na ni bulapeli bo buñata hahulu bo bu ipapata ku ba bwa Sikreste?” ye buisanwi mwa tuto ya bu 13; ni “Ki sifi seo mu lukela ku eza kuli mu be mulikan’a Mulimu?” ye ambozwi mwa tuto 16.

¹⁷ Mu Tuse Ba Ba Bulela Puo I Sili: Ku cwani ka za bañi ba mandu ba ba bulela puo i sili? Haiba ku konahala, ba lutiwe mwa puo ye ba ziba hande ni ku fita. (1 Makor. 14:9) Muokameli wa mupotoloho wa kona ku fa puteho ni puteho mukoloko wa liputeho za lipuo ze ñwi mwa sibaka. Ka ku itusisa mukoloko wo, muñoli u kona ku fa puteho ya puo ye swanela Mapampili a bonisa Libaka ze Lukela ku Kutelwa Teñi (S-70-SK) ao a amuhela ku zwa kwa lilama za puteho. Zeo li si ke za lumelwa kwa Sosaiti. Haiba ha ku na liputeho fakaufi mi ha ku na bahasanyi fa silalanda ba ba kona ku bulela puo ye bulelwa ki muñ’a ndu, muhasanyi wa kona ku lika ku ituta ni muñ’a ndu, ka ku itusisa broshuwa ya Seo A Tokwa mwa mishobo ye mibeli.

¹⁸ Muhasanyi ya bulela Sikuwa n’a kalile tuto ku munna ya bulela si-Vietinam, ni musal’a hae ya bulela si-Thai. Lihatiso ni libibele mwa Sikuwa, si-Vietnam, ni si-Thai ne li itusiswa mwa tuto. Nihaili kuli shutano ya puo ne i ezisa tuto ku ba ye tata kwa makalelo, muhasanyi yo u ñola kuli: “Ku hula kwa moya [kwa bona bosinyalana ba] ku bile kwa kapili-pili. Ba boni tokwahalo ya ku kala ku fumaneha kwa mikopano ni bana ba bona ba babeli, mi ba bala Bibele busihu ni busihu sina lubasi. Mwan’a bona ya na ni lilimo ze silezi u na ni tuto ya hae ya Bibele.”

¹⁹ Ha mu ituta ni batu ba ba bulela puo i sili, mu bulele ka bunya, ka mukwa o utwahala hande, mi mu itusise manzwi ni lipulelo ze bunolo. Mu beye mwa munahano, ni hakulicwalo, kuli batu ba ba bulela puo i sili ba swanela ku kutekiwa. Ha ba swaneli ku boniwa sina banana.

²⁰ Mu itusise hande maswaniso a mande a mwa broshuwa ya Seo A Tokwa. Haiba “siswaniso si likana ni manzwi a’ sikiti,” buñata bwa maswaniso a mwa broshuwa a ka bulela ze ñata ku muñ’a ndu. Mu mu memele ku bala mañolo mwa Bibele ya hae tota. Haiba tuto ya kona ku zamaiswa ka nako yeo a li muñwi wa lilama za lubasi l’o ya bulela puo ya muhasanyi a li teñi kuli a kone ku toloka, yeo ne i ka ba nto ye tusa luli.—Mu bone Bukombwa bwa Luna bwa Mubuso, May 1984, likepe 8; October 1990, makepe 7-8.

²¹ Mu Eze Misipili ya Makutisezo Isi ka ku Liyeha: Ki nako ye fita kai ye mu lukela ku litela kuli mu eze musipili wa makutisezo? Bahasanyi ba bañwi ba kutanga mwa lizazi li li liñwi kamba a mabeli ku zwa fa ku pota kwapili. Ba bañwi ba kutanga ka nako ye ñwi lizazi le li swana! Kana yeo ki nako ye kuswani hahulu? Bañi ba mandu, ka nañungelele, ha ba bonahalangi ku ba ni taba. Hañata ki muhasanyi ya yo pota ya tokwa ku hulisa mubonelo o munde, hamohocwalo ni bundumenyana. Ha mu nyakisise ze bonwi ze latelela.

²² Muhasanyi wa lilimo ze 13 n’a nze a sebeza fa ndu ni ndu ka lizazi le liñwi ha bona basali ba babeli ba zamaya hamoho. Ka ku hupula susuezo ya ku kutaza kwa batu ko lu ba fumana kaufela, a atumela basali bao mwa mukwakwa. Ba bonisa cisehelo mwa taba ya Mubuso mi sibeli sa bona ba amuhela buka ya Zibo. Muzwale wa mukulwani yo a’ nga likeyala za bona, a ba kutela hasamulaho wa mazazi a mabeli, ni ku yo kala lituto za Bibele ni bona.

²³ Kaizeli yo muñwi u ezanga litukiso za ku pota hape viki ye tatama. Kono hasamulaho wa lizazi li li liñwi kamba a mabeli ku zwa fa ku pota kwa pili u fitanga ku fa muñ’a ndu magazini fa taba ye ne ba ambolisani nako ye felile. U bulelanga cwana ku muñ’a ndu: “Ne ni boni taba ye mi se ni nahana kuli mu ka tabela ku i bala. Ha ni koni ku ambola ka nako ye, kono ni ka taha manzibwana la Bulalu ka ku ya ka tukiso. Kana nako yeo isali ye lukile ku mina?”

