Mu Likanyise Bunde bwa Jehova
1 Ha se lu ikozi ku bona ponahalo ye tabisa ya lizazi ha li likela kamba ku ikola sico se si tabusa, kana ha lu susuezwi ku itumela ku Jehova, yena Simbule sa bunde kaufela? Bunde bwa hae bu lu susumeza ku bata ku mu likanyisa. (Samu 119:66, 68; Maef. 5:1) Lu kona ku bonisa cwañi kalemeno ka bunde?
2 Ku Ba Ba Si Balumeli: Nzila ye ñwi ye lu kona ku likanyisa ka yona bunde bwa Jehova ki ka ku bonisa kuli lwa iyakatwa ha buniti ba ba si bahabo luna mwa tumelo. (Magal. 6:10) Ku bonisa bunde ka linzila ze nde kwa kona ku ama hande mo ba ngela Lipaki za Jehova ni lushango lo lu shaela.
3 Ka mutala, muzwale yo muñwi wa mutangana y’a li paina ha n’a nze a libelela kwa sipatela, n’a inzi bukaufi ni musali-muhulu ya n’a bonahala ku kula hahulu ku fita bakuli ba bañwi kaufela be ne ba li teñi. Nako ya hae ya ku bona dokota ha ne i fitile, a fa sibaka sa hae ku yena musali-muhulu y’o. Hasamulaho, a t’o katana hape yena musali-muhulu y’o, kono cwale ili mwa musika, mi n’a tabile hahulu ku bona muzwale y’o. Nihaike kwamulaho n’a sa teelezangi kwa taba ye nde, n’a ize cwale n’a ziba kuli Lipaki za Jehova kaniti ba lata bomuyahwa ni bona. A kala ku zamaisezwa tuto ya kamita ya Bibele.
4 Kwa Mizwale ba Luna: Hape lu likanyisa bunde bwa Jehova ha lu ifana ku tusa balumeli ba bañwi. Ha ku banga likozi, lu banga ba bañwi ba pili ku tusa mizwale ba luna. Lu bonisa moya o swana ha lu tusa ba ba tokwa nzila ya ku ya kwa mikopano, ku potela bakuli, ni ku atama mwa ku bonisa lilato ku be lu sa zibi hande mwa puteho.—2 Makor. 6:11-13; Maheb. 13:16.
5 Nzila ye ñwi yeo Jehova a bonisa bunde ka yona ki ka ku ba ya “lata ku swalela.” (Samu 86:5) Ka ku mu likanyisa, lwa kona ku bonisa kuli lwa lata bunde ka ku swalela ba bañwi. (Maef. 4:32) Ku eza cwalo ku tusa kwa ku tahisa kuli swalisano ya luna ni balumeli ba bañwi i be ‘ye munati ili ye kateleha.’—Samu 133:1-3.
6 Haike bunde bwa Jehova bo butuna bu lu tuse ku mu lumbeka mi lu be ba ba nyakalala. Mi haike bu lu tuse ku ikataza ku likanyisa bunde bwa hae ku ze lu eza kaufela.—Samu 145:7; Jer. 31:12.