Buñata Bobutuna Bwa Batu ba Lingu Zeñwi Balumbeka Mulimu ni Kreste

1. Ngambolo yeñwi yenefilwe kwa mukopano omutuna ka silimo sa 1935 neitahisize kuli muzwale yomuñwi wa mukulwani aezeñi?

BO MUTU ni musalaa hae bane bali Baituti ba Bibele, lona libizo lene bazibahala ka lona Libaki za Jehova ka nako yeo, nebanani bana babashimani babalaalu ni babasizana bababeli. Neba balutile kusebeleza Jehova Mulimu ni kulikanyisa Jesu Kreste. Yomuñwi wa bana babona babashimani naanani lilimo ze 18 hakolobezwa ka silimo sa 1926. Sina feela mone baezezanga Baituti ba Bibele kaufela ka nako yeo, muzwale wa mukulwani yasepahala yo ni yena naacanga kwa sinkwa ni kunwa kwa waine silimo ni silimo ka nako ya Mulalelo wa Mulena. Kono hamulaho wa kuteeleza kwa ngambolo ya butokwa hahulu yenenani toho ya taba yeli, “Buñata Bobutuna,” alemuha kuli naatokwa kucinca sepo yanaanani yona ka za kwapili. Ngambolo yeo neifilwe ki muzwale J. F. Rutherford kwa mukopano omutuna one uezelizwe mwa Washington, D.C., America ka silimo sa 1935. Ki lika mañi zenepatuluzwi kwa mukopano omutuna wo?

2. Ki taba mañi yetabisa yenepatuluzwi mwa ngambolo ya Muzwale Rutherford?

² Mwa ngambolo yeo, Muzwale Rutherford naabonisize kuli “buñata bobutuna” bobubulezwi kwa liñolo la Sinulo 7:9 nebutalusa bo mañi. Mwa lilimo za kwamulaho pili ngambolo yeo isika fiwa kale, Baituti ba Bibele nebautwisisa kuli sikwata seo nesiyemela batu babañwi bane bakaya kwa lihalimu, ili bane basasepahali hahulu. Ka kuitusisa Mañolo, Muzwale Rutherford naatalusize kuli buñata bobutuna bwa batu bao nebasika ketiwa kupila kwa lihalimu, kono neli lingu zeñwib za Kreste bane bakapunyuha “ñalelwa yetuna” ni kupila kuya kuile fa lifasi. (Sin. 7:14) Jesu naasepisize kuli: “Ninani lingu zeñwi, zesi za mulaka wo; nilukela kulitisa ni zona, mi likateeleza kwa linzwi laka, mi likaba mutapi ulimuñwi, mulisana alimuñwi.” (Joa. 10:16) Lingu zeñwi zeo, liyemela Lipaki za Jehova babasepahala babanani sepo ya kupila kuya kuile mwa Paradaisi fa lifasi. (Mat. 25:31-33, 46) Halunyakisiseñi mo kutwisiso yenca yeo ya litaba za mwa Bibele neituselize batu ba Jehova babañata, kukopanyeleza cwalo ni muzwale yani wa lilimo ze 18.—Samu 97:11; Liprov. 4:18.

KUTWISISO YENCA ITUSA BATU BABAÑATA

3-4. Kwa mukopano omutuna wa silimo sa 1935, batu babañata nebalemuhileñi ka za sepo yabona, mi ki kabakalañi?

³ Taba yetabisa hahulu yeneezahezi kwa mukopano wo ki manzwi anaabulezi mubuleli, ali: “Lu kupa bote ba ba na ni sepo ya ku pila ku ya ku ile fa lifasi-mubu ba yeme.” Muzwale yomuñwi yanaafumanehile kwa mukopano wo utalusa kuli batu bababato eza 20,000 nebayemi, mi ki bona bane bali babañata kwa batu bane bafumanehile kwa mukopano wo. Hasamulaho, Muzwale Rutherford abulela kuli: “A mu bone! Ki buñata bo butuna bwa batu!” Baputehi kaufela kiha bahuweleza ka tabo. Batu bane bayemi bao nebautwisisa kuli Jehova naasika baketa kuya kwa lihalimu. Nebaziba kuli nebasika toziwa ka moya wa Mulimu. Fa lizazi lene litatami, batu ba 840 bakolobezwa, mi buñata bwabona neli ba lingu zeñwi.

