Lu na ni Litaba za Butokwa za ku Bulelela ba Bañwi

¹ Linzwi la Mulimu li na ni lituto za butokwa ze lu tabela. (Samu 12:6; 119:11, 14 4) Nako ye ñwi, Jesu na itusisize liswanisezo ha na talusa likalulo ze shutana-shutana za Mubuso, mi hamulaho na buzize balutiwa ba hae kuli: “Kikuli mu li utwiselize zeo kaufela?” Balutiwa ba hae ha ne ba mu bulelezi kuli ne ba utwisisize lika zeo kaufela, na ba bulelezi kuli: “Kifo, ni li: Muñoli kaufela ya talifezi za mubuso wa kwa lihalimu u swana sina mutu ye li muñ’a ndu, h’a longotola ze nca ni za kale mwa sibulukelo sa hae.”—Mat. 13:1-52.

² Niti ya Bibele ye ne lu zibile ha ne lu kalile ku ituta Bibele lwa pili, i kona ku ngiwa sina litaba za butokwa za kale. Haiba lu zwelapili ku ekeza kwa zibo ya luna ya kale ka ku ituta lika ze tungile mwa Linzwi la Mulimu, lu ka fumana niti ya litaba ze ñwi za mwa Bibele, ili ze ka bonahala ku ba ze nca ku luna. (1 Makor. 2:7) Hape ka “mutanga ya sepahala, ya na ni kutwisiso,” lwa utwisisanga litaba za butokwa ze nca.—Mat. 24:45.

³ Lwa itebuha hahulu litaba za butokwa za kwa moya zeo, ibe kuli ki za kale kamba ki ze nca. Mi buitebuho bo, bu tahisa kuli lu bate tuto ni zibo ya ku ba baluti ba Linzwi la Mulimu, kuli lu abane niti ya butokwa yeo ye lu itutile ni ba bañwi.

⁴ Mu Itute Kwa Mutala wa Jesu: Jesu ka ku bonisa mwa na ikutwela ka za litaba za butokwa ze, na ezize ka mwa na konela kaufela kuli a li taluseze ba bañwi. Nihaiba ka linako za na katalanga, na sa tuhelangi ku taluseza ba bañwi litaba ze ne li mwa “sibulukelo” sa hae.—Joa. 4:6-14.

⁵ Lilato la Jesu kwa batu ba ne ba sa zibi za Mulimu, ne li mu susuelize ku taluseza ba bañwi litaba ze pilisa za butokwa za Mulimu. (Samu 72:13) Na utwezi makeke batu ba ne ba sa zibi litaba za Mulimu mi kabakaleo “a kala ku ba luta litaba ze ñata.”—Mare. 6:34.

⁶ Mu Likanyise Jesu: Ka ku swana ni Jesu, haiba lu itebuha hahulu litaba za butokwa ze lu na ni, lu ka tabela ku bonisa batu ba bañwi litaba za butokwa za kwa moya ku zwelela mwa Bibele. (Liprov. 2:1-5) Nihaike kuli ka linako ze ñwi lu ka katalanga, lu ka bulela niti ye mwa Mañolo ka cisehelo ye tuna. (Mare. 6:34) Buitebuho bwa luna ka za litaba za butokwa ze lu na ni, bu ka lu susueza kuli lu abanange hahulu mwa bukombwa kamita.