TABA YA KUITUTA 24
Jehova ki Muswaleli Yomutuna
“Wena Jehova u yomunde mi ulata kuswalela; ubonisa lilato lelituna lelisa feli ku babahuweleza ku wena kaufela.”—SAMU 86:5.
PINA 42 Tapelo ya Mutangaa Mulimu
ZELUKA ITUTAa
1. Sina mokuboniselizwe kwa Muekelesia 7:20, ki taba mañi ya niti yanaabulezi Mulena Salumoni?
MULENA Salumoni naañozi kuli: “Hakuna mutu yalukile mwa lifasi yaeza zende nako kaufela asaezi sibi.” (Muek. 7:20) Taba yeo ki ya niti luli! Kaufelaa luna lu baezalibi. (1 Joa. 1:8) Kacwalo, kaufelaa luna lutokwa kuswalelwa ki Mulimu ni batu babañwi.
2. Mukona kuikutwa cwañi haiba mulikanaa mina yomutuna amiswalela?
2 Mwendi mukile mwafoseza mulikanaa mina yomutuna. Bakeñisa kuli nemubata kutatulula butata mi nemubata kukutisana lipilu, mwakupa swalelo. Nemuikutwile cwañi mulikanaa mina hanaa miswalezi ka pilu kaufela? Kana nemuikutwile hande? Kaniti, mwendi nemuikutwile cwalo mi mwendi nemubile ni tabo!
3. Ki lika mañi zeluka nyakisisa mwa taba ye?
3 Lubata kuli Jehova abe yena Mulikanaa luna yomutuna ka kufitisisa, kono fokuñwi, lubulelanga kamba kueza lika zesa mutabisi. Kono ki kabakalañi halunani buikolwiso bwa kuli Jehova walata kuswalela? Ki ifi shutano yeliteñi mwahalaa Jehova haswalela mutu ni mobaswalelanga batu? Mi Mulimu uswalelanga batu babacwañi?
JEHOVA ULATA KUSWALELA
4. Ki kabakalañi halukona kukolwa kuli Jehova ulata kuswalela?
4 Linzwi la Mulimu lilutaluseza kuli Jehova ulata kuswalela. Jehova hanaaitibahalize ku Mushe fa Lilundu la Sinai, naabulezi cwana ka kuitusisa lingeloi: “Jehova, Jehova, Mulimu yanani makeke ni mukekecima, yasaakufi kuhalifa ni yatezi lilato lelisa feli ni niti, yabonisa lilato lelisa feli kwa masika aeza likiti, yaswalela bufosi ni bumaswe ni sibi.” (Exo. 34:6, 7) Jehova ki Mulimu yanani sishemo ni makeke mi kamita ubata kuswalela baezalibi bababakile.—Neh. 9:17; Samu 86:15.
Jehova waziba lika kaufela zelukopani ni zona mwa bupilo zetahisize kuli lube ni mikwa yemiñwi (Mubone paragilafu 5)
5. Ka kuya ka Samu 103:13, 14, ki lika mañi zaezanga Jehova kabakala kuli uluziba hande?
5 Ka kuba Mubupi waluna, Jehova uluziba hande hahulu. Munahane feela taba ye: Jehova waziba lika kaufela ka za mutu ni mutu fa lifasi! (Samu 139:15-17) Kacwalo, Jehova waziba hande kuli luhozize sibi kwa bashemi baluna. Mane Jehova waziba lika kaufela zelukopani ni zona mwa bupilo ili zetahisize kuli lube ni mikwa yemiñwi. Ki lika mañi zaezanga Jehova kabakala kuli uluziba hande? Ulubonisanga makeke.—Samu 78:39; mubale Samu 103:13, 14.
6. Jehova ubonisize cwañi kuli walata kuswalela?
6 Jehova ubonisize kuli walata kuswalela. Waziba kuli bakeñisa zanaaezize mutu wapili Adama, kaufelaa luna luhozize sibi ni lifu. (Maro. 5:12) Hakuna sene lukona kueza kuli luitiulule kamba kuliulula mutu yomuñwi kwa sibi ni lifu. (Samu 49:7-9) Nihakulicwalo, Mulimu waluna yalilato alubonisa mukekecima mi alukisa kuli luliululwe. Ki lika mañi zanaaezize? Liñolo la Joani 3:16 libonisa kuli Jehova naalumile Mwanaa hae wa libanda kuli ato lushwela. (Mat. 20:28; Maro. 5:19) Jesu naalushwezi ilikuli aliulule mutu kaufela yabonisa tumelo ku yena. (Maheb. 2:9) Kusina kukakanya, Jehova naautwile butuku bobutuna hanaaboni Mwanaa hae yalatwa hashubulwa ni kubulaiwa ka nzila yesituhu! Kaniti luli, Jehova naasike atuhelela Mwanaa hae kushwa kambe naasabati kuluswalela.
