Sikolo sa Bukombwa sa Teokratiki sa 2004

¹ Jehova u luta batu-tu fela ku peta musebezi o’ li wa butokwa mwa lifasi kaufela. Nzila ye ñwi y’a eza cwalo ka yona ki ka lituto ze fiwa ka viki kwa Sikolo sa Bukombwa sa Teokratiki. Kana mwa abana teñi ka ku tala ka ku ya ka miinelo ya mina? Mwa January, ku ka eziwa licinceho ze sikai ka mulelo wa ku tusa baituti ku tusiwa hahulu ki litukiso.

² Ku Cinca kwa Muelezi wa Mutusi: Mizwale ba ba fa lingambolo za taelo ni ze zwile mubano za mwa Bibele ba itebuhile likelezo ze fiwa ki muelezi wa mutusi. Ha ku na ni maeluda ba ba fitile ku ze konisa ba ba likani, buikalabelo bwa muelezi wa mutusi bwa kona ku cinca ka silimo ni silimo. Ka ku eza cwalo, buikalabelo b’o bw’a kona ku abelwa ku ba bañwi; kono sihulu, maeluda hamoho ni batanga ba bukombwa ba ba ikonela ba ka tusiwa ki yeloseli ya babuleli ni baluti ba likwala ba ba shutana-shutana.

³ Ku Tomahanywa kwa Lundululo ya Lipuzo ni Likalabo: Haiba puteho ya mina i na ni mukopano wa mupotoloho mwa viki ya lundululo ya lipuzo ni likalabo, fohe lundululo (hamoho ni tomahanyo kaufela ya viki) i swanela ku shimbululelwa kwa viki ye tatama, mi tomahanyo ya viki ye tatama i swanela ku tiswa mwa viki ya mukopano wa mupotoloho. Kono ha ku tokwahali ku cinca litomahanyo mutumbi ze peli za ka viki haiba muokameli wa mupotoloho a pota mwa viki ya lundululo ya lipuzo ni likalabo. Kono pina, ngambolo ya mukwa wa bubuleli, ni ze zwile mubano za mwa Bibele li swanela ku fiwa ka mo li tomahanyelizwe. Ngambolo ya taelo (ye fiwa hamulaho wa ngambolo ya mukwa wa bubuleli) i ka zwa fa tomahanyo ya viki ye tatama. Hamulaho wa ze zwile mubano za mwa Bibele, Mukopano wa Sebelezo wa mizuzu ye 30 u ka eziwa, o kona ku cinciwa kuli ku be ni lingambolo z’e talu za mizuzu ye 10 kamba ze peli za mizuzu ye 15. (Lizibiso li si ke za fiwa.) Hamulaho wa Mukopano wa Sebelezo, ku ka opelwa pina, mi kihona ku ka taha tukiso ya muokameli wa mupotoloho ya mizuzu ye 30. Sikolo sa Bukombwa sa Teokratiki sa viki ye tatama si ka eziwa ku kala ka ngambolo ya mukwa wa bubuleli ni ze zwile mubano za mwa Bibele ka mo ku tomahanyelizwe, mi kihona ku ka eziwa lundululo ya lipuzo ni likalabo.

⁴ Mu itusise kolo ni kolo kwa ku hula kwa moya. Ha mu nze mu fumana tuso kwa tuto ya mina ya Sikolo sa Bukombwa sa Teokratiki, mu susueza puteho ya mina, mu abana mwa ku taleleza bupolofita bwa Bibele, mi mu tisa tumbo ku Musimululi wa lushango lo lunde ili lo lu shaela.—Isa. 32:3, 4; Sin. 9:19.