⁴ Hamulaho wa ngambolo yeo, muzwale wa mukulwani yabulezwi kwamulaho, ni babañwi babañata batuhela kuca kwa sinkwa ni kunwa kwa waine ka nako ya Mulelo wa Mulena. Mizwale ni likaizeli babañata nebaikutwile sina mwanaaikutwezi muzwale yomuñwi yaikokobeza yanaabulezi kuli: “Kupuzo ya 1935 neli yona ya mafelelezo hanica kwa sinkwa ni kunwa kwa waine. Nenilemuhile kuli Jehova naasika itusisa moya wahae okenile kunifa sepo ya kuyo pila kwa lihalimu; kono sepo yaka neli ya kupila fa lifasi ni kutusa mwa musebezi wa kulifetula kuba paradaisi.” (Maro. 8:16, 17; 2 Makor. 1:21, 22) Kuzwa feela nako yeo, palo ya mizwale ni likaizeli babali kalulo ya buñata bobutuna yaekezeha mi bazwezipili kusebeza hamoho ni bo masiyaletic babatozizwe.

5. Jehova uunga cwañi mizwale ni likaizeli babatuhezi kuca sinkwa ni kunwa waine fa Kupuzo?

⁵ Jehova uunga cwañi mizwale ni likaizeli bane batuhezi kuca sinkwa ni kunwa waine fa Kupuzo hamulaho wa silimo sa 1935? Mi uunga cwañi Paki yakolobelizwe kacenu yanahana kuli waswanela kuca kwa sinkwa ni kunwa kwa waine ka nako ya Mulalelo wa Mulena, kono hasamulaho ulemuha kuli hasika toziwa ka moya okenile? (1 Makor. 11:28) Babañwi nebacanga ni kunwa kwa liswanisezo za fa Kupuzo zeo bakeñisa kuli nebasika utwisisa hande sepo yabona ya kwapili. Kono haiba baitumelela mafosisa abona habuniti, batuhela kuca ni kunwa kwa liswanisezo za fa Kupuzo, mi bazwelapili kusebeleza Jehova ka busepahali, Jehova uka baanga kuba ba lingu zeñwi. Niha basaci kwa sinkwa ni kunwa kwa waine, basafumanehanga kwa Kupuzo bakeñisa kuli baitebuha zabaezelize Jehova ni Jesu.

SEPO YEIPITEZI

6. Jesu ulaela mangeloi kuezañi?

⁶ Bakeñisa kuli lutuha lutalimana ni ñalelwa yetuna, ki kwa butokwa kuli lunyakisise litaba zeñwi zelibulela liñolo la Sinulo kauhanyo 7 ka za Bakreste babatozizwe ni buñata bobutuna bwa batu ba lingu zeñwi. Kwa liñolo leo, Jesu ulaela mangeloi kuswala ka taata mioya yemine ya lifasi ilikuli isike yatahisa sinyeho. Mangeloi ao haswaneli kutuhela mioya yeo kufukela mwa lifasi kufitela Bakreste kaufela babasali fa lifasi baswaiwa, ili kutalusa kuli kufitela Jehova aatula kuli basepahala. (Sin. 7:1-4) Bakeñisa busepahali bwabona, banyani ba Kreste babatozizwe bao bafiwa mupuzo wa kubusa sina malena ni baprisita hamoho ni yena kwa lihalimu. (Sin. 20:6) Jehova, Jesu, ni mangeloi banyolezwi hahulu kubona Bakreste bao babatozizwe ba 144,000 habafiwa mupuzo wabona kwa lihalimu.

