Lu Tabile ku Sebeza ka T’ata mwa Musebezi wa Jehova!
1 Muapositola Paulusi n’a tabile ku sebeza ka m’ata a hae kaufela kuli a pete bukombwa bwa hae. (2 Makor. 12:15) Ka nzila ye swana, Bakreste ba bañata kacenu ba sebeza ka t’ata sina mapaina. Mi ba bañwi niha ba patehisizwe hahulu ki ku uta mabasi a bona, ba fumananga nako ya ku yanga mwa bukombwa ka sunda. Ba bañwi niha ba na ni mapongo, ba itiisanga ku zwisezapili za Mubuso ku likana ni m’ata a bona. Kwa tabisa hakalo ku bona batu ba Jehova, ku si na taba ni miinelo ya bona kamba buhulu bwa bona, inze ba itiisa mwa musebezi wa Jehova!
2 Ku Lata Ba Bañwi: Ku sebeleza Jehova ka mo lu konela kaufela, ni ku lata Mulimu ni batu ba bañwi, ku lu tusa ku ba ni lizwalo le linde. Bakeñisa kuli Paulusi n’a kutalize taba ye nde ka m’ata a hae kaufela, n’a bulezi ka tabo kuli: “Ni mi pakela niti kacenu, ni li, ha ni na mulatu mwa mali a mina kaufela.” (Lik. 20:24, 26; 1 Mates. 2:8) Haiba lu peta bukombwa ku likana ni miinelo ya luna, ha lu na ku ba ni mulatu wa mali.—Ezek. 3:18-21.
3 Ha lu sebeza ka t’ata kuli lu tuse ba bañwi, lu ka ba ni tabo. (Lik. 20:35) Muzwale yo muñwi n’a ize: “Manzibwana ha ni kotokanga hamulaho wa ku sebeleza Jehova lizazi mutumbi, ni ikutwanga ku katala luli. Kono ni ya tabile mi ni itumela ku Jehova kwa ku ni fa tabo y’a sa koni ku ni byangula mutu.”
4 Ku Lata Mulimu: Libaka le lituna ha lu swanela ku sebeleza Jehova ka t’ata kikuli ku eza cwalo ku tabisa Ndat’a luna wa kwa lihalimu. Lilato la luna la ku lata Jehova li lu susueza ku mamela litaelo za hae, ze cwale ka ku kutaza taba ye nde ni ku tahisa balutiwa. (1 Joa. 5:3) Batu niha ba sa lu amuheli hande kamba niha ba lu lwanisa, lu ka zwelapili ku sebeleza Jehova ka tabo.
5 Ye haki nako ya ku kutela mwamulaho. Lu pila mwa nako ya kutulo. (Mat. 9:37) Ka nako ya ku kutula, mulimi u sebezanga ka t’ata kakuli u banga fela ni nako ye kuswani ya ku kutula licalo za hae pili li si ka sinyeha kale. Nako ya kutulo ya kwa moya ni yona ki ye kuswani. Mi bakeñisa kuli ku siyezi fela nako ye kuswani, lu swanela ku zwelapili ku sebeza ka t’ata mwa bukombwa.—Luka 13:24; 1 Makor. 7:29-31.