7. Ki mitala ifi ya mwa Bibele ya batu babañwi banaaswalezi Jehova ka pilu kaufela?
7 Mwa Bibele kunani mitala ya batu babañata banaaswalezi Jehova ka pilu kaufela. (Maef. 4:32) Ki bo mañi bona bao? Mutala omuñwi ki wa Mulena Manase. Muuna yamaswe yo naafoselize Jehova ka kueza lika zemaswe hahulu. Naalapezi milimu ya buhata mi naasusuelize batu babañwi kueza nto yeswana. Naabulaile bana bahae tota, kubafa sina matabelo kwa milimu ya buhata. Mane naabeile ni siswaniso sa kubeta sa mulimu wa buhata sanaaezize mwa tempele ya Jehova yekenile. Bibele ibulela ka za hae kuli: “Aeza lika zemaswe hahulu mwa meeto a Jehova, amufoseza.” (2 Makol. 33:2-7) Niteñi, Manase hanaabonisize kuli ubakile habuniti, Jehova amuswalela ka pilu kaufela. Mulimu mane amukutiseza fa bulena. (2 Makol. 33:12, 13) Mutala omuñwi hape ki wa Mulena Davida, yanaaezize libi zetuna fapilaa Jehova, zecwale ka bubuki ni bubulai. Kono Davida hanaaitumelezi kuli naaezize sibi mi abaka habuniti, Jehova amuswalela ni yena. (2 Sam. 12:9, 10, 13, 14) Kaniti luli, lwakona kukolwa kuli Jehova ulata kuswalela. Mi sina moluka nyakisiseza, Jehova unani buikoneli bobuipitezi hahulu bwa kuswalela bobufita bwa batu.
BUIKONELI BWA JEHOVA BOBUIPITEZI BWA KUSWALELA
8. Kuba Muatuli yomunde kuama cwañi buikoneli bwa Jehova bwa kuswalela?
8 Jehova ki yena “Muatuli wa lifasi kaufela.” (Gen. 18:25) Muatuli yomunde utokwa kuziba hande mulao. Jehova ki yena Muatuli waluna, mi uutwisisa hande mulao ka kutala bakeñisa kuli ki Mutomi wa Mulao waluna. (Isa. 33:22) Jehova ki yena feela yaziba ka kutala zelukile ni zesika luka. Ki lika mañi zeñwi zatokwa kueza muatuli yomunde? Pili asika eza kale katulo ka za taba yeñwi, uswanela kuziba litaba kaufela zeamiwa mwa taba yeo. Kacwalo, Jehova ki yena Muatuli yomunde ka kufitisisa kakuli kamita uzibanga litaba kaufela.
9. Ki lika mañi zaziba Jehova zetahisanga kuli aswalele mutu?
9 Ka kushutana ni baatuli ba batu, Jehova kamita uzibanga litaba kaufela ka za taba yekona kubateñi. (Gen. 18:20, 21; Samu 90:8) Haswani ni baatuli ba batu babaitingile fa lika zebabona kamba zebautwa. Uutwisisanga ka kutala mo likezo za mutu liamelwanga ki mikwa yahozize kwa bashemi bahae, litaba zalutilwe, simuluho yahae, maikuto ahae, ni munahanelo wahae. Jehova hape waziba ze mwa pilu ya mutu. Wautwisisanga hande zetahisanga kuli mutu aeze nto yeñwi, milelo yahae, ni litakazo za mutu ni mutu. Hakuna nto yekona kupatiwa mwa meeto a Jehova. (Maheb. 4:13) Kacwalo, Jehova haswalela mutu kikuli waziba litaba kaufela.
Jehova uatulanga ka kuluka mi haana ketululo. Hakuna yakona kumuleka kweta (Mubone paragilafu 10)
10. Luziba cwañi kuli Jehova kamita ufanga katulo yelukile? (Deuteronoma 32:4)
10 Jehova kamita uatulanga ka kuluka. Haana ketululo nihanyinyani. Haswalelangi mutu kabakala ponahalo yahae, sifumu, libubo, kamba buikoneli. (1 Sam. 16:7; Jak. 2:1-4) Hakuna yakona kuhapeleza Jehova kueza nto yeñwi kamba kumuleka kweta. (2 Makol. 19:7) Haezangi likatulo kabakala kufilikana kamba kabakala mwaikutwela. (Exo. 34:7) Kusina kukakanya, Jehova ki yena Muatuli yomunde ka kufitisisa bakeñisa kuli uluziba hande hahulu mi uziba ni miinelo yeluli ku yona.—Mubale Deuteronoma 32:4.
