Mu Bone Bunde Bwa Misebezi ya Mina
1. Ki nto mañi ye kona ku lu palelwisa ku ba ni tukufalelo mwa bukombwa?
1 Mutu naa filwe takazo ya ku bona “bunde bwa misebezi ya hae.” (Muek. 2:24) Kono ha lu sa boni bunde bo bu zwa mwa bukombwa bwa luna, lwa kona ku zwafa ni ku palelwa ku ba ni tabo ni tukufalelo. Ki nto mañi ye kona ku lu tusa ku zwelapili ku ba ni tabo?
2. Ki kabakalañi ha lu sa swaneli ku libelela ze ñata hahulu mwa bukombwa bwa luna?
2 Mu si ke Mwa Libelela ze Ñata Hahulu: Mu hupule kuli Jesu naa petile hande bukombwa bwa hae, nihaike kuli ba naa konile ku tusa ku ba balutiwa ne li ba ba nyinyani feela. (Joa. 17:4) Mwa nguli ya hae ya mucali, Jesu naa polofitile kuli lipilu za batu ba bañata ne li si ke za amuhela taba ya Mubuso ye swana sina peu ye caliwa mwa lipilu. (Mat. 13:3-8, 18-22) Nihakulicwalo, haiba lu tukufalelwa mwa bukombwa, lu ka kona ku peta ze ñata.
3. Batu niha ba sa amuheli taba ye nde, lu kona ku “beya” cwañi muselo mwa musebezi wa luna wa ku kutaza?
3 Mo lu Kona ku Beela Muselo: Ka ku ya ka nguli ya Jesu, ba ba amuhela taba ye nde ba ka “beya” muselo. (Mat. 13:23) Litaka la buloto ha li mela ni ku kola, se li beya haki tutaka twa buloto, kono ki peu ye nca. Kamukwaocwalo, muselo o ba beya Bakreste haki ku tahisa feela balutiwa ba banca, kono ba beya muselo ka ku cala peu ye ñata hahulu ka ku kutaza Mubuso. Ku eza cwalo ku tahisa “bunde” bo bu lu fumanisa tabo ku si na taba kuli batu ba amuhela taba ye nde kamba kutokwa. Ka ku cala peu, lu tusa ku kenisa libizo la Jehova. (Isa. 43:10-12; Mat. 6:9) Lu ikola tohonolo ya ku sebeza hamoho ni Mulimu. (1 Makor. 3:9) Mi “manzwi a zwa mwa milomo ya luna” a tabisa Jehova.—Maheb. 13:15, 16.
4. Bukombwa bwa luna bu kona ku tahisa lika mañi, luna lu sa zibi?
4 Ku zwa fo, ha lu tukufalelwa mwa bukombwa, lu kana lwa tahisa bunde bo lu sa koni ku bona. Mwendi ba bañwi ba ne ba utwile lushango lwa Jesu ne ba bile feela balutiwa Jesu ha sa felize bukombwa bwa hae bwa fa lifasi. Ka nzila ye swana, peu ya Mubuso ye lu cala i kana i sa tomi mibisi ni ku hula mwa pilu ya mutu konji hasamulaho, mi mane mwendi ha lu na ku ziba kuli mutu yo u tile mwa niti. Ku si na kakanyo, bukombwa bwa luna bu tahisa lika ze nde ze ñata. Kamukwaocwalo, haike lu “zwelepili ku beya hahulu muselo” ni ku bonisa kuli lu balutiwa ba Jesu.—Joa. 15:8.