Sikolo sa Tuto ya Bukombwa—Munyako O Mutuna wa Musebezi
1 Ka mupolofita Jeremia, Jehova n’a polofitile kuli: “Ni ka li fa balisana ba ba ka li lisa [lingu za ka], ha li sa na ku saba, kamba ku ziyeleha; ha ku na ya zona ye ka tokwahala.” (Jer. 23:4) Musebezi o cwalo wa bulisana u sweli wa petiwa kacenu mwahal’a batu ba macaba kaufela. U sweli ku eziwa ki maeluda ba bañata-ñata ba ba mwa liputeho. Hape, sikwata sa micaha ba bañata sina puka ba ifanile ku sebeleza Jehova. (Samu 110:3) Mizwale ba ba ikokobeza bao ki mbuyoti ye tuna hakalo kwa liputeho za batu ba Mulimu! Musebezi wa kwa moya wa ku kubukanya batu ha u nze u zwelapili, ku sa tokwahala banna ba ba fitile ku ze konisa kuli ba ifane ku sebeleza mizwale ba bona.
2 Sikolo sa Tuto ya Bukombwa ki tukiso ye nde ya ku luta ka yona maeluda ni batanga ba bukombwa ba makwasha kuli ba eze misebezi ye miñwi. Ku zwa fo ne si tomezwi sikolo seo ka 1987, baituti ba ba fitelela 22,000 ba mwa linaha ze 140 se ba lutilwe mwa litopa ze 999 ze s’e ezizwe. Kwa mizwale bao, sikolo seo si bile “munyako o mutuna wa musebezi.”—1 Makor. 16:9.
3 Mulelo wa Sikolo: Mulelo wa Sikolo sa Tuto ya Bukombwa ki wa ku luta banna ba ba fitile ku ze konisa, kuli ba itukiseze ku eza misebezi kai ni kai ko ku kana kwa ba ni butokwi mwa kopano. Sikolo si ekeza kwa buikoneli bwa bona bwa ku etelela mwa musebezi wa ku shaela evangeli, ku abana mwa ku lisa mutapi, ni ku luta mwa puteho. Ha se ba felize kwa sikolo seo, baituti ba bañwi ba lumiwanga sina maipana ba ba ipitezi kamba baokameli ba maeto mwa linaha za habo bona kamba mwa linaha li sili. Ba bañwi ba lumiwanga ku sebeleza mwa liputeho za habo bona kamba mwa libaka mo ku na ni butokwi bo butuna mwa kalulo ya simu ye zamaiswa ki mutai wa naha ya habo bona.
4 Mwa kosi ya bona ya liviki ze 8, baituti ba itutanga Bibele ka butungi. Ba nyakisisanga ka tokomelo lituto ze ñata za Bibele, hamoho ni misebezi ya bulisana, ni ka za mwa ku tatululela matata a ama bupilo bwa Sikreste. Hape ba itutanga ze a bulela Mañolo ka za litaba ze ama tamaiso, buatuli, ni kopano. Ba lutiwanga hande hahulu za bubuleli bwa fapil’a nyangela mi ba fiwanga tuso ya ka butu kuli ba hule kwa moya.
5 Ze Tokwahala: Kwa utwisiseha kuli ze tokwahala mwa ku fumaneha kwa sikolo seo ki ze ipitezi. Ba ba ikupela ku ya kwa sikolo seo ba lukela ku ba be se ba bile maeluda kamba batanga ba bukombwa ka lilimo ze peli ka ku tatamana. Kaufel’a bona ba lukela ku ba makwasha, ba lilimo za buhulu za mwahal’a 23 ni 50. Ba ba fitisa kupo ya ku fumaneha teñi ba na ni ku ziba ku bala, ku ñola, ni ku bulela hande puo ye itusiswa kwa sikolo seo, mi ba swanela ku ba ni buikangulo bo bunde, isi ba ba tokwa pabalelo ye ipitezi kamba lico ze ipitezi. Ba ba eza sebelezo ya bupaina bwa kamita ki bona ba ba fiwa sibaka sa pili.
6 Ba ba itatela ba lukela ku ba ba ba tabela ni ku kona ku sebeleza ko ba tokwahala kaufela. Ku eza cwalo ku tokwa ku ba ni moya o swana ni wa mupolofita Isaya, ya n’a ifanile ka cisehelo ku eza musebezi o ipitezi ha n’a ize: “Ki na yo, u lume na!” (Isa. 6:8) Hape mwa bupilo bwa hae kaufela n’a bonisize ku ba ni buikokobezo. Ba ba kupa ku ya kwa Sikolo sa Tuto ya Bukombwa ba swanela ku susumezwa ku eza cwalo ki lilato le ba na ni lona kwa mizwale ba bona, ni takazo ya ku ba sebeleza, isi ku eza cwalo ka takazo ya ku bubana kamba ku ba ni mayemo a pahami. Ha se ba filwe lituto ze nde zeo, ba ba keni kwa sikolo seo ba libelelwa ku sebelisa ze ba itutile kuli ba bañwi ba fumane tuso.—Luka 12:48.
7 Lituso: Mwa liviki ze 8 za ku ituta hahulu, ba ba kena kwa sikolo seo ba ‘utiwa ka manzwi a tumelo ni ka tuto ye nde.’ (1 Tim. 4:6) Seo si ba konisa ku tusa ni ku susueza ba bañwi mwa liputeho ni mipotoloho ye ba filwe ku sebeleza teñi. Kwa libaka ze ñata ko se ba lumezwi ba ba keni kwa Sikolo sa Tuto ya Bukombwa, sebelezo ya mwa simu i ekezehile; sebelezo ya bupaina i susuelizwe, sihulu kwa mikulwani; mi ba bañata ba ba kalile honafa ku swalisana ni batu ba Mulimu ba isizwe pilu.
8 Kana mu eluda kamba mutang’a bukombwa wa likwasha, wa lilimo ze mwahal’a 23 ni 50? Ne mu ka eza hande ku nahana za ku ikupela ku ya kwa Sikolo sa Tuto ya Bukombwa. Kana u muzwale wa mutangana ya nahana za likonkwani za hao za kwapili mwa sebelezo ya Jehova? Ne u ka eza hande ku nolofaza bupilo bwa hao, ku sa ba ni ze filikanya ilikuli u kone ku kena mwa “munyako o mutuna wa musebezi” w’o. Ku eza cwalo ku kona ku mi tahiseza tabo ye tuna. Kaniti, Sikolo sa Tuto ya Bukombwa si tahisize ze nde isi fela ku ba ba si keni kono ni kwa liputeho za batu ba Mulimu mwa lifasi kaufela.
[Mbokisi fa likepe 3]
Mo Si Ba Tuselize Sikolo
“Sikolo si ni tiisize mwa bukombwa ni mwa ku kona ku lisa ka butali ni ka ku itusisa Mañolo.”
“Sikolo si ni konisize ku sepa hande kuli n’a kona ku eza misebezi ya ka ye shutana-shutana mwa puteho.”
“Si cincize ibat’o ba likalulo kaufela za bupilo bwa ka, ku kopanyeleza cwalo ni mo ni ikutwela ka za teokratiki ni kopano ya Mulimu.”
“Tuto ye ni filwe ne i ni tusize ku lemuha butokwa bwa ku ifana ku sebeleza ko ku na ni butokwi.”