11. Ki kabakalañi halukona kubulela kuli buikoneli bwa Jehova bwa kuswalela buipitezi?
11 Bañoli ba Mañolo A Siheberu nebaziba kuli Jehova unani buikoneli bobuipitezi bwa kuswalela. Hatiso yeñwi ibonisa kuli bañoli bao fokuñwi nebaitusisanga linzwi la Siheberu leliitusiswa “kutalusa feela mo Mulimu aswalelanga baezalibi. Linzwi leo ni kamuta nelisa itusiswangi kutalusa mo batu baswalelanga batu babañwi.” Jehova ki yena feela yakona kuswalela muezalibi ka kutala. Luikutwanga cwañi Jehova haasa luswalezi?
12-13. (a) Lukona kuikutwa cwañi haiba Jehova aluswalela? (b) Ki lika mañi zasaezangi Jehova haswalela mutu?
12 Haiba lukolwa kuli Jehova uluswalezi, lukaikola “linako za kukatuluha” kuzwa ku yena, ili zekopanyeleza kuba ni kozo ya mwa munahano ni lizwalo lelinde. Lukona feela kuikutwa cwalo haiba “Jehova yena kasibili” aluswalela isiñi batu. (Lik. 3:19) Jehova haluswalela, ululumeleza kuba balikani bahae hape, mi kuswana feela inge kuli nelusika eza sibi.
13 Jehova haluswalela, haana kuluhupulisa kamba kulufa koto kabakala sibi sene luezize. (Isa. 43:25; Jer. 31:34) Jehova ubeyanga libi zaluna kwahule “sina mapazulelo haainzi kwahule ni malikelelo.”b (Samu 103:12) Kunahanisisa mo Jehova alata kuswalela, kuka lutusa kuitumela hahulu ku yena ni kumusaba. (Samu 130:4) Kono ki batu babacwañi baswalelanga Jehova?
KI BATU BABACWAÑI BASWALELANGA JEHOVA?
14. Ki lika mañi zelunyakisisize zetahisanga kuli Jehova aswalele mutu kamba kusa muswalela?
14 Sina mose lunyakisiselize, Jehova haketangi kuswalela mutu kamba kutokwa kabakala kuli uezize sibi sesituna kamba sesinyinyani. Hape luitutile kuli Jehova uitusisanga zibo yanani yona ka kuba Mubupi, Mutomi wa Mulao, ni Muatuli habata kuswalela mutu kamba kutokwa. Ki lika mañi zanyakisisanga Jehova habata kuswalela mutu kamba kusa muswalela?
15. Sina mokuboniselizwe kwa Luka 12:47, 48, ki nto mañi yanyakisisanga Jehova habata kuswalela mutu kamba kusa muswalela?
15 Taba yeñwi yanyakisisanga Jehova ki kubona haiba muezalibi naaziba kuli zanaaeza lifosahalile kamba kutokwa. Jesu naabonisize buniti bwa taba ye, kwa Luka 12:47, 48. (Mubale.) Haiba mutu alela kueza nto yeñwi yemaswe mi aeza nto yeo inze aziba hande kuli kueza cwalo ki kufoseza Jehova, ueza sibi sesituna. Mutu yaeza cwalo ukona kusaswalelwa sibi sahae. (Mare. 3:29; Joa. 9:41) Kono niti kikuli, fokuñwi lwalemuhanga kuli luezize lika zefosahalile. Kana lusakona kuswalelwa? Eni! Mi nto ye ilulibisa kwa nto yeñwi yanyakisisanga Jehova ka za kuswalela mutu kamba kutokwa.
Lwakona kukolwa kuli Jehova uka luswalela haiba lubaka habuniti (Mubone maparagilafu 16-17)
16. Kubaka kutalusañi, mi ki kabakalañi halutokwa kueza cwalo?
16 Nto yeñwi yanyakisisanga Jehova ki kubona haiba muezalibi ubakile habuniti kamba kutokwa. Kubaka kutalusañi? Kubaka kutalusa “kucinca munahanelo, mikwa, kamba milelo.” Kukopanyeleza kuinyaza kamba kuikutwa hahulu bumaswe kabakala lika zemaswe zaezize mutu kamba kabakala kupalelwa kueza lika zende zanaaswanela kueza. Mutu yabakile hainyazangi feela kabakala lika zemaswe zaezize, kono hape uinyazanga kabakala kuli naatuhelezi silikani sahae ni Jehova kufokola, ili nto yenetahisize kuli aeze lika zemaswe zeo. Muhupule kuli Mulena Manase ni Mulena Davida nebaezize libi zetuna; kono Jehova naabaswalezi bakeñisa kuli nebabakile habuniti. (1 Mal. 14:8) Kaniti, Jehova ukona feela kuluswalela haiba lubonisa kuli lubakile habuniti. Kono kuikutwa feela bumaswe kabakala sibi seluezize hakusika likana. Luswanela kuunga muhato omuñwi.c Nto ye ilulibisa kwa nto yeñwi hape yanyakisisanga Jehova habata kuswalela mutu kamba kusa muswalela.
