Buñwi bwa Niti bwa Sikreste—Bu Kona ku Petiwa Cwañi?

¹ Ki nto mañi ye kona ku swalisanisa batu ba ba fitelela 6,000,000 ba mwa linaha ze 234 ni lipuo ze bat’o ba ze 380? Bulapeli bwa Jehova Mulimu ki bona fela bo bu kona ku eza cwalo. (Mika 2:12; 4:1-3) Lipaki za Jehova ba ziba hande kuli buñwi bwa Sikreste kacenu bwa konahala. Ka ku ba “mutapi u li muñwi” mwatas’a “mulisana a li muñwi,” lu ka tundamena ku hana moya wa lifasi o kauhanya.—Joa. 10:16; Maef. 2:2.

² Mulelo o sepeha wa Mulimu ki wa kuli libupiwa kaufela ze butali li be mwa buñwi mwa bulapeli bwa niti. (Sin. 5:13) Ka ku ziba butokwa bwa seo, Jesu n’a tukufalezwi ku lapela ka za ku ba mwa buñwi kwa balateleli ba hae. (Joa. 17:20, 21) Mañi ni mañi wa luna u kona ku ekeza cwañi kwa buñwi bwa puteho ya Sikreste?

³ M’o Buñwi Bu Kona ku Petelwa: Buñwi bwa Sikreste ne bu si ke bwa konahala kwand’a ka Linzwi la Mulimu ni moya wa hae. Ha lu sebelisa ze lu bala mwa Bibele, lu tuhelela moya wa Mulimu kuli u sebeze hande mwa bupilo bwa luna. Ku eza cwalo ku lu konisa ku “buluka buñwi bwa moya ka tamo ya kozo.” (Maef. 4:3) Ku lu susumeza ku ezana hande ka lilato. (Makolo. 3:13, 14; 1 Pit. 4:8) Kana mwa tusa kwa ku hulisa buñwi ka ku yeya ka zazi Linzwi la Mulimu?

⁴ Musebezi wa luna wa ku kutaza ni ku tahisa balutiwa ni ona wa lu swalisanisa. Ha lu sebelisana ni ba bañwi mwa bukombwa bwa Sikreste, lu nze lu “lwanela hamoho tumelo ya Evangeli,” lu ba ba ba ‘sebelisana ni niti.’ (Mafil. 1:27; 3 Joa. 8) Ha lu nze lu eza cwalo, buñwi bwa tamo ya lilato mwa puteho bwa tiiswa. Kiñi ha mu sa memi ye mu si ka sebeza ni yena cwanoñu fa mwa bukombwa bwa mwa simu kuli mu ye ni yena viki ye?

⁵ Lu na ni tohonolo ye tuna luli ku ba mwa kopano i nosi ya niti ya mizwale ba macaba kaufela fa lifasi kacenu! (1 Pit. 5:9) Cwanoñu fa, ba bañata-ñata ne ba iponezi swalisano yeo kwa Mikopano ya Macaba ya “Mu Kanyise Mulimu.” Haike mañi ni mañi wa luna a tuse kwa ku hulisa buñwi b’o bwa butokwa ka ku bala Linzwi la Mulimu ka zazi, ka ku tatulula lifapano ka lilato, ni ka ku kutaza taba ye nde “ka pilu i liñwi.”—Maro. 15:6.