7. Ka kuya ka liñolo la Sinulo 7:9, 10, ki bo mañi babona Joani mwa pono, mi baezañi? (Mubone siswaniso sesi fa kava.)

⁷ Joani hasaatalusize za malena ni baprisita ba 144,000, ubona nto yeñwi yetabisa, ili “buñata bobutuna bwa batu” babapunyuha Armagedoni. Ka kushutana ni ba 144,000, sikwata se sona ki sesituna hahulu mi palo yasona haizibahali. (Mubale Sinulo 7:9, 10.) “Baapezi liapalo zesweu,” kubonisa kuli ‘habasika ikenya mwa linzila zemaswe’ za lifasi la Satani, mi bazwezipili kusepahala ku Mulimu ni Kreste. (Jak. 1:27) Bazwelapili kuhuwa kuli bapilisizwe kabakala zaezize Jehova ni Jesu, yena Ngunyana wa Mulimu. Hape, basweli mitai ya nzalu, kubonisa kuli balumela kuli Jesu ki Mulena yaketilwe ki Mulimu.—Mubapanye Joani 12:12, 13.

8. Liñolo la Sinulo 7:11, 12 lilubulelelañi ka za lubasi lwa Jehova lwa kwa lihalimu?

⁸ Mubale Sinulo 7:11, 12. Libupiwa ze kwa lihalimu neliezizeñi hane liboni buñata bobutuna bwa batu? Joani ubona lubasi lwa Jehova kaufela lwa kwa lihalimu halunyakalala kabakala kubona buñata bobutuna bwa batu loluyemi fapilaa lubona kulumbeka Mulimu. Lubasi lwa Jehova lwa kwa lihalimu lukanyakalala kubona buñata bobutuna bwa batu bwanaaboni Joani mwa pono habupunyuha ñalelwa yetuna.

9. Ka kuya ka liñolo la Sinulo 7:13-15, ki lika mañi zebasweli kueza ba buñata bobutuna kacenu?

⁹ Mubale Sinulo 7:13-15. Joani utalusa kuli buñata bobutuna bwa batu “batapisize liapalo zabona ni kulisweufaza mwa mali a Ngunyana.” Taba yeo italusa kuli banani lizwalo lelikenile ni mayemo amande fapilaa Jehova. (Isa. 1:18) Bakreste bao bainezi, bakolobelizwe, banani tumelo yetiile mwa sitabelo sa Jesu mi banani silikani sesinde ni Jehova. (Joa. 3:36; 1 Pit. 3:21) Kacwalo, balumelezwa kuyema fapilaa lubona lwa Mulimu kuli bamufe “sebelezo yekenile musihali ni busihu” mwa kalulo ya fa lifasi ya tempele yahae ya kwa moya. Kacenu, ba buñata bobutuna ki bona babaeza musebezi omutuna hahulu wa kukutaza taba yende ya Mubuso ni kutusa batu kuba balutiwa, ili kubeya za Mubuso wa Mulimu mwa sibaka sapili mwa bupilo bwabona.—Mat. 6:33; 24:14; 28:19, 20.

10. Buñata bobutuna bwa batu banani buikolwiso mañi, ki sepiso mañi yebaka iponela haitalelezwa?

¹⁰ Buñata bobutuna bwa batu babaka punyuha ñalelwa yetuna banani buikolwiso bwa kuli Mulimu ukazwelapili kubababalela kakuli “Yainzi mwa lubona ukabapula tende yahae fahalimwaa bona.” Ba lingu zeñwi bakaiponela sepiso ye, yese balibelezi ka nako yetelele haitalelezwa, yeli: “[Mulimu] ukatakula miyoko kaufela kwa meeto abona, mi lifu halisana kubateñi, nihaiba kutahelwa ki maswabi kamba kulila kamba kuutwa butuku.”—Sin. 21:3, 4.

11-12. (a) Ka kuya ka liñolo la Sinulo 7:16, 17, ki limbuyoti mañi zebaka ikola buñata bobutuna bwa batu? (b) Ki lika mañi zebakona kueza ba lingu zeñwi kwa Kupuzo, mi ki kabakalañi?