17. Kusikuluha kutalusañi, mi kueza cwalo kukona kulutusa cwañi kusaeza libi zeswana zene luezize kwamulaho? (Isaya 55:7)
17 Nto yeñwi ya butokwa hahulu yanyakisisanga Jehova pili asika swalela kale mutu ki kubona haiba usikuluhile. Kusikuluha kutalusa kutuhela muzamao omaswe ni kukala kueza lika zetabisa Jehova. (Mubale Isaya 55:7.) Mutu yo, utokwa kucinca munahanelo wahae kuli akale kuetelelwa ki Jehova. (Maro. 12:2; Maef. 4:23) Uswanela kuikatulela kutuhela muhupulo ni likezo zahae zemaswe. (Makolo. 3:7-10) Nihakulicwalo, libaka lelituna lelitahisanga kuli Jehova aluswalele ni kulukenisa kwa sibi ki tumelo yaluna mwa sitabelo sanaafile Kreste. Kabakala sitabelo seo, Jehova uka luswalela haiba alemuha kuli lusweli lwalika molukonela kaufela kutuhela muzamao waluna omaswe.—1 Joa. 1:7.
MUKOLWE KULI JEHOVA UKA MISWALELA
18. Lunyakisisizeñi ka za swalelo ya Jehova?
18 Halulundululeñi ka bukuswani lisupo zeñwi za butokwa zeluitutile. Kaniti luli, Jehova ki yena Muswaleli yomutuna mwa pupo kaufela. Ki kabakalañi halubulela cwalo? Sapili, kamita ulata kuswalela. Sabubeli, uluziba hande hahulu. Waziba hande moluinezi, mi waziba haiba lubakile kamba kutokwa. Sabulaalu, Jehova haluswalela, uluswalelanga ka kutala, mi kuswana feela inge kuli nelusika eza sibi. Taba yeo itahisa kuli lube ni lizwalo lelikenile ni kushemubiwa ki yena.
19. Ki kabakalañi halukona kuba ni tabo niha lusika petahala mi luzwelapili kueza sibi?
19 Niti kikuli, bakeñisa kuli halusika petahala, lukazwelapili kueza sibi. Kono lwakona kuomba-ombiwa ki zeibulela hatiso yeñwi (Insight on the Scriptures, Volyumu 2, likepe 771), yeli: “Bakeñisa kuli Jehova unani makeke, wahupulanga kuli batanga bahae habasika petahala; kacwalo, habaswaneli kuikutwanga hahulu bumaswe kabakala mafosisa abaezanga atahiswa ki sibi sebahozize. (Samu 103:8-14; 130:3) Haiba baeza mobakonela kaufela kupila ka kuya ka tato ya Mulimu, bakaba ni tabo. (Mafil. 4:4-6; 1 Joa. 3:19-22).” Taba yeo yasusueza luli!
20. Lukanyakisisañi mwa taba yetatama?
20 Luitebuha hahulu kuli Jehova walata kuluswalela haiba lubakela libi zaluna habuniti. Kono lukona kulikanyisa cwañi Jehova yalata kuswalela? Ki mwa linzila lifi moluswana ni Jehova haluswalela babañwi, kono ki mwa linzila lifi molushutana ni yena ka moluswalela babañwi? Ki kabakalañi kuutwisisa shutano yeo hakuli kwa butokwa? Lipuzo zeo likaalabiwa mwa taba yetatama.
PINA 45 Minahano ya Mwa Pilu Yaka
a Mwa Linzwi lahae, Jehova ulutaluseza kuli walata kuswalela batu bababakile. Kono fokuñwi luikutwanga kuli Jehova haakoni kuluswalela. Mwa taba ye, lukanyakisisa libaka halukona kukolwa kuli Mulimu waluna uka luswalela haiba lubakela libi zaluna habuniti.
b Mubone buka yeli, Mu Sutelele ku Jehova, kauha. 26, para. 9.
c TALUSO YA MANZWI: “Kubaka” kutalusa kucinca munahano ni kuikutwa kuswaba kabakala mupilelo wa mutu wa kwamulaho, kabakala likezo zemaswe, kamba kabakala lika zapalezwi kueza. Kubaka kwa niti kutahisa kuli mutu aeze misebezi yebonisa kuli ucincize likezo zahae.