Mwa ku Tuseza ba Banca Kuli ba Kutaze
1. Ne mu ikutwile cwañi ha ne mu kalile ku abana mwa bukombwa?
1 Kana mwa hupula lwa pili ha ne mu kalile ku abana mwa bukombwa bwa fa ndu ni ndu? Mwendi ne mu ikalezwi hahulu. Haiba ne mu sebeza ni ya na mi lutanga Bibele kamba muhasanyi yo muñwi, kaniti ne mu banga ni tabo ha na mi tusanga. Ka nako ye ha se mu li sikombwa se si yeziseli, mwa kona ku tusa ba banca kuli ba kutaze.
2. Bahasanyi ba banca ba tokwa ku itutañi?
2 Bahasanyi ba banca ba swanela ku ituta mwa ku kaliseza lipuhisano ni muñaa ndu, mwa ku itusiseza Bibele, mwa ku ezeza misipili ya makutisezo, ni mwa ku kaliseza ni ku zamaiseza lituto za Bibele. Hape ba swanela ku ituta mwa ku itusiseza mikutalezo ye shutana-shutana, inge cwalo ku kutaza mwa makululu ni kwa batu ba ba mwa libaka za lipisinisi. Ka ku ba tomela mutala ni ku ba fa liakalezo, mwa kona ku tusa ba banca ku eza zwelopili mwa likalulo zeo.
3. Lu kona ku tusa cwañi ba bañwi ka mutala wa luna?
3 Mu Lute ka ku Toma Mutala: Jesu na bonisize balutiwa ba hae mwa ku kutaleza. (Luka 8:1; 1 Pit. 2:21) Ha mu lukisa ku sebeza ni muhasanyi yo munca, mu itukiseze mutahisezo o bunolo wa kona ku likanyisa, mwendi ka ku itusisa mutahisezo o fumaneha ku ye ñwi ya lihatiso za luna. Ku zwa fo, mu kutaze ku mutu wa pili ni wa bubeli kuli muhasanyi a utwe ze mu ka bulela. Mwa kona ku buza muhasanyi kuli a taluse mubonelo wa hae ku amana ni bunde bwa boni mwa mutahisezo wa mina. Ku eza cwalo ku ka mu tusa ku bona butokwa bwa ku sebeza ni ba bañwi mwa bukombwa mi ku ka mu bela bunolo ku amuhela liakalezo za mina hamulaho wa mutahisezo wa hae.
4. Lu kona ku tusa cwañi muhasanyi yo munca hamulaho wa ku teeleza kwa mutahisezo wa hae?
4 Mu fe Liakalezo: Jesu hape na file balutiwa ba hae litaelo za mwa ku kutaleza. (Mat. 10:5-14) Mwa kona ku tusa muhasanyi yo munca ka nzila ye swana. Haiba ki nako ya hae ya ku bulela, mu teeleze ka tokomelo. Mi ha se mu fundukile, mu bonise sishemo ha mu mu fa pabazo ye nongile ni ye li ya niti, ku si na taba kuli mu lemuhile likalulo ze ñwi mwa mutahisezo wa hae za tokwa ku sebeleza ku zona. Mu si ka fa kale akalezo, mwa kona ku bona haiba u ka eza zwelopili fa kalulo yeo ya mutahisezo ha mu ka fita fa munyako o tatama. Mwendi lwa pili na ikalezwi feela. Hape, mu zibe kuli buikoneli bwa bahasanyi ha bu swani, ni kuli hañata ku na ni linzila ze ñata ze swanela za mwa ku ezeza nto ye ñwi.—1 Makor. 12:4-7.
5. Lu kona ku bulelañi ha lu fa liakalezo?
5 Ka linako ze ñwi, muhasanyi yo munca u ka kupanga liakalezo ku mina. Kono haiba ha ezi cwalo, mu mu fe liakalezo. Mu kona ku eza cwañi cwalo ka maseme? Bahasanyi ba ba yeziseli ba buzanga kuli, “Kana na kona ku ku fa akalezo?” kamba, “U boni cwañi mutahisezo wale?” Hape mwa kona ku bulela kuli, “Ha ne ni li muhasanyi yo munca, ne ku ni belanga taata ku . . . , kono ne ni tusizwe ki. . . .” Fokuñwi ki kwa butokwa ku batisisanga hamoho litaba ze kona ku tusa. Kuli mu si ke mwa mu imeza ka litaba ze ñata, mu fe liakalezo fa kalulo i liñwi feela ya mutahisezo wa hae.
6. ‘Sipi i shemuna cwañi sipi’ ha lu li mwa bukombwa?
6 Sipi I Shemuna Sipi: Timotea, mubuleli wa evangeli ya yeziseli, na susuelizwe ki Paulusi kuli a ineele ku luta ni ku eza zwelopili. (1 Tim. 4:13, 15) Nihaike kuli mwendi se ku fitile lilimo ku zwa fo ne mu abanezi lwa pili mwa bukombwa, mu si ke mwa tuhela ku lika ku bolosola buikoneli bwa mina. Mu itute kwa bahasanyi be mu kutaza ni bona, nihaiba ba ba na ni yeloseli ye nyinyani mwa bukombwa, mi mu tusange ba bañwi ka sishemo, sihulu bahasanyi ba banca, ili ku ba tusa kuli ba be likombwa za taba ye nde ze luta ka bukwala.—Liprov. 27:17.