²⁴ Mutu ha bonisa cisehelo mwa niti, lu kona ku ba ni buikolwiso bwa kuli u ka kopana ni twaniso ka linzila ze ñwi. Ku kuta kwa luna hasamulahonyana wa ku pota kwa pili ku ka mu tiisa ku tiyela sineneketo ya kopana ni yona ku zwelela ku bahabo, balikani ba ba tuna, ni ba bañwi.

²⁵ Mu Hulise Cisehelo ya Ba Ba Fumaneha mwa Libaka za Nyangela: Buñata bwa luna lu ikolanga ku kutaza mwa makululu, mwa libaka za ku yemisa limota, mwa litanansipoti za nyangela, mwa libaka za mileko, mwa liparki, ni libaka ze ñwi cwalo. Kwand’a ku posa libuka, lu tokwa ku hulisa cisehelo. Ka mulelo wo, lu swanela ku lika k’u nga libizo, keyala mi, haiba kwa konahala, ni nombolo ya luwaile ya batu kaufela ba ba tabela be lu kopana ni bona. K’u nga ona lika ze ha ku na hahulu butata, sina mo ne mu ka nahanela. Ha mu se mu ya kwa mafelelezo a ngambolo, mu zwise kabuka ka mina mwa ku ñola litaba mi mu buze kuli: “Kana kwa kona ku ba ni nzila ili yeo lu kona ku zwelapili ka yona mwa ngambolo ye ka nako ye ñwi?” Kamba mu bulele kuli: “Ne ni bata kuli mu bale taba ye ñwi ye ni sepa kuli i ka mi tabisa. Kana na kona ku i tisa kwa ndu kamba kwa sibaka sa mina sa musebezi?” Muzwale yo muñwi u buzanga fela kuli: “Mu fumaneha fa nombolo ifi ya luwaile?” U biha kuli mwa likweli ze talu, batu kaufela kwand’a ba balalu ne ba li ba ba tabile ku mu fa linombolo za bona za luwaile.

²⁶ Mu Itusise Luwaile mwa ku Fumana ni ku Hulisa Cisehelo: Kaizeli yo muñwi wa paina u itusisanga luwaile kwa ku ambola ni batu ba ba pila mwa miyaho ya mamota a matelele a silelezo. Hape u ezanga ni misipili ya makutisezo ka nzila ye swana. Fa ku ambola kwa pili, u bulelanga kuli: “Na ziba kuli ha mu ni zibi. Ni sweli ku eza buikatazo bo bu ipitezi bwa ku ambola ni batu ba fa silalanda sa mina ili ku abana ni bona muhupulo o zwelela mwa Bibele. Haiba mu na ni nako, ne ni ka tabela ku bala sepiso ye fumaneha kwa ...” Ha feza ku bala liñolo, u bulelanga kuli: “Kana ne i si ke ya ba nto ye nde ku bona nako yeo ha i taha? Ni ikozi ku mi balela nto ye. Haiba ni mina mu ikozi, ne ni ka tabela ku ambola ni mina hape kuli lu buhisane liñolo le li ñwi.”

²⁷ Fa ku liza luwaile kwa bubeli, u hupulisanga muñ’a ndu ka za ngambolo ya bona ye felile ni ku bulela kuli n’a tabela ku bala ku zwelela mwa Bibele ka mo miinelo i ka bela muta bumaswe bu feliswa. Ku zwa f’o u buhisananga ka za Bibele ka bukuswani ni muñ’a ndu. Mwahal’a lingambolo ze ñata za fa luwaile, batu b’a 35 ba mu memezi kwa mandu a bona mi u kalisize lituto za fa ndu za Bibele ze 7! Kana fokuñwi ku mi belanga tata ku eza misipili ya makutisezo kwa batu ba ba tabela ka libaka la ku kula kamba likezahalo ze si ka libelelwa? Haiba ku cwalo, kiñi ku sa itusisa luwaile ku ambola ni bona?

²⁸ Mu Kutele Cisehelo ye Mu Fumani mwa Libaka za Lipisinisi: Ki ze ñata ze amiwa mwa ku sebeza mwa sintolo ni sintolo ku fita ku siyalisa fela limagazini. Buñata bwa balekisi mwa masintolo ba na ni cisehelo ya luli mwa niti, mi cisehelo yeo i lukela ku huliswa. Ka linako ze ñwi, kwa konahala ku ba ni puhisano ya Bibele kamba mane nihaiba tuto ona fa sibaka sa sintolo luli. Ka linako ze ñwi, mina ni mutu ya tabela y’o mu kana mwa kona ku kopana ka nako ya ku pumula musihali kamba ka nako ye ñwi ye sa pitihanyi.

