Mu Itomele Sikonkwani sa ku Zamaisa Tuto ya Bibele
1 “Mu nanule meto, mi mu shalime masimu, kakuli s’a buzwa, a libelezi ku kutulwa.” (Joa. 4:35) Manzwi ao na bulezwi ki Jesu Kreste mi a ama luli kwa muinelo o li li ku ona likombwa za Sikreste kacenu.
2 Ku sa na ni batu ba lipilu ze sepahala ba ba tabela ku lutiwa linzila za Jehova. Se si paka taba yeo ki palo ye si ka bonwa kale ya lituto za Bibele ze 240,839 ze ne zamaisizwe mwa Zambia hal’a silimo sa sebelezo sa 2007, ni balutiwa ba banca ba 9,349 ba ne ba kolobelizwe. Ki lika mañi ze mu kona ku eza haiba luli mu bata ku zamaisa tuto ya Bibele?
3 Mu Itomele Sikonkwani: Mu kale ka ku itomela sikonkwani sa ku kalisa tuto ya Bibele ni ku i zamaisanga kamita. Mu hupule sikonkwani sa mina seo ha mu li mwa bukombwa. Bakeñisa kuli musebezi wa luna ka ku ba Bakreste u kopanyeleza ku luta ni ku kutaza, kaufela luna lu swanela ku ikataza ku abana ka ku tala mwa musebezi wa ku zamaisa lituto za Bibele.—Mat. 24:14; 28:19, 20.
4 Lika Ze Ñwi Ze Mu Lukela ku Eza: Bahasanyi ba Mubuso ba lukela ku lapelanga ka ku zwelela kwatas’a pilu. Fokuñwi lu katananga batu ba ne ba lapela ku kupa tuso ya kwa moya. Ki tohonolo ye tuna luli ku itusiswa ki Jehova kuli lu fumane batu ba ba cwalo ni ku ba luta Linzwi la Mulimu!—Hag. 2:7; Lik. 10:1, 2.
5 Kaizeli yo muñwi na kile a lapela ku Jehova kuli a mu tuse ku kalisa tuto ya Bibele mi cwale ha na li kwa musebezi a tanteka matrakiti a Kana Mw’a Tabela ku Ziba ze Ñata Ka za Bibele? Musali yo muñwi a to nga ye ñwi ya matrakiti ao ni ku i bala, mi a kala ku taleleza libizo ni keyala ya hae fa sibaka se si lukisizwe fa trakiti yeo, mi kaizeli a ambolisana ni yena ni ku kalisa tuto ya Bibele.
6 Bahasanyi ba bañwi ba ba ikonela hahulu ku kalisa lituto za Bibele ni ku li zamaisa ba kona ku mi ku tusa ku peta sikonkwani sa mina sa ku zamaisa tuto ya Bibele. Mu lapele ku Mulimu kuli a fuyaule buikatazo bwa mina bwa ku bata tuto ya Bibele, mi mu sebelise lituso kamukana ze fumaneha kuli mu pete sikonkwani sa mina seo. Haiba mu eza cwalo, mu ka tuha mu fumana tabo ye mwa ku zamaisa tuto ya Bibele.