¹¹ Mubale Sinulo 7:16, 17. Kacenu, batanga ba Jehova basweli bashwa tala kabakala kutokwa masheleñi kamba kabakala miinelo yetaata yetahiswa ki mifilifili ni ndwa. Babañwi basweli kukenyiwa mwa litolongo kabakala tumelo yabona. Nihakulicwalo, ba buñata bobutuna banani tabo kakuli baziba kuli hamulaho wa kupunyuha lifasi lelimaswe le, bakaba ni lico zeñata ka nako kaufela kwa mubili ni kwa moya. Lifasi la Satani le halika yundiswa, ba buñata bobutuna bakasilelezwa kwa buhali bwa Jehova bobutuka bwakasululela kwa macaba, bobuswana sina “nto yecisa.” Ñalelwa yetuna hase ifelile, Jesu ukaetelela batu babapunyuhile ñalelwa yeo kwa “maweluwelu a mezi a bupilo [bwa kuya kuile].” Kaniti luli, sepo yebanani yona ba buñata bobutuna ki yeipitezi luli. Kwa batu kaufela babañata-ñata babakile bapila fa lifasi, ki bona feela babakana bapila kuya kuile, kusina kushwa nikamuta!—Joa. 11:26.

¹² Ba lingu zeñwi baitebuha ku Jehova ni Jesu kabakala sepo yende yebanani yona. Ki niti kuli habasika ketiwa kuya kwa lihalimu, kono taba yeo haitalusi kuli Jehova haabangi kuba ba butokwa. Bakreste babatozizwe ni ba lingu zeñwi kaufelaa bona bakona kulumbeka Mulimu ni Kreste. Nzila yeñwi yebakona kueza cwalo ka yona, ki kufumaneha kwa Mulalelo wa Mulena.

MULUMBEKE MULIMU NI KRESTE KA PILU YAMINA KAUFELA KWA KUPUZO

13-14. Ki kabakalañi Bakreste babatozizwe ni ba lingu zeñwi kaufela habaswanela kufumaneha kwa Kupuzo ya Lifu la Kreste?

¹³ Mwa lilimo za cwanoñu fa, ibato ba alimuñwi kwa batu ba 1,000 babafumanehanga kwa Kupuzo wacanga kwa sinkwa ni kunwa kwa waine. Mwa liputeho zeñata, hakuna babacanga kwa liswanisezo fa Kupuzo. Taba yeo ibonisa kuli buñata bwa batu babafumanehanga kwa Kupuzo banani sepo ya kupila fa lifasi. Kono cwale ki kabakalañi habafumanehanga kwa Mulalelo wa Mulena? Libaka lebayelanga kwateñi liswana ni libaka lebakona kuyela batu kwa sinawenga sa mulikanaa bona. Bayanga kwa sinawenga kabakala kuli babata kubonisa kuli balata batu babanyalana mi babata kuswalisana ni bona. Ka mukwa oswana, ba lingu zeñwi bayanga kwa Kupuzo kabakala kuli babata kubonisa kuli balata Kreste ni batoziwa, mi babata kuswalisana ni bona. Hape ba lingu zeñwi bafumanehanga kwa Kupuzo bakeñisa kuli babata kubonisa kuli baitebuha sitabelo sa tiululo sesika bakonisa kupila kuya kuile fa lifasi.

¹⁴ Libaka leliñwi la butokwa ba lingu zeñwi habafumanehanga kwa Kupuzo kikuli, babata kumamela taelo ya Jesu. Jesu hanaaezize Mulalelo oipitezi wo lwapili ni baapositola bahae babasepahala, naababulelezi kuli: “Muezange cwalo kuli munihupule.” (1 Makor. 11:23-26) Kacwalo, bakazwelapili kufumaneha kwa Mulalelo wa Mulena, ibile feela Bakreste babatozizwe basali teñi fa lifasi. Mane ba lingu zeñwi bamemelanga babañwi kwa Kupuzo.

15. Mañi ni mañi waluna ukona kulumbeka cwañi Mulimu ni Kreste kwa Kupuzo?

¹⁵ Halufumaneha kwa Kupuzo, lunani kolo ya kulumbeka Mulimu ni Kreste ka kuopela lipina ni kulapela hamoho. Silimo se, ngambolo ya Kupuzo inani toho ya taba yeli, “Mubonise Buitumelo ku Zamiezelize Mulimu ni Kreste!” Ngambolo yeo, ika lutusa kuitebuha zaluezelize Jehova ni Kreste. Kacwalo, sinkwa ni waine halinze lifitiswa, lukaba ni kolo ya kunahanisisa zeliyemela, ili mubili wa Jesu ni mali ahae. Mi lukanahanisisa za lilato lalubonisize Jehova ka kulumeleza Mwanaa hae kuli alushwele ilikuli lufumane bupilo. (Mat. 20:28) Batu kaufela babalata Ndataa luna ya kwa lihalimu ni Mwanaa hae bakafumaneha kwa Kupuzo.