²⁹ Muokameli wa maeto yo muñwi n’a potezi muñ’a kantolo ka kañwi ni ku mu bulelela kuli n’a bata ku mu bonisa mo i ezezwa tuto ya Bibele. H’a mu buza kuli ku k’a nga nako ye fita kai, muokameli wa maeto a bulela kuli ne ku k’a nga fela mizuzu ye 15. Kacwalo muñ’a sintolo a beya temuso fa sikwalo ye li: “Ni ka kuta hamulaho wa mizuzu ye 20,” a hoha lipula, mi sibeli sa bona ba buhisana fa liparagilafu za pili ze ketalizoho mwa buka ya Zibo. Munna yo ya na ni busepahali n’a tabezi hahulu za n’a itutile kuli mane a taha kwa Mukopano wa Nyangela ni Tuto ya Tora ya ku libelela la Sunda mi a lumela ku zwelapili ku ituta viki ye tatama.

³⁰ Ha mu fa tuto mwa sibaka sa lipisinisi, ne mu kana mwa bulela kuli: “Tukiso ya luna ya tuto ya Bibele i’ nga fela mizuzu ye 15 ku i bonisa. Haiba ku sa pitihanyi, ni ka ba ya tabile ku mi bonisa mo i ezezwa.” Mi cwale mu buluke nako. Haiba ha ku konahali ku ba ni puhisano ye telele mwa sibaka sa lipisinisi, ne ku kana kwa ba hande ku potela mulekisi wa mwa sintolo kwa ndu ya hae.

³¹ Mu Kute Hape Niha Mu Si ka Siya Libuka: Cisehelo kaufela i swanela ku ezezwa musipili wa makutisezo, libuka ni ha li siilwe kamba ha li si ka siiwa. Kaniti, haiba ku bonahala fo ku sweu kuli muñ’a ndu ha tabeli taba ya Mubuso, ku ka ba hande ku isa buikatazo bwa mina ku sili.

³² Mwa musebezi wa fa ndu ni ndu, kaizeli yo muñwi a fumana musali ya n’a na ni silikani hahulu kono a hana ka ku tiya ku amuhela limagazini. Muhasanyi yo u ñola kuli: “Ka mazazi a mañata ne ni nze ni mu nahana mi na ikatulela kuli ne ni bata ku ambola ni yena hape.” Kwa mafelelezo, kaizeli yo a lapela, a ndumeba, mi a yo ngongota fa munyako wa musali yo. Kaizeli y’o a tabiswa ki ku memelwa mwa ndu ki muñ a ndu. Tuto ya Bibele ya kaliswa, mi ya zamaiswa hape lizazi le li tatama. Nako ha inze i ya, musali yo a taha mwa niti.

³³ Mu Itukiseze Cimo Kuli Mu Pete Ze Ñata: Ki nto ye babalizwe kuli nako ye ñwi viki ni viki i itusiswe mwa ku eza misipili ya makutisezo. Ki ze ñata ze kona ku petiwa ka ku itukiseza hande. Mu kolohanye libaka za ku potela mwa sibaka se si swana mo mu ka ezeza sebelezo ya fa ndu ni ndu.

³⁴ Ba ba kondisanga mwa ku eza misipili ya makutisezo ni ku kalanga lituto za Bibele za fa ndu ba bulela kuli ki nto ya butokwa ku bonisa cisehelo ya ka butu ye buniti kwa batu ni ku zwelapili ku ba nahana ni hasamulaho wa ku ba potela. Ku butokwa hape ku ba ni taba ye tabisa ya mwa Bibele ya ku ambolisana ni ku yala mutomo wa musipili wa makutisezo pili mu si ka funduka kale fa ku pota kwa pili. Ku zwa fo, ku butokwa ku kuta ka bunako ku latelela cisehelo. Mulelo wa ku kala tuto ya Bibele u swanela ku beiwa mwa munahano kamita.

³⁵ Kalemeno ka ka butokwa kwa ku kondisa mwa musebezi wa misipili ya makutisezo ki bundume. Bu fumanwa cwañi? Muapositola Paulusi u alaba ka ku bulela kuli lu “tiyela” ku shaela taba ye nde ku ba bañwi ka “Mulimu wa luna.” (1 Mates. 2:2) Haiba mu tokwa ku zwelapili mwa kalulo ye, mu lapelele tuso ku Jehova. Mi cwale, ka ku swalisana ni litapelo za mina, mu kutele ko mu fumani cisehelo kaufela. Kaniti Jehova u ka fuyaula buikatazo bwa mina!

[Mbokisi fa likepe 3]

Mwa ku Kondiseza mwa ku Eza Misipili ya Makutisezo

■ Mu bonise cisehelo ya ka butu ye buniti kwa batu.

■ Mu kete taba ye tabisa ya mwa Bibele ya ku ambolisana.

■ Mu yale mutomo wa musipili ni musipili o latelela.

■ Mu zwelepili ku nahana ka za mutu yo ni ha se mu fundukile.

■ Mu kute mwa lizazi li li liñwi kamba a mabeli ku latelela cisehelo.

■ Mu buluke mwa munahano mulelo wa mina wa ku kala tuto ya Bibele.

■ Mu lapelele tuso ya ku ba ni bundume mwa ku eza musebezi wo.