MUITUMELE KU JEHOVA KABAKALA SEPO YAMIFILE

16. Bakreste babatozizwe ni ba lingu zeñwi baswana cwañi?

¹⁶ Mulimu uunga Bakreste babatozizwe ni ba lingu zeñwi kuba batokwa ku yena. Jehova wabalata kaufelaa bona. Kakuli mane teko yanaalifile kuli aliulule Bakreste babatozizwe ni ba lingu zeñwi yaswana, ili bupilo bwa Mwanaa hae yalatwa. Shutano feela yeliteñi mwahalaa likwata zepeli zeo kikuli sepo yabona yashutana. Kono kaufelaa bona baswanela kuzwelapili kusepahala ku Mulimu ni Kreste. (Samu 31:23) Mi muhupule kuli moya wa Mulimu wakona kulutusa kaufelaa luna ka nzila yeswana. Jehova ulufanga moya wahae okenile kuli ulutuse ibe kuli lu babatozizwe kamba lu ba lingu zeñwi.

17. Ki lika mañi zebanyolelwa Bakreste babatozizwe?

¹⁷ Bakreste babatozizwe habapepiwangi inze banani sepo ya kuyo pila kwa lihalimu. Mulimu ki yena yabafanga sepo yeo. Banahanisisanga za sepo yabona, kulapela ka za teñi, mi banyolelwa kuamuhela mupuzo wabona wa kuyo pila kwa lihalimu. Habazibi kuli mubili wabona wa moya ukaba cwañi kwa lihalimu. (Mafil. 3:20, 21; 1 Joa. 3:2) Nihakulicwalo, banyolelwa kuyo bona Jehova, Jesu, mangeloi, ni batoziwa babañwi. Mi banyolelwa kuyo ba ni bona mwa Mubuso kwa lihalimu.

18. Ki lika mañi zebanyolelwa ba lingu zeñwi?

¹⁸ Ba lingu zeñwi baitebuha hahulu sepo yebanani yona ya kupila kuya kuile fa lifasi, yona sepo yebabanga ni yona batu kaufela. (Muek. 3:11) Banyolelwa nako yeo muta bakatusa mwa musebezi wa kufetula lifasi kaufela kuba paradaisi. Hape banyolelwa kuyaha mandu, kulima masimu, ni kuba ni bana babapetahalile. (Isa. 65:21-23) Kuzwa fo, banyolelwa kupotela libaka zeñata zeshutana-shutana za lifasi, zecwale ka malundu, mishitu, mawate, ni kuituta zeñata ka za lika zabupile Jehova. Kono nto yetabisa nikufita kikuli, ka nako yeo, silikani sabona ni Jehova sikatiya hahulu.

19. Kupuzo ifa mañi ni mañi waluna kolo mañi, mi Kupuzo ya silimo se ikaezwa lili?

¹⁹ Jehova ufile mañi ni mañi wa batanga bahae babaineezi ku yena sepo yende ya lika za kwapili. (Jer. 29:11) Kupuzo ya Lifu la Kreste ilufa kolo yende ya kulumbeka Mulimu ni Kreste kabakala zeba luezelize kuli lufumane bupilo bobusa feli. Kupuzo ya Lifu la Jesu ki ona mukopano wa butokwa hahulu obabanga ni ona Bakreste silimo ni silimo. Kupuzo yeo ikaba la Mukibelo, March 27, 2021, lizazi hase lilikezi. Silimo se, batu babañata babapila mwa libaka zeshutana-shutana bakafumaneha kwa mukopano wa butokwa wo. Babañwi bakafumaneha kwa mukopano wo kusina taba ni twaniso. Babañwi bona bakaeza mukopano wo inze bali mwa tolongo. Kusina taba ni miinelo yeluli ku yona, haike luhupule kuli Jehova, Jesu, ni lubasi lwa Mulimu lwa kwa lihalimu babona zelueza. Mi haike puteho ni puteho, sikwata ni sikwata, ni mañi ni mañi waluna aikole Kupuzo!